កូរ៉េខាងជើងបាញ់មីស៊ីលក្នុងរយៈចម្ងាយដ៏ឆ្ងាយ មិនធ្លាប់មាន
ចុះផ្សាយនៅថ្ងៃ៖
ស្តាប់ - ០៧:០៦
កូរ៉េខាងជើង នៅថ្ងៃសុក្រនេះបានបាញ់មីស៊ីលចម្ងាយមធ្យមមួយ រំលងទឹកដី មុននឹងធ្លាក់ទៅក្នុងមហាសមុទ្រប៉ាស៊ីហ្វិក។ ប្រធានាធិបតីអាមេរិកលោកដូណាល់ ត្រាំ នៅមិនទាន់ប្រតិកម្មទៅលើការបាញ់មីស៊ីលរបស់កូរ៉េខាងជើង នៅថ្ងៃនេះនៅឡើយទេ ប៉ុន្តែ រដ្ឋមន្រ្តីការបរទេសអាមេរិក បានទាមទារជាថ្មី ឲ្យចិន និងរុស្ស៊ី សម្ព័ន្ធមិត្តរបស់ក្រុងព្យុងយ៉ាង ចាត់វិធានការដាក់សម្ពាធផ្ទាល់ទៅលើកូរ៉េខាងជើង។
មីស៊ីលរបស់កូរ៉េខាងជើងនៅថ្ងៃនេះ បានហោះបោះពួយរំលងទឹកដី ជប៉ុន មុននឹងទៅធ្លាក់ក្នុងមហាសមុទ្រប៉ាស៊ីហ្វិក។ កូរ៉េខាងជើង ដោយបាញ់មីស៊ីល នៅតែប៉ុន្មានថ្ងៃក្រោយក្រុមប្រឹក្សាសន្តិសុខអង្គការសហប្រជាជាតិដាក់ទណ្ឌកម្មជាលើកទី៨ លើកូរ៉េខាងជើង កូរ៉េខាងជើង។ ការនេះបង្ហាញថា កូរ៉េខាងជើងគ្មានខ្លាចញញើតនឹងការដាក់ទណ្ឌកម្មរបស់ក្រុមប្រឹក្សាសន្តិសុខ ហើយទណ្ឌកម្មនោះទៀតសោត ក៏នឹងមិនជះឥទ្ធិពល ប៉ះពាល់ ដល់កម្មវិធីផលិតមីស៊ីល និងអាវុធនុយក្លេអ៊ែររបស់កូរ៉េខាងជើងដែរ។
រុស្ស៊ី ចិនបានប្រកាសថ្កោលទោសការបាញ់មីស៊ីលបាលីស្ទីករបស់កូរ៉េខាងជើង។ ប៉ុន្តែ អ្នកនាំពាក្យរបស់ក្រសួងការបរទេសចិនបានអំពាវនាវឲ្យភាគីជម្លោះ អត់ធ្មត់។ នៅថ្ងៃសុក្រ រដ្ឋមន្រ្តីការបរទេសអាមេរិក បានទាមទារឲ្យរុស្ស៊ី និងអាមេរិកដាក់សម្ពាធផ្ទាល់ទៅលើមេដឹកនាំក្រុងព្យុងយ៉ាង។ រដ្ឋមន្រ្តីបារាំង វិញបាននិយាយថ្កោលទោសការបាញ់មីស៊ីលរបស់កូរ៉េខាងជើង ក្នុងពេលដែលប្រមុខរបស់អង្គការអូតង់បានចាត់ទុកការបាញ់មីស៊ីលរបស់កូរ៉េខាងជើង ថា ជាការគំរាមកំហែងដល់សន្តិភាពក្នុងលោក ហើយនិងបានទាមទារឲ្យមានចំណាត់ការថ្នាក់ពិភពលោក ដើម្បីឆ្លើយតបនឹងការបាញ់មីស៊ីលរបស់កូរ៉េខាងជើង។
សូមចុចអាន៖ គីម ជុងអ៊ុន ពីមេដឹកនាំក្មេងខ្ចីខ្វះបទពិសោធន៍ ទៅជាអ្នកមានប្រៀប ?
នៅថ្ងៃសុក្រ កូរ៉េខាងត្បូងបានបាញ់មីស៊ីលចម្ងាយខ្លី ប្រមាណ ២៥០គីឡូម៉ែត្រ ទៅក្នុងសមុទ្រ។ ២៥០គីឡូម៉ែត្រជាចម្ងាយដែលមីស៊ីលអាចរត់ទៅដល់ទីតាំងបាញ់មីស៊ីលរបស់កូរ៉េខាងជើង នៅក្បែរក្រុងព្យុងយ៉ាង។
មីស៊ីលបាលីស្ទីកដែលរត់បានចម្ងាយឆ្ងាយ មិនធ្លាប់មាន
ដោយបាញ់មីស៊ីល នៅថ្ងៃនេះ កូរ៉េខាងជើងអាចផ្គើននឹងវិធានការដាក់ទណ្ឌកម្មសេដ្ឋកិច្ចពីក្រុមប្រឹក្សាសន្តិសុខ ប៉ុន្តែ ជាមួយគ្នានេះ ក៏ត្រូវដឹងដែរថា វាជារឿងធម្មតា ទេ ដែលប្រទេសផលិតមីស៊ីល ដូចជា កូរ៉េខាងជើងត្រូវបាញ់មីស៊ីល ដើម្បីធ្វើតេស្តសាកល្បង សមត្ថភាពមីស៊ីលរបស់ខ្លួន។ មីស៊ីលដែលកូរ៉េខាងជើងបាញ់នៅថ្ងៃនេះ គឺដូចគ្នានឹងមីស៊ីលដែលកូរ៉េខាងជើងធ្លាប់បានបាញ់រំលងជប៉ុន កាលពីថ្ងៃទី ២៩សីហាកន្លងទៅ។ ប៉ុន្តែ ការបាញ់មីស៊ីល លើកនេះ សំខាន់ជាងពេលមុន ព្រោះថា មីស៊ីលជាប្រភេទ មីស៊ីលបាលីស្ទីក ចម្ងាយមធ្យមពិតមែន ប៉ុន្តែ វាអាចហោះបានក្នុងកំពស់ដ៏ខ្ពស់ ៧៧០គីឡូម៉ែត្រ ហើយនិងក្នុងចម្ងាយ ៣៧០០គីឡូម៉ែត្រ។
មីស៊ីលដែលកូរ៉េខាងជើងបាញ់រំលងជប៉ុនលើកមុន ហោះបានចម្ងាយតិចជាងនេះ គឺ ត្រឹមតែ ២៧០០គីឡូម៉ែត្រប៉ុណ្ណោះ។ ការនេះបញ្ជាក់ថា កូរ៉េខាងជើងកំពុងបោះមួយជំហានទៅមុខ ក្នុងការអភិវឌ្ឍមីស៊ីលរបស់ខ្លួន។
មេបញ្ជាការទ័ពអាមេរិកប្រចាំអាស៊ីប៉ាស៊ីហ្វិក បានអះអាងថា មីស៊ីលរបស់កូរ៉េខាងជើងបាញ់រំលងជប៉ុននៅថ្ងៃ សុក្រ មិនបានសំដៅ គំរាមកំហែង ទឹកដីអាមេរិក ដូចជាហ្គាំនោះទេ។ កូរ៉េខាងជើងមិនបានបាញ់មីស៊ីល គំរាមកំហែងទឹកដីអាមេរិក ដូចមេបញ្ជាការទ័ពអាមេរិកបញ្ជាក់មែន ប៉ុន្តែ ពេលនេះ កូរ៉េខាងជើង កំពុងតែធ្វើការ សម្រិតសម្រាំង គន់គូរ ឲ្យបានជាក់លាក់ពី ដំណើរគោលចរ ហើយនិងកម្លាំង មីស៊ីល របស់ខ្លួន ដែលកូរ៉េខាងជើងធ្លាប់បានគំរាមកន្លងមកថា នឹងប្រើបាញ់សំដៅកោះហ្គាំរបស់អាមេរិក នៅក្នុងមហាសមុទ្រប៉ាស៊ីហ្វិក។
រដ្ឋមន្រ្តីការពារជប៉ុន៖ កោះហ្គាំរបស់អាមេរិកមាននៅក្នុងគំនិតវាយប្រហាររបស់កូរ៉េខាងជើង
ទោះមានបំពាក់ដោយប្រព័ន្ធខែលមីស៊ីល ទំនើប ជប៉ុនគ្មានចេតនាបាញ់ទម្លាក់មីស៊ីលបាលីស្ទីករបស់កូរ៉េខាងជើងនោះទេ។ ជំហរអះអាងរបស់រដ្ឋមន្រ្តីការពារជាតិជប៉ុន នៅថ្ងៃសុក្រនេះបានបង្ហាញយ៉ាងច្បាស់ថា ជប៉ុននឹងមិនចំណាយមីស៊ីលសូម្បីមួយគ្រាប់ ដើម្បីបាញ់ទម្លាក់មីស៊ីលរបស់កូរ៉េខាងជើង។ មិនចំណាយមីស៊ីលបាញ់ទម្លាក់មីស៊ីលរបស់កូរ៉េខាងជើង ព្រោះថា ជប៉ុនមិនមែនជាគោលដៅគំរាមកំហែងរបស់មីស៊ីលកូរ៉េខាងជើង។
នៅពេលកូរ៉េខាងជើងបាញ់មីស៊ីលបាលីស្ទីករំលងទឹកដីជប៉ុន នៅចុងខែសីហា រដ្ឋមន្រ្តីការពារជាតិជប៉ុនបានលើកឡើងថា ជប៉ុនមិនបាញ់ទម្លាក់មីស៊ីលរបស់កូរ៉េខាងជើង ព្រោះថា មីស៊ីលហោះកាត់ជប៉ុន ក្នុងរយៈពេលខ្លី តែជាង ២នាទី។
តាមរដ្ឋមន្រ្តីការពារជាតិជប៉ុន ដែលបានធ្វើសន្និសីទកាសែតនៅថ្ងៃនេះ នៅទីក្រុងតូក្យូ មីស៊ីលបាលីស្ទីករបស់កូរ៉េខាងជើង ហោះបានចម្ងាយ ៣៧០០គីឡូម៉ែត្រ មុននឹងទៅផ្ទុះធ្លាក់នៅចម្ងាយ ២ពាន់គីឡូម៉ែត្រ ភាគខាងកើតកោះហុកកៃដូរបស់ជប៉ុន។ សម្រាប់ប្រមុខការពារជាតិជប៉ុន បើមើលទៅលើចម្ងាយរត់បានរបស់មីស៊ីល ៣៧០០គីឡូម៉ែត្រ កូរ៉េខាងជើងពិតជាមានសមត្ថភាព អាចបាញ់មីស៊ីល ដល់កោះហ្គាំ ដែលជាមូលដ្ឋានយោធាដ៏សំខាន់របស់អាមេរិក នៅមហាសមុទ្រប៉ាស៊ីហ្វិក ដែលស្ថិតនៅ ចម្ងាយ តែ ៣៤០០គីឡូម៉ែត្រប៉ុណ្ណោះ ពីទីក្រុងព្យុងយ៉ាង។
យ៉ាងណាក៏ដោយ ទោះជាជប៉ុន មិនត្រូវគំរាមដោយផ្ទាល់ដោយមីស៊ីលលើកនេះរបស់កូរ៉េខាងជើង ប៉ុន្តែ ជប៉ុនក៏មិនបានព្រងើយកន្តើយ ដែរ។ នៅថ្ងៃព្រហស្បតិ៍ ម្សិលមិញ កូរ៉េខាងជើងទើបតែបានគំរាមបាញ់គ្រាប់នុយក្លេអ៊ែរ ដើម្បីពន្លិចជប៉ុនចូលទៅក្នុងមហាសាគរ។ គឺដោយសារហេតុផលនេះហើយ ដែលជប៉ុន សត្រូវសំខាន់ទី ២ របស់ កូរ៉េខាងជើង បន្ទាប់ពីអាមេរិក បានអំពាវនាវឲ្យមានកោះប្រជុំបន្ទាន់នៅក្រុមប្រឹក្សាសន្តិសុខអង្គការសហប្រជាជាតិនៅថ្ងៃនេះ។
ក្រុមប្រឹក្សាសន្តិសុខកោះប្រជុំបន្ទាន់ នៅថ្ងៃសុក្រ
នៅក្រោយកូរ៉េខាងជើង បាញ់មីស៊ីលរំលងជប៉ុន ដ្ឋមន្រ្តីការបរទេសអាមេរិក លោករេច ធីល័រសុន បានទាមទារឲ្យចិន និងរុស្ស៊ីដាក់សម្ពាធដោយផ្ទាល់ ទៅលើកូរ៉េខាងជើង។
ក្រុមប្រឹក្សាសន្តិសុខអង្គការសហប្រជាជាតិទើបតែសម្រេចដាក់ទណ្ឌកម្មសេដ្ឋកិច្ចលើកទី ៨លើកូរ៉េខាងជើង នៅក្រោយប្រទេសនេះបាញ់សាកល្បងអាវុធនុយក្លេអ៊ែរអ៊ីដ្រូសែន នៅដើមខែនេះ។ ដូច្នេះ គេមិនរំពឹងថា ក្រុមប្រឹក្សាសន្តិសុខ នឹងបោះឆ្នោត ឲ្យមានការដាក់ទណ្ឌកម្មថ្មីមួយទៀតនោះទេ។ ជប៉ុន និងអាមេរិក បានទាមទារឲ្យមានការកោះប្រជុំបន្ទាន់ នៅក្រុមប្រឹក្សាសន្តិសុខ នៅថ្ងៃសុក្រនេះ គឺដើម្បីឲ្យភាគីពាក់ព័ន្ធដូចជាចិន និងរុស្ស៊ី ជាដើម ពង្រឹងការដាក់ទណ្ឌកម្មទៅលើ សម្ព័ន្ធមិត្តរបស់ពួកគេ គឺកូរ៉េខាងជើង។
គេដឹងហើយថា ទណ្ឌកម្មសេដ្ឋកិច្ច គ្មានបានហុចផល រារាំងកុំឲ្យកូរ៉េខាងជើងអភិវឌ្ឍ ផលិតមីស៊ីល និងអាវុធនុយក្លេអ៊ែរនោះទេ។ គេវាយតម្លៃថា កូរ៉េខាងជើងនៅតែបន្តបាញ់សាកល្បងមីស៊ីលរបស់ខ្លួន ដើម្បីសម្រួចសម្រាំងសមត្ថភាពមីស៊ីល ដូចដែលប្រទេសមានមីស៊ីលដទៃទៀតបានធ្វើកន្លងមក។ កូរ៉េខាងជើងមានមីស៊ីល ដែលអាចគំរាមកំហែងដល់សន្តិសុខរបស់ប្រទេសដែលជាគូសត្រូវរបស់កូរ៉េខាងជើង។ នេះគឺជាការពិតមួយដែលគេមិនអាចប្រកែកបាន។ ផ្ទុយពីវិបត្តិនុយក្លេអ៊ែរអ៊ីរ៉ង់ យន្តការអន្តរជាតិមិនអាចដាក់សម្ពាធលើកូរ៉េខាងជើង ដូចដែលគេបានធ្វើទៅលើអ៊ីរ៉ង់នោះទេ។
ស្ថិតនៅក្នុងដំណាក់កាលនេះ មិនមែននៅក្រុមប្រឹក្សាសន្តិសុខទេ ដែលគេអាចរកឃើញដំណោះស្រាយ វិបត្តិនុយក្លេអ៊ែរកូរ៉េខាងជើង។ គឺមានតែការចុះសម្រុង រវាងភាគីជម្លោះផ្ទាល់ ដូចជាអាមេរិក ជប៉ុន ហើយនិងកូរ៉េខាងជើង ដែលអាចបន្ថយភាពតានតឹងនៅឧបទ្វីបកូរ៉េ។ បញ្ហានៅត្រង់ថា រហូតមកដល់ពេលនេះ គ្មានភាគីណាមួយ បង្ហាញសញ្ញា ដកថយ ដើម្បីត្រលប់ចូលមកចូលតុចរចា រកកិច្ចព្រមព្រៀងសន្តិភាពនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ