គីម ជុងអ៊ុន៖ កម្មវិធីផលិតអាវុធនុយក្លេអ៊ែររបស់កូរ៉េខាងជើងជិតបានសម្រេច
ចុះផ្សាយនៅថ្ងៃ៖
ស្តាប់ - ០៦:៥៥
មេដឹកនាំកូរ៉េខាងជើង លោកគីម ជុងអ៊ុន នៅថ្ងៃសៅរ៍នេះបានអះអាងថា កូរ៉េខាងជើងជិតសម្រេចបានគោលដៅ មានអាវុធនុយក្លេអ៊ែរ។ ដកស្រង់សំដីដោយទីភ្នាក់ងារព័ត៌មានផ្លូវរដ្ឋ KCNA លោកគីម ជុងអ៊ុនថ្លែងដែរថា នឹងអភិវឌ្ឍកម្មវិធីនុយក្លេអ៊ែរ និងមីស៊ីល ដើម្បីឲ្យកូរ៉េខាងជើងមានសមត្ថភាពនុយក្លេអ៊ែរយោធា ស្មើនឹងអាមេរិក។ នៅថ្ងៃសុក្រ ក្រុមប្រឹក្សាសន្តិសុខរបស់អង្គការសហប្រជាជាតិបានចេញសេចក្តីថ្លែងការណ៍ ថ្កោលទោសការបាញ់មីស៊ីលរបស់កូរ៉េខាងជើង ដែលក្រុមប្រឹក្សាបានចាត់ទុកថា ជាការគំរាមកំហែង ដល់តំបន់ និងសមាជិកទាំងអស់របស់អង្គការសហប្រជាជាតិ។
លោកគីម ជុងអ៊ុន មេដឹកនាំកូរ៉េខាងជើង នៅថ្ងៃសៅរ៍នេះ បានប្តេជ្ញាថា នឹងបន្ត អភិវឌ្ឍកម្មវិធីនុយក្លេអ៊ែរយោធា ដើម្បី ឲ្យកូរ៉េខាងជើង មានសមត្ថភាពយោធាស្មើនឹងអាមេរិក។ តាមមេដឹកនាំកូរ៉េខាងជើង កម្មវិធីនុយក្លេអ៊ែរយោធារបស់កូរ៉េខាងជើង ជិតឈានបានសម្រេច ដល់ចំណុចចុងបញ្ចប់។ “គោលដៅចុងក្រោយរបស់យើង គឺ បង្កើតឲ្យមានតុល្យភាពកម្លាំងយោធា ជាមួយអាមេរិក និងចង់បង្ហាញដល់អាមេរិក កុំឲ្យចេះតែនិយាយគំរាមប្រើជម្រើសយោធា ដាក់កូរ៉េខាងជើង” នេះជាការអះអាងរបស់លោកគីម ជុងអ៊ុន ទៅកាន់ទីភ្នាក់ងារព័ត៌មានរដ្ឋ KCNA។
អ្នកជំនាញមួយចំនួននិយាយថា កូរ៉េខាងជើងនឹងមិនអាចមានកម្លាំងនុយក្លេអ៊ែរយោធា ស្មើនឹងអាមេរិនោះ។ កូរ៉េខាងជើងជាប្រទេសថ្មីថ្មោង ដែលគេនៅមិនទាន់ច្បាស់ថា នឹងអាចមានសមត្ថភាពផលិតក្បាលគ្រាប់នុយក្លេអ៊ែរ ដ៏តូចមួយសម្រាប់ដាក់ បំពាក់លើមីស៊ីលផង។ អាមេរិកឯណោះវិញ កំពុងមានរួចទៅហើយ ក្បាលគ្រាប់នុយក្លេអ៊ែរដល់ទៅជាង ៤ពាន់គ្រាប់។ ៤ពាន់គ្រាប់ ក៏ដោយសារតែអាមេរិកធ្លាប់បានបំផ្លាញចោលអស់ខ្លះផង។ នៅ ឆ្នាំ១៩៩០ អាមេរិកធ្លាប់មានក្បាលគ្រាប់នុយក្លេអ៊ែរដល់ទៅ ២២ ០០០ គ្រាប់ឯណោះ។ ប៉ុន្តែ អាមេរិក នៅទីបំផុត បានធ្វើកិច្ចព្រមព្រៀង មួយ ជាមួយ មហាអំនាចនុយក្លេអ៊ែររុស្ស៊ី ដែលបានយល់ព្រមផងដែរ កាត់បន្ថយចំនួនក្បាលនុយក្លេអ៊ែររបស់ខ្លួន ពីជាង ៣ម៉ឺន មកនៅត្រឹមតែជាង ៧ពាន់គ្រាប់វិញ។
ទោះបីជាកូរ៉េខាងជើង មិនអាចឈានទៅមានសមត្ថភាពនុយក្លេអ៊ែរយោធាស្មើអាមេរិក ប៉ុន្តែ គេមិនបដិសេធទេថា នៅរវាងតែបីឆ្នាំចុងក្រោយនេះ កម្មវិធីផលិតមីស៊ីល និងអាវុធនុយក្លេអ៊ែរបានបោះជំហានទៅមុខ លឿន គួរឲ្យកត់សំគាល់។ នៅថ្ងៃសុក្រម្សិលមិញ មីស៊ីលចម្ងាយមធ្យម របស់កូរ៉េខាងជើងបានបោះរំលងទឹកដីជប៉ុន មុននឹងទៅធ្លាក់នៅភាគខាងត្បូងកោះហុកកៃដូរបស់ជប៉ុន។ នេះជាលើកទី១ ដែលមីស៊ីលរបស់កូរ៉េខាងជើងហោះបានចម្ងាយឆ្ងាយ ដល់ទៅ ៣៧០០គីឡូម៉ែត្រ។ មួយវិញទៀត មីស៊ីលត្រូវបានបាញ់ពីជើងទ្រ នៅលើរថយន្ត។ មានន័យថា កូរ៉េខាងជើងមានសមត្ថភាពចល័តកន្លែងបាញ់មីស៊ីល ទៅកន្លែងណាក៏បាន គឺមិននៅជាប់ដី មួយកន្លែងដូចមុននោះទេ។
មេដឹកនាំកូរ៉េខាងជើង លោកគីម ជុងអ៊ុនបាននិយាយប្រាប់ទីភ្នាក់ងារព័ត៌មានរដ្ឋ KCNA ថា កូរ៉េខាងជើងបានជោគជ័យ ព្រោះថា មីស៊ីលដែល បាញ់ នៅថ្ងៃសុក្រ បានដល់ទិសដៅ គ្រោងទុក។ អាចនិយាយបានថា កូរ៉េខាងជើងមានមីស៊ីល ដែលខ្លួនកំណត់ឲ្យធ្លាក់នៅកន្លែងណាក៏បាន។ កន្លែងដែលមីស៊ីលកូរ៉េខាងជើងបានធ្លាក់ គឺស្ថិតនៅចម្ងាយប្រហាក់ប្រហែលគ្នា នឹងចម្ងាយពីកូរ៉េខាងជើងទៅកោះហ្គាំរបស់អាមេរិកនៅក្នុងមហាសមុទ្រប៉ាស៊ីហ្វិកដែរ។
ជម្រើសយោធារបស់អាមេរិក គឺមានរូបរាងត្រឹមជាសំដី ប៉ុន្តែ នឹងមិនអាចក្លាយជាការអនុវត្តជាក់ស្តែងនោះទេ។
នៅក្នុងសារTwitter លោកដូណាល់ ត្រាំ បាននិយាយសាជាថ្មីថា លោកកាន់តែជឿជាក់ថា ជម្រើសយោធា ត្រូវប្រើដើម្បីឆ្លើយតបនឹងការញុះញង់របស់កូរ៉េខាងជើង។ ទីប្រឹក្សារបស់ប្រធានាធិបតីខាងផ្នែកសន្តិសុខជាតិអាមេរិក លោកMcMaster ឯណោះវិញ បាននិយាយនៅថ្ងៃសុក្រម្សិលមិញថា ជម្រើសយោធា ត្រូវបានគេគិតគូរត្រៀមរួចស្រេចហើយ និងថា អំណត់ធ្មត់របស់អាមេរិកបានដល់ដែនដែលកំណត់ទុក បន្ទាប់ពីកូរ៉េខាងជើង បាញ់មីស៊ីល នៅថ្ងៃសុក្រ។
សង្រ្គាមនុយក្លេអ៊ែររវាងអាមេរិក និងកូរ៉េខាងជើងនឹងមិនអាចផ្ទុះឡើងបានទេដោយសារតែហេតុផលនយោបាយ ហើយនិងសេដ្ឋកិច្ច។ គិតទៅមើល បើសិនអាមេរិកវាយប្រហារយោធាទៅលើកូរ៉េខាងជើង តើនឹងមានអ្វីកើតឡើង? កូរ៉េខាងត្បូង និងជប៉ុនមុនគេ នឹងអាចរងការវាយប្រហារពីកូរ៉េខាងជើង។ រឿងនេះ គឺមិនអាចត្រូវកើតឡើងបានទេព្រោះ ថា ទីក្រុងសេអ៊ូល និងជប៉ុន គឺជាមជ្ឈមណ្ឌលពាណិជ្ជកម្ម ដែលមានជនបរទេសរាប់លាននាក់កំពុងធ្វើការ និងរស់នៅ។
អាមេរិកខំប្រឹងគំរាមកំហែងប្រើជម្រើសយោធា និងការដាក់ទណ្ឌកម្មសេដ្ឋកិច្ច ប៉ុន្តែ នយោបាយនេះ គឺគ្មានជោគជ័យ អាចដាក់គំនាបឲ្យកូរ៉េខាងជើងលះបង់កម្មវិធីផលិតមីស៊ីលនោះទេ។ ផ្ទុយទៅ វិញ ការគំរាម និងការដាក់ទណ្ឌកម្មសេដ្ឋកិច្ចពីក្រុមប្រឹក្សាសន្តិសុខគឺមានតែជំរុញឲ្យកូរ៉េខាងជើង ខំប្រឹងបង្កើនល្បឿនផលិតមីស៊ីល និងអាវុធនុយក្លេអ៊ែរខ្លាំងឡើងតែប៉ុណ្ណោះ។
កូរ៉េខាងជើងសម្ងំកេងពេលវេលា ដើម្បីបង្កើនថាមពល អំណាចនុយក្លេអ៊ែរ សម្រាប់ចរចា ស្មើភាពជាមួយអាមេរិក
គំរាមប្រើកម្លាំងយោធា ហើយនិងទណ្ឌកម្មគ្មានផ្តល់ផល ដាក់គំនាបឲ្យកូរ៉េខាងជើង លះបង់ចោល មហិច្ឆតាផលិតមីស៊ីល និងគ្រាប់បែកនុយក្លេអ៊ែរ។ នៅថ្ងៃសុក្រ ម្សិលមិញ ប្រធានាធិបតីរុស្ស៊ី ហើយនិងបារាំង បានរួមគ្នាឲ្យមានការចរចាដោយផ្ទាល់ ដើម្បីដោះស្រាយបញ្ហាដែលកាន់តែស្មុគស្មាញមួយនេះ។
ភាគីអាមេរិកឧស្សាហ៍លើកនិយាយពីការចរចាផ្លូវទូត ដើម្បីបន្ថយភាពតានតឹង ជាពិសេសនៅក្រោយកូរ៉េខាងជើង បាញ់សាកល្បងមីស៊ីល។ ប៉ុន្តែ ភាគីកូរ៉េខាងជើងមិនដែលឆ្លើយតបយ៉ាងណានោះទេ គឺគ្រាន់តែថា នៅចាំមើលឥរិយាបទរបស់អាមេរិកសិន។
នៅក្នុងអំឡុងពេលគ្មានសញ្ញាវិជ្ជមានពីខាងកូរ៉េខាងជើង យ៉ាងដូច្នេះ និងដោយសារតែកូរ៉េខាងជើងនៅបន្តបាញ់សាកល្បងមីស៊ីល អាមេរិកបានប្រើនយោបាយម្តងក្តៅ ម្តងត្រជាក់។ ត្រជាក់គឺបើកដៃស្វាគមឲ្យមានការចរចា ចំណែក ក្តៅ គឺប្រធានាធិបតីអាមេរិក លោកដូណាល់ ត្រាំ បានគំរាមប្រើជម្រើសយោធាដែលនឹងបង្កឲ្យភ្លើង ហើយនិងកំហឹងនៅកូរ៉េខាងជើង។ នៅក្នុងពេលដែលអាមេរិក ឆ្លេឆ្លា ខឹងសម្បារ កូរ៉េខាងជើងឯណោះវិញ នៅសម្ងំអភិវឌ្ឍសម្រួចសម្រាំងកម្មវិធីផលិតមីស៊ីល និងអាវុធនុយក្លេអ៊ែររបស់ខ្លួន។ ការសម្ងំរបស់កូរ៉េខាងជើង មិនមែនគ្មានន័យនោះទេ។ នៅថ្ងៃសៅរ៍នេះ លោកគីម ជុងអ៊ុនបានប្រាប់ទីភ្នាក់ងារព័ត៌មានរដ្ឋ កូរ៉េខាងជើង KCNA ថា កូរ៉េខាងជើងកំពុងស្ថិតនៅដំណាក់កាលចុងក្រោយ ជិតសម្រេចបានគោលដៅ ដើម្បីមានអាវុធនុយក្លេអ៊ែរហើយ។ លោកគីម ជុងអ៊ុនអះអាងថា ចង់ឲ្យកូរ៉េខាងជើងមាននុយក្លេអ៊ែរយោធា ស្មើនឹងអាមេរិក ពោលគឺដើម្បីកុំឲ្យអាមេរិកចេះតែគំរាមប្រើជម្រើសយោធា ដាក់កូរ៉េខាងជើងតទៅទៀត។
កន្លងមក កូរ៉េខាងជើងបានទាមទារឲ្យអាមេរិកបញ្ឈប់សមយុទ្ធយោធាជាមួយ កូរ៉េខាងជើង ដើម្បី ជាថ្នូរនឹងការបើកការចរចាដើម្បីឲ្យកូរ៉េខាងជើង ផ្អាកកម្មវិធីផលិតមីស៊ីល និងនុយក្លេអ៊ែរ។ ដំបូងគេគិតថា កូរ៉េខាងជើងមានចេតនាចង់ចរចាជាមួយអាមេរិក នៅក្នុងលក្ខខណ្ឌដ៏សាមញ្ញ គឺអាមេរិកត្រូវឈប់ធ្វើសមយុទ្ធ ដែលក្រុងព្យុងយ៉ាង ចាត់ទុកជាគម្រោងឈ្លានពានកូរ៉េខាងជើង។ ប៉ុន្តែ តាមការពិត ការទាមទាររបស់កូរ៉េខាងជើង គ្រាន់តែជាលេសដើម្បីពន្យារពេល ធ្វើឲ្យកូរ៉េខាងជើង អាចចំណេញពេល ដើម្បី ឆ្លៀតបង្កើនកម្លាំងសមត្ថភាពផលិតមីស៊ីល និងអាវុធនុយក្លេអ៊ែរតែប៉ុណ្ណោះ។ កូរ៉េខាងជើង នៅពេលនេះ គឺមិនដូចពេលមុនទេ។
កូរ៉េខាងជើង ពេលនេះ មានមីស៊ីលបាញ់ចំតាមគោលដៅកំណត់ និងអាចទៅដល់ទឹកដីរបស់អាមេរិក។ ចង់ ឬមិនចង់ កូរ៉េខាងជើងរបស់មេដឹកនាំវ័យតែជាង ៣០ឆ្នាំ ដែលមានអាវុធនុយក្លេអ៊ែរ ក្នុងដៃ អាចមានទឹកមាត់ មានទម្ងន់ ចរចា ទាមទារលក្ខខណ្ឌបានច្រើនណាស់ពីអាមេរិក និងប្រទេសជិតខាង។ ដល់ពេលដែលកូរ៉េខាងជើងសុខចិត្តឲ្យមានការចរចាដើម្បីបន្ធូរបន្ថយភាពតានតឹង គឺអាមេរិកឯណោះវិញទេ ដែលត្រូវពិបាក សម្រេចចិត្ត ព្រោះថា អាមេរិកនឹងអាចខាតបង់ ត្រូវលះបង់ ច្រើនទៅតាមការទាមទាររបស់កូរ៉េខាងជើង ដែលបានក្លាយពីកូនទាហានដ៏សាមញ្ញ មកក្លាយជាមេកន្រ្ទាញដ៏មានអំណាច និងគ្រោះថ្នាក់ម្នាក់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ