នាយករដ្ឋមន្ត្រីជប៉ុនគ្រោងរំលាយសភា និងរៀបចំការបោះឆ្នោតមុនអាណត្តិ
ចុះផ្សាយនៅថ្ងៃ៖
ស្តាប់ - ០៥:៥៩
សារព័ត៌មានក្នុងស្រុកជប៉ុនចុះផ្សាយនៅថ្ងៃអាទិត្យនេះ ថានាយករដ្ឋមន្ត្រីជប៉ុន ស្ហ៊ីនហ្សូ អាបេ គ្រោងនឹងរំលាយសភាជាន់ទាបចោល និងរៀបចំអោយជប៉ុនបោះឆ្នោតមុនអាណត្តិ ក្រោយមានអង្គប្រជុំថ្ងៃ២៨កញ្ញាខាងមុខនេះ។ ដូច្នេះ ជប៉ុននឹងធ្វើការបោះឆ្នោតមុនកាលកំនត់ ដល់ទៅជាងមួយឆ្នាំ។ គេមើលឃើញថា លោកអាបេ ចង់ឆ្លៀតចំណេញពីស្ថានការណ៍នយោបាយក្នុងស្រុក ចំពេលបក្សប្រឆាំងកំពុងជួបបញ្ហា ពិសេសពេលនេះ ប្រជាប្រិយភាពរបស់លោកបានឡើងខ្ពស់មកវិញ។
ការបោះឆ្នោតមុនអាណត្តិធ្វើមុនកាលកំណត់ដល់ទៅជាងមួយឆ្នាំ
តាមធម្មតា ការបោះឆ្នោតសភានៅជប៉ុន ត្រូវធ្វើនៅចុងឆ្នាំ២០១៨។ តាមព័ត៌មានមួយចំនួន ការបោះឆ្នោតមុនអាណត្តិដែលលោកអាបេ លើកឡើង អាចប្រព្រឹត្តទៅ នៅថ្ងៃ២២តុលាខាងមុខ។ តែក៏មានការលើកឡើងដែរថា អាចនឹងធ្វើនៅខែវិច្ឆិកាវិញ គឺក្រោយទស្សនកិច្ចរបស់ប្រធានាធិបតីអាមេរិក ដូណាល់ ត្រាំ នៅជប៉ុនចប់សព្វគ្រប់។ ពេលនេះ ការស្ទាបស្ទង់មតិមួយចំនួនបង្ហាញថា ប្រជាប្រិយភាពលោកអាបេ កំពុងលោតឡើងខ្ពស់មកវិញ គឺឡើងដល់ទៅ៥០ភាគរយ។ លោកអាបេមិនបណ្តោយអោយឱកាសនេះរំលងផុតទេ។ ត្រូវរៀបចំការបោះឆ្នោតអោយឆាប់ ដើម្បីទទួលបានជោគជ័យជាថ្មីម្តងទៀត។ នាយករដ្ឋមន្ត្រីជប៉ុនមានបទពិសោធនន៍ជូរចត់ក្រោយបរាជ័យ បោះឆ្នោតក្រុមប្រឹក្សាក្រុងតូក្យូ ខែកក្កដារួចហើយ។ ខែកក្កដា បក្សអភិរក្សរបស់លោកបានចាញ់ឆ្នោតនេះ បាត់បង់អាសនៈដល់ទៅជិតពាក់កណ្តាលឯណោះ។ ខែកក្កដា បក្សថ្មីស្រឡាងរបស់ ឈ្មោះថា Tokyo First របស់លោកស្រីយូរីកូ កូកេ ជាអភិបាលក្រុងតូក្យូ ជាអ្នកឈ្នះឆ្នោត។ ពេលនេះ លោកអាបេប្រាប់បក្សកូមេតុ ជាបក្សដៃគូនឹងបក្សកាន់អំណាចរួចហើយថា លោកគ្រោងរំលាយសភា និងរៀបចំការបោះឆ្នោតមុនអាណត្តិ ក្រោយអង្គប្រជុំចុងខែកញ្ញានេះ។
ការវិវត្តស្ថានការណ៍នយោបាយចុងក្រោយនេះ ជាប្រយោជន៍ដល់លោកអាបេក្នុងការបោះឆ្នោតមុនអាណត្តិ
ខែមិថុនា ឆ្នាំ២០១៧នេះ ប្រជាប្រិយភាពលោកអាបេដូចជានៅគ្រាន់បើដែរ គឺមាន៤៥ភាគរយ ប៉ុន្តែ ចូលខែកក្កដា ប្រជាប្រិយភាពលោកបានធ្លាក់ចុះខ្លាំង ដល់២៩,៩ភាគរយ មិនដល់៣០ភាគរយទេ។ បញ្ហាគឺដោយសាររឿងអាស្រូវ ចោទនាយករដ្ឋមន្ត្រីជប៉ុនថាប្រកាន់បក្សពួកនិយម រឺក៏ចង់រំលោភរដ្ឋធម្មនុញ្ញបង្កើនតួនាទីកងទ័ពនៅបរទេសជាដើម។
រឿងបក្សពួកនិយមនេះ ជាឧទាហរណ៍ជាក់ស្តែង គឺពាក់ព័ន្ធនឹងសាលារៀនឯកជនមួយ នៅជិតក្រុងអូសាកា ភាគខាងលិចប្រទេស។ ម្ចាស់សាលារៀនមួយនេះ ទិញដី ពីរដ្ឋដើម្បីសង់សាលារៀន ក្នុងតម្លៃថោក គឺថោកជាងតម្លៃដីតំបន់ ដល់ទៅជាង៨រយលានយេនឯណោះ។ ពោលគឺរដ្ឋលក់ដីអោយម្ចាស់សាលានោះ តែ១៣៤លានយេន ខណៈថ្លៃដីមួយដុំនោះ ត្រូវមានខ្ពស់ដល់ទៅ៩៥៦លានយេន។ រដ្ឋអះអាងថា លក់ថោកដូច្នេះ ជាថ្នូរអោយម្ចាស់សាលា បោសសម្អាតកំទេចសំណ និងអាសេនិក ចេញអោយអស់ពីដីសិន។ ប៉ុន្តែ បក្សប្រឆាំងចោទថា ការបោសសម្អាតកំទេចកំទីទាំងអស់នេះ ធ្វើបានតែមួយចំណែកទេ មិនគោរពតាមលក្ខខណ្ឌទេ។ នាយករដ្ឋមន្ត្រីជប៉ុនអាបេ និងភរិយា ជាប់ពាក់ព័ន្ធជិតដិតនឹងគម្រោងមួយនេះ។
នេះមួយរឿង នៅមានរឿងមួយទៀត គឺរឿងពាក់ព័ន្ធនឹងកងកម្លាំងស្វ័យការពារជប៉ុន នៅស៊ូដង់ខាងត្បូង។ រឿងអាស្រូវនេះធ្វើអោយអតីតរដ្ឋមន្ត្រីការពារជាតិ គឺលោកស្រី តូម៉ូមី អ៊ីណាដា ជាជំនិតនឹងលោកអាប លាតំណែង កាលពីចុងខែកក្កដា។ រឿងនេះគឺពាក់ព័ន្ធនឹងការសង្ស័យថា មានការលួចលាក់ព័ត៌មានទាក់ទងនឹងបសកកម្មទ័ពស្វ័យការពារជប៉ុននៅស៊ូដង់ខាងត្បូង។ ជប៉ុនបានធ្វើការស៊ើបអង្កេតរឿងនេះ។ រឿងនេះគឺកើតឡើង កាលពីខែធ្នូ ឆ្នាំ២០១៦ កាលនោះ ក្រសួងការពារជាតិប្រកាសថា បាត់ឯកសារស្តីពីសកម្មភាព ជាប្រចាំរបស់កងទ័ពមួយនេះ នៅខែកក្កដា។ ប៉ុន្តែខែកក្កដា ឆ្នាំមុននេះ ស៊ូដង់ខាងត្បូងកំពុងមានជម្លោះប្រយុទ្ធសម្លាប់មនុស្សរាប់រយនាក់។ អញ្ចឹង គេសួរថា តើជប៉ុនមានពង្រាយកងទ័ពស្វ័យទាំងនេះ នៅតំបន់ជម្លោះនោះទេ។ បើមាន គឺថា វាប៉ះពាល់នយោបាយជប៉ុនហើយ។វារឹតតែធ្វើអោយប្រជាប្រិយភាពលោកអាបេធ្លាក់ចុះ ព្រោះថា លោកអាបេរងការរិះគន់ខ្លាំងណាស់ដោយសារតែលោកចង់ពង្រីកតួនាទីកងទ័ពនៅក្រៅប្រទេស។
និយាយជារួម រឿងបក្សពួកនិយម បូករួមនឹងមហិច្ឆតាយោធាជប៉ុននៅក្រៅប្រទេសធ្វើអោយប្រជាប្រិយភាពលោកអាបេ ធ្លាក់ចុះដុនដាបខ្លាំង ក្នុងខែកក្កដា។ ដោយសារចង់ស្តារមុខមាត់រដ្ឋាភិបាលនិងបក្សកាន់អំណាចឡើងវិញ ស្តារប្រជាប្រិយភាពឡើងវិញ លោកអាបេបានផ្លាស់ប្តូរសមាជិកក្រុមការងាររដ្ឋាភិបាល។ លោកអាបេហ៊ានរហូតតែងតាំងសមាជិកជាគូប្រជែងរបស់លោកក្នុងបក្សកាន់អំណាច អោយចូលកាន់កាប់មុខងារសំខាន់ៗ។ ដូច្នេះ លោកអាចក្តាប់ទាំងគូប្រជែង និងក្តាប់ទាំងនយោបាយរដ្ឋាភិបាល។
ប៉ុន្តែ ប្រជាប្រិយភាពនាយករដ្ឋមន្ត្រីជប៉ុនបានឡើងខ្ពស់មកវិញពេលនេះ ដោយសារតែប្រជាជនជប៉ុនកំពុងបារម្ភពីស្ថានការណ៍តានតឹងបង្កឡើងដោយកូរ៉េខាងជើង។ កូរ៉េខាងជើងបាញ់មីស៊ីលបន្តបន្ទាប់ ពិសេសកាលពីចុងខែសីហា បានបាញ់មីស៊ីលរំលងទឹកដីជប៉ុន ធ្វើអោយជប៉ុនប្រកាសសញ្ញាអាសន្នប្រាប់ប្រជាជនអោយប្រុងប្រយ័ត្ន។ ក្រុងព្យុងយ៉ាងថែមទាំងសាកល្បងគ្រាប់បែកអ៊ីដ្រូសែន ហើយពេលនេះ លោកគឺម ជុងអ៊ុន ប្រកាសថាកម្មវិធីនុយក្លេអ៊ែរជិតបានជោគជ័យទៀត។ ជនជាតិជប៉ុនចង់មិនចង់ ត្រូវដើរតាមគំនិតអភិរក្សាការពារជាតិ ពង្រីកតួនាទីកងទ័ពរបស់លោកអាបេដែរ ទើបអាចប្រឈមកូរ៉េខាងជើងកើត ព្រោះបើកូរ៉េខាងជើងវាយប្រហារគឺ ជប៉ុននៅក្បែរកូរ៉េជាងគេ ច្បាស់ជារងគ្រោះធ្ងន់ហើយ អាមេរិកជួយមិនទាន់ទេ។ ស្ថានការណ៍កូរ៉េខាងជើង ធ្វើអោយលោកអាបេទាញចំណេញច្រើន នេះនៅមិននិយាយពីបក្សប្រឆាំង ដែលកំពុងច្របូកច្របល់ ដោយសារផ្លាស់ប្តូរការមេដឺកនាំថ្មីៗនេះផង។
ដូច្នេះ ការរៀបចំការបោះឆ្នោតមុនអាណត្តិពេលនេះ អាចជួយបក្សអភិរក្សកាន់អំណាចអោយជោគជ័យបាន។ បទពិសោធន៍បោះឆ្នោតមុនអាណត្តិនេះ លោកអាបេធ្លាប់ធ្វើម្តងហើយ គឺកាលពីចុងឆ្នាំ២០១៤។ កាលនោះ លោកអាបេក៏ឆ្លៀតចំណេញនយោបាយ ដោយសារការបែកបាក់ក្នុងបក្សប្រឆាំងដូចគ្នាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ