វិបត្តិនុយក្លេអ៊ែរកូរ៉េខាងជើង៖ ចិន និងរុស្ស៊ីមានឯកភាពគ្នាជាធ្លុងមួយ
ប្រមុខការបរទេសចិន និងរុស្ស៊ី អំពាវនាវឲ្យគេបិទបញ្ចប់វិបត្តិរ៉ាំរ៉ៃ កូរ៉េខាងជើង។ នៅក្នុងជំនួបទ្វេភាគីនៅទីក្រុងញូវយ៉ក ដែលធ្វើឡើងនៅក្រៅក្របខ័ណ្ឌ កិច្ចប្រជុំមហាសន្និបាតអង្គការសហប្រជាជាតិ រដ្ឋមន្រ្តីការបរទេសចិន និងរុស្ស៊ីបានឯកភាពគ្នា ទាមទារឲ្យមានការដោះស្រាយ បញ្ហាកូរ៉េខាងជើង តាមផ្លូវសន្តិភាព។ នេះបើតាមសេចក្តីប្រកាសព័ត៌មានរបស់ក្រសួងការបរទេសចិន នៅថ្ងៃអង្គារទី ១៩ កញ្ញា ២០១៧។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
“បញ្ហានុយក្លេអ៊ែរនៅឧបទ្វីបកូរ៉េត្រូវដោះស្រាយតាមផ្លូវសន្តិភាព” នេះជាប្រសាសន៍របស់រដ្ឋមន្រ្តីការបរទេសចិន លោកវ៉ាង យី នៅក្នុងជំនួបជាមួយរដ្ឋមន្រ្តីការបរទេសរុស្ស៊ី លោក ស៊ែហ្គេ ឡាវរ៉ូវ នៅថ្ងៃ ចន្ទម្សិលមិញ នៅទីក្រុងញូវយ៉ក។ តាមប្រមុខការបរទេសចិន ការស្តារឲ្យមានការចរចា សន្តិភាព គឺជាជំហានចាំបាច់ ដែលត្រូវមាននៅក្នុងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។
សម្រាប់លោកវ៉ាង យី គេត្រូវតែបំបាត់ចោលទៅ រង្វង់ដ៏កាចសាហាវ។ នៅក្នុងន័យនេះ រដ្ឋមន្រ្តីការបរទេសចិន ហាក់ចង់សំដៅទៅដល់ការដាក់ទណ្ឌកម្មសេដ្ឋកិច្ច និងការគំរាមកំហែងប្រើកម្លាំងយោធា ទៅលើកូរ៉េខាងជើង ដែលរហូតមកដល់ពេលនេះ មិនបានហុចផលជាផ្លែផ្កា ប៉ុន្តែ មានតែជំរុញឲ្យកូរ៉េខាងជើង កាន់តែបន្ត បង្កើនសមត្ថភាពអភិវឌ្ឍ ផលិតមីស៊ីល និងគ្រាប់បែកនុយក្លេអ៊ែរ។
នៅក្នុងសេចក្តីថ្លែងការណ៍របស់ក្រសួងការបរទេសចិន ប្រមុខការបរទេសរុស្ស៊ី លោកស៊ែហ្គេ ឡាវរ៉ូវបានបង្ហាញជំហរ យល់ស្របទាំងស្រុងជាមួយចិន ដែលបានទាមទារឲ្យមានការផ្អាកសកម្មភាពផលិតមីស៊ីល និងអាវុធនុយក្លេអ៊ែររបស់កូរ៉េខាងជើង ជាថ្នូរ នឹងការបញ្ឈប់ជាបន្ទាន់សមយុទ្ធយោធារបស់អាមេរិក នៅក្នុងតំបន់ឧបទ្វីបកូរ៉េ។
សេចក្តីថ្លែងការណ៍របស់ក្រសួងការបរទេសចិន បានបង្ហាញឲ្យឃើញពីជំហររួមគ្នារវាងចិន និងរុស្ស៊ី ដែលចង់ឲ្យមានការចរចាសន្តិភាព ដើម្បីដោះស្រាយបញ្ហានុយក្លេអ៊ែររបស់កូរ៉េខាងជើង។ ប៉ុន្តែ សេតវិមានឯណោះវិញ បានលើកនិយាយពីជំហររបស់ចិន ដែលបានសន្យាដាក់សម្ពាធជាអតិបរមាទៅលើកូរ៉េខាងជើង។ នៅក្នុងកិច្ចសន្ទនាតាមទូរស័ព្ទ ជាមួយ លោកដូណាល់ ត្រាំ នៅថ្ងៃចន្ទ ម្សិលមិញ ប្រធានាធិបតី ចិន លោកស៊ី ជីនពីង បានព្រមព្រៀងជាមួយប្រធានាធិបតី អាមេរិក ថា នឹងអនុវត្តឲ្យបានតឹងរ៉ឹងបំផុត សេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលមានចែងពីការដាក់ទណ្ឌកម្មសេដ្ឋកិច្ច ក្នុងគោលដៅ ដាក់សម្ពាធលើកូរ៉េខាងជើង ឲ្យលះបង់ចោល មហិច្ឆតាផលិតអាវុធនុយក្លេអ៊ែរ។
នៅក្នុងសេចក្តីថ្លែងការណ៍របស់ ក្រសួងការបរទេសកូរ៉េខាងជើង ក្រុងព្យុងយ៉ាងបានលើកឡើងថា ទណ្ឌកម្មសេដ្ឋកិច្ចរបស់ក្រុមប្រឹក្សាសន្តិសុខ សាហាវ អសីលធម៌ និងអមនុស្សធម៌ ដែលរឹតតែជំរុញ ឲ្យកូរ៉េខាងជើង បង្កើនល្បឿន ក្នុងកម្មវិធីនុយក្លេអ៊ែរយោធា។ នៅថ្ងៃចន្ទម្សិលមិញដែរ អាមេរិក ដែលបានគំរាមប្រើជម្រើសយោធា តបនឹងការផ្គើនបាញ់សាកល្បងមីស៊ីលរបស់កូរ៉េខាងជើង បានបញ្ជូនយន្តហោះចម្បាំង៤គ្រឿង ហើយនិងយន្តហោះទម្លាក់គ្រាប់បែក ពីរគ្រឿង ឲ្យទៅហោះពីលើឧបទ្វីបកូរ៉េ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ