មន្ទីរបញ្ចកោណនិងអង្គការអូតង់បញ្ជាក់សារជាថ្មីកិច្ចសន្យាគាំទ្ររបស់ខ្លួនចំពោះអាហ្វហ្កានីស្ថាន
រដ្ឋមន្ត្រីក្រសួងការពារជាតិអាមេរិកលោក Jim Mattis និងលោក Jens Stoltenberg អគ្គលេខាធិការអង្គការអូតង់ បានជួបប្រាស្រ័យគ្នានៅថ្ងៃពុធ ទី ២៧ កញ្ញា ម្សិលមិញនៅទីក្រុងកាប៊ូល ជាមួយនឹងអាជ្ញាធរអាហ្វហ្កានីស្ថាន បន្ទាប់ពី បានជូនដំណឹងអំពីជំនួយកងទ័ព អាមេរិកចំនួន ៣០០០ នាក់ជាបន្ថែមទៀតទៅកាន់អាហ្វហ្កានីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
សហរដ្ឋអាមេរិកដែលបច្ចុប្បន្ន មានកងទ័ពខ្លួនចំនួន ១ម៉ឺន១០០០ នាក់ ដាក់ពង្រាយនៅអាហ្វហ្កានីស្ថាន បានអំពាវនាវអង្គការអូតង់ ឲ្យបញ្ជូនជំនួយកងទ័ពរបស់ខ្លួនជាបន្ថែមទៀត ដើម្បីទៅជួយប្រទេសអាហ្វហ្កានីស្ថានដែលកំពុងរងគ្រោះដោយការសាបព្រោះអំពើហិង្សាពីសំណាក់ ពួកតាលីបង់និងអង្គការរដ្ឋអ៊ីស្លាមជីហាត។ ក្នុងពេលបច្ចុប្បន្ននេះ អង្គការអូតង់ មានទ័ពចំនួន ៥០០០ នាក់ហើយដែលធ្វើប្រតិបត្តិការនៅក្នុងប្រទេសអាហ្វហ្កានីស្ថាន។
នៅក្នុងដំណើរទស្សនកិច្ចជាលើកទី ២នៅទីក្រុងកាប៊ូល លោក Mattis បានអញ្ជើញទៅដល់រដ្ឋធានីអាហ្វហ្កានីស្ថាននៅថ្ងៃពុធម្សិលមិញ ដោយចេញមកប្រទេសឥណ្ឌា។ នៅពេលដែលយន្តហោះដឹកលោក Mattis បានចុះចតដល់ដីភ្លាម គ្រាប់រ៉ុកកែតចំនួន ៦ គ្រាប់ ត្រូវបានបាញ់ផ្លោងនៅក្បែរព្រលានយន្តហោះអន្តរជាតិក្រុងកាប៊ូល ជាហេតុបណ្តាលឲ្យមានស្លាប់ជនស៊ីវីលម្នាក់និងរងរបួសជនចំនួន៤នាក់ផ្សេងទៀត។ លោក Mattis បានប្រតិកម្មបរិហារភ្លាមៗថា “ការបាញ់ផ្លោងគ្រាប់ ប្រឆាំងនឹងព្រលានយន្តហោះនេះ ក៏ដូចជាយន្តហោះអន្តរជាតិណាមួយក្តី គឺជាអំពើឧក្រឹដ្ឋកម្មប្រឆាំងនឹងប្រជាជនស្លូតត្រង់”។
ចំណែក ពួកឧទ្ទាមអ៊ីស្លាមជ្រុលនិយមតាលីបង់ វិញ បានប្រកាសដែរថា ការវាយប្រហារដោយរ៉ុកកែតនោះ ជាស្នាដៃរបស់ក្រុមខ្លួន ដែលចង់សំដៅប្រឆាំងទៅលើយន្តហោះដឹករដ្ឋមន្ត្រីការពារជាតិអាមេរិក-នេះបើយោងតាមរសារមួយរបស់ពួកតាលីបង់ដែលសរសេរនៅលើ Twitter។
ចំណែក អ្នកនាំពាក្យនៃក្រសួងការពារជាតិអាមេរិកវិញ បានជូនដំណឹងដែរថា “ជនឈ្លានពាន ចំនួន៣នាក់ត្រូវបានចាប់ខ្លួន” ។
លោក Mattis និងអគ្គលេខាធិការអង្គការអូតង់លោក Stoltenberg ក៏បានជួបប្រាស្រ័យគ្នាជាបន្ទាន់ដែរជាមួយនឹងប្រធានាធិបតីអាហ្វហ្កានីស្ថាន ពីព្រោះនាបច្ចប្បន្ននេះ រដ្ឋាភិបាលនិងកងកម្លាំងសន្តិសុខរបស់អាហ្វហ្កានីស្ថាន កំពុងតែត្រូវរងសម្ពាធយ៉ាងធ្ងន់ធ្ងរពីសំណាក់ពួកតាលីបង់និងក្រុមអង្គការរដ្ឋអ៊ីស្លាមដែលកំពុងបង្កអំពើហិង្សានៅក្នុងភាគខាងកើតនិងខាងជើងអាហ្វហ្កានីស្ថាន។
ចំណែកក្រសួងការពារជាតិអាមេរិកវិញ បន្ទាប់មកក៏បានជូនដំណឹងដែរថា កងទ័ពរបស់អាមេរិក ៣០០០នាក់ ជាបន្ថែមទៀត នឹងត្រូវដាក់ពង្រាយជាបន្ថែមទៀតនៅក្នុងប្រទេសអាហ្វហ្កានីស្ថានដែលនៅ ក្នុងចំណោមនោះ កងទ័ពអាមរិកមួយចំនួន បានចេញដំណើរបណ្តើរៗទៅហើយ ។ ក្រសួងការពារជាតិអាមេរិក ក៏ បានអំពាវនាវផងដែរសុំអោយប្រទេសសម្ព័ន្ធរបស់ខ្លួនដែលជាសមាជិករបស់អង្គការអូតង់ ឲ្យយកតម្រាប់តាមខ្លួនដោយខិតខំបង្កើនចំនួនកងទ័ពរបស់ខ្លួនជាច្រើនថែមទៀតដើម្បីជួយដល់ប្រទេសអាហ្វហ្កានីស្ថាននៅក្នុងការវាយកំទេចពួកអ៊ីស្លាមជ្រុលនិយមតាលីបង់និងអង្គការរដ្ឋអ៊ីស្លាមជីហាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ