ក្រុងអក់ស្វឺតសម្រេចដករង្វាន់សេរីភាពពីលោកស្រី អ៊ុងសាន ស៊ូជី
ការគ្រប់គ្រង និងដោះស្រាយមិនត្រឹមត្រូវវិបត្តិជនភាគតិច រ៉ូហ៊ីងយ៉ាបានធ្វើឲ្យលោកស្រី អ៊ុងសាន ស៊ូជី មេដឹកនាំរដ្ឋាភិបាលស៊ីវិលភូមា បាត់បង់រង្វាន់សេរីភាព ដែលលោកស្រីបានទទួល កាលពី២០ឆ្នាំ មុន ពីទីក្រុងអក់ស្វឺត របស់ប្រទេសអង់គ្លេស។ តាមចុះផ្សាយយ៉ាងព្រោងព្រាត របស់បណ្តាញសារព័ត៌មានអង់គ្លេស ក្រុមប្រឹក្សាក្រុងអក់ស្វឺត បានជួបប្រជុំ នៅថ្ងៃចន្ទដើមសប្តាហ៍នេះ ដើម្បី សម្រេចដករង្វាន់សេរីភាពពីលោកស្រីអ៊ុងសាន ស៊ូជី។
ចុះផ្សាយនៅថ្ងៃ៖
សកម្មភាពតស៊ូដ៏ស្វិតស្វាញរបស់លោកស្រី ស៊ូជី នៅទសវត្សរ៍ ឆ្នាំ ១៩៩០ ដើម្បីប្រឆាំងនឹងអំណាចផ្តាច់ការរបស់របបសឹកភូមា បានធ្វើឲ្យលោកស្រីស៊ូជីបានការទទួលស្គាល់ និងកោតសរសើរពីសហគមន៍អន្តរជាតិ។ នៅឆ្នាំ ១៩៩៧ ទីក្រុងអក់ស្វឺតរបស់អង់គ្លេស បានប្រកាសផ្តល់ពានរង្វាន់សេរីភាព ឬ « Freedom of Oxford » សម្រាប់លោកស្រីអ៊ុងសាន ស៊ូជី ក្នុងការដែលលោកស្រីបានតស៊ូ ដើម្បីសិទ្ធិសេរីភាព និងលទ្ធិប្រជាធិបតេយ្យ។ ប៉ុន្តែ នៅ២០ឆ្នាំក្រោយ ក្រុងអក់ស្វឺតដដែល បានសម្រេចដកពានរង្វាន់ដ៏កិត្តិយសនេះ ពីលោកស្រីអ៊ុងសាន ស៊ូជី មកវិញ ក្នុងហេតុផលថា លោកស្រីស៊ូជី ដោះស្រាយមិនបានល្អ វិបត្តិជនជាតិរ៉ូហ៊ីងយ៉ា។
នៅថ្ងៃចន្ទដើមសប្តាហ៍នេះ ក្រុមប្រឹក្សាក្រុងអក់ស្វឺត ដែលសំដែងការព្រួយបារម្ភពីស្ថានភាពអត្តខាត់របស់ជនជាតិរ៉ូហ៊ីងយ៉ា បានបោះឆ្នោត ជាឯកច្ឆន្ទ សម្រេចឲ្យគេដកពានរង្វាន់សេរីភាពពីលោកស្រីអ៊ុងសាន ស៊ូជី។ នេះបើតាមទីភ្នាក់ងារព័ត៌មានអង់គ្លេស Reuters។
នៅក្នុងសេចក្តីសម្រេចរបស់ក្រុមប្រឹក្សាក្រុង អក់ស្វឺត គេបានសរសេរថា លោកស្រីអ៊ុងសាន ស៊ូជីមិនសក្តិសមនឹងធ្វើជាម្ចាស់ពានរង្វាន់សេរីភាពរបស់ក្រុងតទៅទៀតទេ។ Mary Clarkson សមាជិកក្រុមប្រឹក្សាក្រុង បានសរសេរនៅក្នុងសុន្ទរកថា ថ្លែងនៅថ្ងៃចន្ទថា កិត្តិនាមរបស់ក្រុងអក់ស្វឺតកំពុងត្រូវប្រលាក់ ខូចខាត ដោយសារតែបានផ្តល់រង្វាន់ដល់អ្នកដែលបិទភ្នែក បណ្តោយឲ្យកើតមានអំពើហិង្សា។
កាលនៅជាប់ឃុំ ក្នុងគេហដ្ឋាន នៅក្នុងរបបសឹកភូមា លោកស្រីអ៊ុងសាន ស៊ូជី ធ្លាប់ស្រែកទាមទារសេរីភាព និងប្រឆាំងរាល់អំពើរំលោភ ហិង្សា គ្រប់រូបភាព។ ប៉ុន្តែ នៅប៉ុន្មានខែចុងក្រោយនេះ ជ័យលាភីណូបែលសន្តិភាព និងសកម្មជនការពារសិទ្ធិមនុស្ស លោកស្រីអ៊ុងសាន ស៊ូជី ត្រូវបានថ្នាក់ដឹកនាំបរទេស និងអង្គការសហប្រជាជាតិ រិះគន់បរិហារ ដោយសារតែអសកម្មភាព មិនអាចបញ្ឈប់ អំពើហិង្សា ប្រព្រឹត្តទៅលើជនជាតិភាគតិចរូហ៊ីងយ៉ា។
តាំងពីពាក់កណ្តាលខែ សីហា ជនជាតិរ៉ូហ៊ីងយ៉ា ប្រមាណ ៤សែននាក់ បានរត់ភៀសខ្លួនពីអំពើហិង្សា នៅរដ្ឋរ៉ាឃីន។ អង្គការសហប្រជាជាតិបានលើកឡើងពីការបោសសម្អាតជាតិសាសន៍ នៅភូមា។ ប៉ុន្តែ នៅក្នុងពេលថ្លែងសង្កថា នៅចុងខែកញ្ញាកន្លងទៅ លោកស្រី អ៊ុងសាន ស៊ូជី មិនបាននិយាយពីការបោសសម្អាតជនជាតិភាគតិច ឬថ្កោលទោសពួកយោធាភូមា ដែលប្រជាជនរ៉ូហ៊ីងយ៉ា ចោទប្រកាន់ថា ជាអ្នកប្រព្រឹត្តអំពើហិង្សាដុតផ្ទះសម្បែង រហូតធ្វើឲ្យពួកគេរត់ទៅបង់ក្លាដែស។ ជំហររបស់លោកស្រីបានធ្វើឲ្យគេគិតថា លោកស្រីអ៊ុងសាន ស៊ូជី កំពុងតែលាយច្របល់ចូលគ្នា រវាង ការមិនពិត ហើយនិងទំលាក់កំហុសទៅលើជនរងគ្រោះ ដូចដែលប្រធានអង្គការការពារសិទ្ធិមនុស្សAmnesty International បានលើកឡើង។
នៅសប្តាហ៍មុន នៅមុនការប្រកាសដកពានរង្វាន់ពីក្រុងអក់ស្វឺត ទៅទៀត សកលវិទ្យាល័យ អក់ស្វឺត ដែលធ្លាប់តែបានប្រគល់សញ្ញាប័ត្រកិត្តិយសដល់លោកស្រីអ៊ុងសាន ស៊ូជី នៅឆ្នាំ ២០១២ បានសម្រេច ដករូបថតលោកស្រីស៊ូជីចេញពីតារាងជនល្បីៗឈ្មោះ របស់សាលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ