គីម ជុងអ៊ុន៖នុយក្លេអ៊ែររបស់កូរ៉េខាងជើងជួយធានាសន្តិភាព និងសន្តិសុខ នៅក្នុងតំបន់
ចុះផ្សាយនៅថ្ងៃ៖
ស្តាប់ - ០៦:៥៣
លោកគីម ជុងអ៊ុន នៅថ្ងៃសៅរ៍ទី៧ តុលា បានលើកឡើងពីសមត្ថភាពនៃអាវុធនុយក្លេអ៊ែររបស់កូរ៉េខាងជើង ក្នុងការទប់ស្កាត់កុំឲ្យមានផ្ទុះសង្រ្គាមនុយក្លេអ៊ែរ។ នៅក្នុងកិច្ចប្រជុំគណៈអចិន្ត្រៃយ៍ បក្សកុម្មុយនិស្ត លោកគីម ជុងអ៊ុនអួតសរសើរផងដែរ កម្មវិធីនយោបាយដែលលោកបានចាប់អនុត្តន៍ តាំងពីចូលកាន់តំណែងជាមេដឹកនាំកូរ៉េខាងជើង។ សម្រាប់លោកគីម ជុងអ៊ុន មនោគមវិជ្ជាអភិវឌ្ឍសេដ្ឋកិច្ច ស្របទិសគ្នា ជាមួយ នឹងការអភិវឌ្ឍ ផលិតអាវុធនុយក្លេអ៊ែរ គឺជាយុទ្ធសាស្រ្តនយោបាយ ដ៏ត្រឹមត្រូវ និងឆ្លើយតប ទៅនឹងកាលៈទេសៈ បច្ចុប្បន្ន។ នេះបើតាមការចុះផ្សាយរបស់បណ្តាញព័ត៌មានផ្លូវរដ្ឋ កូរ៉េខាងជើងនៅថ្ងៃអាទិត្យនេះ។
នៅក្នុងកិច្ចប្រជុំគណៈអចិន្រ្តៃយ៍បក្សពលករ នៅថ្ងៃសៅរ៍ ម្សិលមិញ មេដឹកនាំកូរ៉េខាងជើង លោកគីម ជុងអ៊ុន បាននិយាយថា អាវុធនុយក្លេអ៊ែររបស់កូរ៉េខាងជើង មានសមត្ថភាព ទប់ស្កាត់កុំឲ្យកើតផ្ទុះមានសង្រ្គាមនុយក្លេអ៊ែរ។
មេដឹកនាំកូរ៉េខាងជើង លោកគីម ជុងអ៊ុនបាននិយាយថា អាវុធនុយក្លេអ៊ែររបស់កូរ៉េខាងជើងនឹងជួយធានាការពារសន្តិភាព និងសន្តិសុខ នៅឧបទ្វីបកូរ៉េ ហើយនិងនៅក្នុងតំបន់។ អំណះអំណាងនេះ អាចសមហេតុផល នៅត្រង់ថា នៅពេលដែលកូរ៉េខាងជើង មានអាវុធនុយក្លេអ៊ែរនៅក្នុងដៃ នោះ កូរ៉េខាងជើងនឹងមិនអាចរងការគំរាមកំហែងផ្តេសផ្តាស ឬការឈ្លានពានធ្វើសង្រ្គាមពីប្រទេសណាមួយទេ។ មានអាវុធ នុយក្លេអ៊ែរ នៅក្នុងដៃ កូរ៉េខាងជើងក្លាយជាមហាអំណាចនុយក្លេអ៊ែរ ដែលគេត្រូវគោរពកោតខ្លាច មិនមើលស្រាលដូចមុន។ អាចនិយាយបានថា គេត្រូវគិតគូរ ល្អិតល្អន់ ខ្លាំងណាស់ មុននឹងសម្រេចចិត្ត វាយប្រហារទៅលើ ប្រទេសដែលមានអាវុធនុយក្លេអ៊ែរ ឬប្រទេសដែលជួយគាំទ្រដោយមហាអំណាចនុយក្លេអ៊ែរ។ គេពិចារណាថ្លឹងថ្លែង ខ្លាំង ព្រោះថា បើកើតផ្ទុះសង្រ្គាមរវាងប្រទេសមានអាវុធនុយក្លេអ៊ែរ នោះផលវិបាក បាត់បង់ជីវិតមនុស្ស ហើយនិងសេដ្ឋកិច្ច គឺធំធេងណាស់ សម្រាប់គ្រប់ភាគីជម្លោះ។ អីចឹងហើយ បានជាតាំងពីសង្រ្គាមត្រជាក់ មកម្ល៉េះ អាវុធនុយក្លេអ៊ែររបស់អាមេរិកក្តី ឬរបស់រុស្ស៊ីក្តី ត្រូវបានគេប្រើប្រាស់ជាមធ្យោបាយ សម្រាប់ទប់ស្កាត់ កុំឲ្យកើតផ្ទុះសង្រ្គាមនុយក្លេអ៊ែរ។
បទពិសោធន៍កន្លងមក គ្រាប់បែកនុយក្លេអ៊ែរ មិនដែលត្រូវបានគេប្រើម្តងនោះទេ នោះបើទោះបីជាកើតផ្ទុះមានជម្លោះប្រដាប់អាវុធ ឬភាពតានតឹងរវាងភាគីជម្លោះក្តី។ ជាក់ស្តែង ឥណ្ឌា និងប៉ាគីស្ថានសុទ្ធតែមានអាវុធនុយក្លេអ៊ែររៀងៗខ្លួន ប៉ុន្តែ បើទោះបីជាប្រទេសទាំងពីរ ជាសត្រូវ និងឧស្សាហ៍ឈ្លោះគ្នា នៅតាមព្រំដែន ប៉ុន្តែ ឥណ្ឌា និងប៉ាគីស្ថានមិនបានអាវុធនុយក្លេអ៊ែរ ដើម្បីសម្លាប់ប្រល័យគ្នាទៅវិញ ទៅមកដែរ។
មានអាវុធនុយក្លេអ៊ែរ ដើម្បីទប់ស្កាត់កុំឲ្យមានផ្ទុះសង្រ្គាមនុយក្លេអ៊ែរ នេះជាអំណះអំណាងដែលប្រទេសមហាអំណាចនុយក្លេអ៊ែរ បានលើកឡើងរហូតមក ប៉ុន្តែ សម្រាប់អ្នកដែលប្រឆាំងមិនឲ្យមានអាវុធប្រល័យលោកវិញ អាវុធនុយក្លេអ៊ែរ គឺមានតែទៅជំរុញ ឲ្យមានការរីកសាយភាយ នៃការផលិតអាវុធនុយក្លេអ៊ែរ ដែលគ្រោះថ្នាក់ កាន់តែខ្លាំង សម្រាប់ជីវិតរស់រាន នៅលើផែនដី។
លោកដូណាល់ ត្រាំ៖ ជម្រើសមានតែមួយ ជាមួយកូរ៉េខាងជើង
នៅថ្ងៃសៅរ៍ ម្សិលមិញ ប្រធានាធិបតីអាមេរិក លោកដូណាល់ ត្រាំ បានសរសេរ នៅក្នុងសារTwitterថា ជម្រើសសម្រាប់ដោះស្រាយជាមួយកូរ៉េខាងជើងមានតែមួយប៉ុណ្ណោះ។ ជម្រើសរបស់លោកដូណាល់ ត្រាំ គឺអាចជាជម្រើសយោធា ព្រោះសម្រាប់ លោកដូណាល់ ត្រាំ យុទ្ធសាស្រ្ត ចរចាការទូត បានបរាជ័យរហូតមក។ នៅក្នុងសារTwitter លោកបានសរសេររិះគន់ មេដឹកនាំអាមេរិកមុនៗថា អសមត្ថភាព មិនអាចដោះស្រាយ វិបត្តិនុយក្លេអ៊ែរកូរ៉េខាងជើង។ លោកដូណាល់ ត្រាំ មិនបាននិយាយថា ជម្រើសតែមួយដើម្បីដោះស្រាយជាមួយកូរ៉េខាងជើង នោះជាអ្វីទេ គឺលោកបានប្រាប់ឲ្យគេរង់ចាំមើលតទៅទៀត។ ប៉ុន្តែ យ៉ាងណាក៏ដោយ មហាសេដ្ឋីអចលនទ្រព្យរូបនេះ បាននិយាយថា លោកមិនចង់បរាជ័យ ដូចមេដឹកនាំអាមេរិកមុនៗនោះទេ។ សំដីនេះធ្វើឲ្យគេរឹតតែជឿថា លោកដូណាល់ ត្រាំ នឹងជ្រើសរើសយកផ្លូវយោធា ដើម្បី ដោះស្រាយជាមួយកូរ៉េខាងជើង។
សមាជិកសភា រុស្ស៊ី៖កូរ៉េខាងជើង នឹងបាញ់សាកល្បង ជាថ្មីម្តងទៀត មីស៊ីលចម្ងាយឆ្ងាយដែលអាចមានសមត្ថភាព រត់ទៅដល់ទឹកដីភាគខាងលិចរបស់អាមេរិក។
សមាជិកសភារុស្ស៊ីដែលបានទៅធ្វើទស្សនកិច្ចនៅសប្តាហ៍មុន នៅទីក្រុងព្យុងយ៉ាង បាននិយាយថា កូរ៉េខាងជើងនឹងបាញ់មីស៊ីលចម្ងាយឆ្ងាយ នៅក្នុងពេលឆាប់ៗនេះ។
កូរ៉េខាងជើងធ្លាប់បានបាញ់សាកល្បងមីស៊ីលចម្ងាយឆ្ងាយពីរលើករួចហើយ នៅឆ្នាំ២០១៧នេះ ក្នុងក្របខ័ណ្ឌសម្រិតសម្រាំង សមត្ថភាពមីស៊ីល ដែលកូរ៉េខាងជើងវាយតម្លៃថា អាចរត់ទៅទឹកដីគ្រប់កន្លែងរបស់អាមេរិក។ ភាគីអាមេរិកវាយតម្លៃថា កូរ៉េខាងជើងនឹងអាចបាញ់មីស៊ីលជាថ្មី នៅថ្ងៃ អង្គារ ទី១០តុលា ឲ្យចំថ្ងៃដែលកូរ៉េខាងជើងប្រារព្ធខួប ៧១ឆ្នាំ នៃ ការបង្កើតគណបក្សពលករកូរ៉េ ដែលជាបក្សកាន់អំណាចតែមួយរបស់កូរ៉េខាងជើងសព្វថ្ងៃនេះ។ នៅខែតុលានេះ ក្រៅតែពីមីស៊ីល កូរ៉េខាងជើងនឹងអាចបាញ់សាកល្បងគ្រាប់បែកនុយក្លេអ៊ែរជាលើកទី ៧។ នេះបើតាមរូបភាពចាប់បានរបស់ផ្កាយរណបអាមេរិក។
ពង្រឹងអំណាចត្រកូលគីម
មេដឹកនាំកូរ៉េខាងជើងមិនត្រឹមតែប្រើមីស៊ីល សម្រាប់កំញើញផ្គើនអាមេរិកតែប៉ុណ្ណោះទេ។ នៅថ្ងៃសៅរ៍ ម្សិលមិញ នៅក្នុងពេលប្រកាសរុះរើសមាជិកគណៈអចិន្ត្រៃយ៍បក្សពលករកូរ៉េខាងជើង ដែលជាក្បាលម៉ាស៊ីននៃការសម្រេចនយោបាយរបស់ប្រទេស លោកគីម ជុងអ៊ុនបានប្រកាសតែងតាំងមនុស្សសំខាន់ៗ ដែលមានជំហរប្រឆាំងនឹងអាមេរិក។ រដ្ឋមន្រ្តីការបរទេសកូរ៉េខាងជើង លោក Ri Yong-ho ដែលធ្លាប់ជេរលោកដូណាល់ ត្រាំ នៅវេទិការអង្គការសហប្រជាជាតិ ថា ជាប្រធានាធិបតីបិសាច ត្រូវបានលោកគីម ជុងអ៊ុន ដំឡើងសក្តិ ឲ្យក្លាយជាសមាជិកពេញលេញ នៃគណៈមជ្ឈឹមបក្ស។
លោកគីម ជុងអ៊ុនបានដំឡើងផងដែរ អំនាច និងតួនាទីដល់មេបញ្ជាការទ័ពពីររូប Kim Jong-sik Ri និងPyong-cholដែលបានចូលរួម នៅក្នុងនយោបាយផលិតអភិវឌ្ឍ មីស៊ីលបាលីស្ទីកកូរ៉េខាងជើង។ ចំណែកប្អូនស្រីរបស់លោកគីម ជុងអ៊ុន គឺ គីម យុងជុន Kim Yo-jong អាយុ៣០ឆ្នាំ ដែលមានតួនាទីជាអនុប្រធាននាយករដ្ឋានឃោសនាការ ត្រូវបានមេដឹកនាំកូរ៉េខាងជើង ជ្រើសរើសឲ្យធ្វើជាសមាជិកអមរបស់ការិយាល័យនយោបាយរបស់បក្ស។ គីម យុងជុន Kim Yo-jong ធ្លាប់ត្រូវបានក្រសួងសេដ្ឋកិច្ចអាមេរិកដាក់ចូលក្នុងបញ្ជីរខ្មៅ ក្នុងបទរំលោភសិទ្ធិមនុស្ស។ ការដាក់បញ្ចូល បងប្អូន ជាសមាជិករបស់បក្ស ដែលជាតំណែងសំខាន់ នៅក្នុងប្រទេស សបញ្ជាក់ឲ្យឃើញថា លោកគីម ជុងអ៊ុន កំពុងពង្រឹងបន្ថែមអំណាចត្រកូលគីម នៅក្នុងការដឹកនាំប្រទេសកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ