ផែនការមហាសម្ងាត់យោធាកូរ៉េខាងត្បូងត្រូវកូរ៉េខាងជើងលួចបាន
ឯកសារដ៏សែនសម្ងាត់បំផុតរបស់យោធាកូរ៉េខាងត្បូង ចំនួនប្រមាណមួយរយឯកសារ រាប់ទាំងផែនការធ្វើសកម្មភាពរួមជាមួយសហរដ្ឋអាមេរិក ក្នុងករណីមានផ្ទុះសង្គ្រាមជាមួយកូរ៉េខាងជើងផង ត្រូវបានចោរអ៊ីនធ័រនែតកូរ៉េខាងជើងចូលលួចបាន។ នេះបើតាមការទម្លាយរបស់សារព័ត៌មានកូរ៉េខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
បើតាមកាសែតកូរ៉េខាងត្បូង ដែលបានទទួលព័ត៌មានពីសមាជិកសភាបក្សប្រជាធិបតេយ្យលោក Rhee Cheol-Hee ពួកចោរអ៊ីនធ័រនែតកូរ៉េខាងជើង បានជ្រៀតចូលក្នុងប្រព័ន្ធអ៊ីនធ័រនែតផ្ទៃក្នុងរបស់យោធាកូរ៉េខាងត្បូង កាលពីខែកញ្ញា ២០១៦ និងលួចយកបាននូវឯកសារសំខាន់ៗដ៏សម្ងាត់បំផុត ជាច្រើន ក្នុងទំហំ២៣៥gigabytes។
ផែនការទ័ពដែលកូរ៉េខាងត្បូងបានរៀបចំរួមគ្នាជាមួយនឹងសហរដ្ឋអាមេរិក ក្នុងទស្សនៈវិស័យត្រៀមធ្វើសង្គ្រាមជាយថាហេតុណាមួយជាមួយកូរ៉េខាងជើង និងដែលមានបង្កប់គម្រោងវាយប្រហារដើម្បីកម្ចាត់មេដឹកនាំ គីម ជុងអ៊ុន ក៏ត្រូវបានចោរអ៊ីនធ័រនែតលួចបានដែរ។
ប្រភពដដែលបានអះអាងថា ក្រសួងការពារជាតិកូរ៉េខាងត្បូង កំពុងបន្តស្រាវជ្រាវថាតើមានបាត់ឯកសារអ្វីខ្លះ។ ៨០%នៅពុំទាន់កំណត់បាននៅឡើយទេ។ ប៉ុន្តែអ្វីដែលច្បាស់គឺផែនការបន្ទាន់នៃកងកម្លាំងទ័ពពិសេស ព្រមទាំងផែនការលម្អិតស្តីពីសមយុទ្ធប្រចាំអាមេរិកកូរ៉េខាងត្បូង និងព័ត៌មានស្តីអំពីការដំឡើងទីតាំងយោធាយុទ្ធសាស្ត្រ មជ្ឈមណ្ឌលអេឡិចត្រូនិក ត្រូវបានចោរលួចយកបាត់មែន។
អ្នកនាំពាក្យក្រសួងការពារជាតិកូរ៉េខាងត្បូងក៏បដិសេធមិនធ្វើអត្ថាធិប្បាយអ្វីទាំងអស់។ អ្នកនាំពាក្យក្រសួងការពារជាតិអាមេរិកវិញ បានត្រឹមអះអាងថាបានទទួលដំណឹងដូចគ្នា តែប្រកែកមិនបញ្ចេញយោបល់។
ការទម្លាយព័ត៌មានជាសាធារណៈនេះ ធ្លាក់មកជួនចំពេលដែលភាពតានតឹងកំពុងឡើងខ្លាំងនៅឧបទ្វីបកូរ៉េ បន្ទាប់ពីកូរ៉េខាងជើងបានផ្គើនធ្វើការសាកល្បងនុយក្លេអ៊ែរជាបន្តបន្ទាប់ ឯអាមេរិកតាមរយៈលោកត្រាំ បានគំរាមកំហែងគ្នាឥតឈប់ កម្ទេចរបបព្យុងយ៉ាង។ ហើយនៅថ្ងៃព្រឹកនេះទៀត អាមេរិកបានបញ្ជូនយន្តហោះទម្លាក់គ្រាប់បែកលឿនជាងសម្លេងពីរគ្រឿងទៅហោះឆ្វែងក្បែរឧបទ្វីប។
ក្រៅអំពីបង្កបញ្ហាខាងនុយក្លេអ៊ែរ កូរ៉េខាងជើងក៏ជាប់ចោទជាអ្នកវាយប្រហារអ៊ីនធ័រនែត ទ្រង់ទ្រាយធំ កំរិតពិភពលោកផង ជាញយដង ដោយប្រទេសនេះមានកងពលជាជំនាញចោរអ៊ីនធ័រនែតដល់ទៅប្រមាណ៦៨០០នាក់។ នេះបើតាមក្រសួងការពារជាតិកូរ៉េខាងត្បូង។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ