OMS ៖ អត្រាក្មេងធាត់ជ្រុលកើនឡើង១ជា១០ ក្នុងរយៈពេលតែ៤០ឆ្នាំ
អង្គការសុខភាពពិភពលោកបានចេញផ្សាយលទ្ធផលសិក្សាមួយដែលបង្ហាញ ចំនួនកុមារ និងក្មេងជំទង់ ពីអាយុ៥ឆ្នាំទៅ១៩ឆ្នាំ កើតរោគធាត់ជ្រុលហួសហេតុ បានកើនឡើងមួយជា១០ ក្នុងរយៈពេល៤០ឆ្នាំចុងក្រោយនេះ។ និន្នាការក្មេងធាត់ហួសហេតុ បានកើនលឿនខ្លាំងនៅក្នុងប្រទេសក្រីក្រ និងមធ្យម និងជាពិសេសនៅអាស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
១២៤លាននាក់ នៅឆ្នាំ២០១៦ ទល់នឹង១១លាននាក់សោះកាលពីឆ្នាំ ១៩៧៥ ! នេះជាចំនួនក្មេងធាត់ហួសហេតុ នៅលើពិភពលោក ! និង ២១៣លាននាក់ ធាត់ខ្លាំង តែមិនទាន់ហួសហេតុ។ អត្រាកុមារនិងក្មេងជំទង់ធាត់ជ្រុលហួសហេតុនេះ បានចាប់ផ្តើមធ្លាក់ចុះនៅសហរដ្ឋអាមេរិក និងអឺរ៉ុបខាងលិច ព្រមទាំងក្នុងបណ្តាប្រទេសអ្នកមាន ប៉ុន្តែចំនួនក្មេងធាត់នៅតែច្រើនខ្លាំងគួរឱ្យព្រួយបារម្ភដដែល។ នេះបើតាមរបាយការណ៍របស់អង្គការសុខភាពពិភពលោក និងអ្នកស្រាវជ្រាវអង់គ្លេស ដែលបង្ហាញក្តីព្រួយបារម្ភកាន់តែខ្លាំងទៀត ចំពោះបណ្តាប្រទេសមានជីវភាពក្រីក្រនិងមធ្យម។
នៅប្រទេសអាហ្វ្រិកខាងត្បូង អេហ្ស៊ីប និងម៉ិចស៊ិក អត្រាក្មេងធាត់ជ្រុលបានស្ទុះឡើងខ្លាំងដល់ទៅប្រមាណពី ២០ទៅ២៥% ដែលកាលពី៤០ឆ្នាំមុន ស្ទើរគ្មានក្មេងធាត់ជ្រុលសោះ។ អាស៊ីខាងកើត អាមេរិកឡាទីន និងតំបន់កោះ ការ៉ាអ៊ីប ប៉ូលីនេស៊ី ជាដើម បានវិវឌ្ឍន៍យ៉ាងលឿនស្លេវ ពីក្មេងមានគ្រោះខ្វះអាហារូបត្ថម្ភទៅជាក្មេងលើសទម្ងន់។
ប្រសិនបើនិន្នាការនៅតែបន្តបែបនេះទៀត នោះនៅឆ្នាំ២០២២ ពិភពលោកនឹងមានចំនួនក្មេងនិងកុមារធាត់ជ្រុល ច្រើនជាងក្មេងស្ទើរគីឡូ។ សម្រាប់អង្គការសុខភាពពិភពលោក នេះមិនមែនជាសញ្ញានៃភាពមានបានរបស់ពិភពលោកទេ ប៉ុន្តែកំណើនក្មេងធាត់ហួសហេតុជាឥទ្ធិពលអវិជ្ជមាននៃការពាណិជ្ជកម្ម និងនយោបាយចំណីអាហារ។ ចំណីអាហារល្អ មានលំនឹងផ្នែកអាហារូបត្ថម្ភ មានតម្លៃខ្ពស់ដែលមិនអនុញ្ញាតឱ្យគ្រួសារនិងសហគមន៍មាន ក្រីក្រ និងមធ្យមទិញទទួលទានបាន។
ហេតុដូច្នេះហើយបានអ្នកស្រាវជ្រាវណែនាំឱ្យមានការគិតគូរដល់បញ្ហាចំណីអាហារ និងជួយការពារគ្រួសារ និងសហគមន៍ក្រីក្រ ដោយស្នើឱ្យយកពន្ធធ្ងន់លើចំណីអាហារដែលផ្តល់ផលអាក្រក់ដល់សុខភាព មានកំរិតជាតិស្ករច្រើន ឬដោយត្រូវសរសេរឱ្យបានច្បាស់លាស់គ្រឿងផ្សំ ដើម្បីឱ្យអ្នកទិញមានជម្រើស រកអាហារតែល្អសម្រាប់សុខភាព។
សូមបញ្ជាក់ថា ធាត់ជ្រុលហួសហេតុពេលនៅក្មេង ជាកត្តានាំឱ្យងាយកើតជំងឺមេតាបូលិក ជំងឺលើសឈាម ជំងឺទឹកនោមផ្អែម នៅពេលពេញវ័យ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ