បង់ក្លាដែសទទួលជនភៀសខ្លួនជនជាតិភាគតិចរ៉ូហ៊ីងយ៉ាជិត ១ លាននាក់
ឯកអគ្គរដ្ឋទូតបង់ក្លាដែសប្រចាំអសប នៅទីក្រុងហ្សឺណែវ បានថ្លែងនៅថ្ងៃចន្ទម្សិលមិញថា “ប្រទេសបង់ក្លាដែស បានទទួលជនភៀសខ្លួនជនជាតិភាគតិចរ៉ូហ៊ីងយ៉ាជិត១លាននាក់ហើយដែលបានរត់គេចចេញពីអំពើហិង្សានៅភូមា “ ដោយលោកបានរំលឹកដែរថា “គឺជាស្ថានការណ៍មួយដែលមិនអាចទប់ទល់បានឡើយ”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ចាប់តាំងពីថ្ងៃទី២៥សីហាមុន ជនចំនួន ៦សែននាក់ បានឆ្លងកាត់ព្រំដែនរវាងភូមានិងបង់ក្លាដែសដើម្បីគេចចេញពីអំពើហិង្សារបស់កងទ័ពភូមាដែលធ្វើការវាយលុកនៅរដ្ឋArakan ជាទីដែលសហគមន៍ជនជាតិភាគតិចរ៉ូហ៊ីងយ៉ាកាន់សាសនាអ៊ីស្លាមរស់នៅ។ កងទ័ពភូមា បានវាយលុក ដើម្បីសងសឹកតបត ការវាយប្រហារមួយរបស់ក្រុមឧទ្ទាមរ៉ួហ៊ីងយ៉ា។ “ប្រតិបត្តិការរបស់យោធាភូមានេះ ត្រូវបាន អ.ស.ប.វាយតម្លៃថា “កងទ័ភូមាកំពុងធ្វើនយោបាយបោសសំអាតជនជាតិភាគតិចរ៉ូហ៊ីងយ៉ា”។
លោក Shameem Ashan ឯកអគ្គរដ្ឋទូតបង់ក្លាដែសប្រចាំ អ.ស.ប. នៅទីក្រុងហ្សឺណែវ បានថ្លែងបញ្ជាក់នៅនាឱកាសនៃសម័យប្រជុំរបស់ក្រុមប្រទេសដែលជាម្ចាស់ជំនួយទៀតថា “ការភៀសខ្លួននៃជនជាតិភាគតិចរ៉ូហ៊ីងយ៉ានេះ គឺជាការចាកចេញដ៏ធំសម្បើមបំផុតពីប្រទេសតែមួយគត់ចាប់តាំងពីអំពើប្រល័យពូជសាសន៍នៅប្រទេសរ្វ៉ាន់ដាក្នុងឆ្នាំ១៩៩៤មក”។លោក បានគូសបញ្ជាក់ទៀតថា” ជនភៀសខ្លួនរ៉ូហ៊ីងយ៉ា នៅតែបន្តភៀសខ្លួនចូលមកកាន់ប្រទេសបង់ក្លាដែសជារៀងរាល់ថ្ងៃ បើទោះបីជាមានអ្នកខ្លះអះអាងផ្ទុយស្រឡះក៏ដោយក្តី ក៏អំពើហិង្សានៅរដ្ឋ Arakan នៅមិនទាន់បានបិទបញ្ចប់នៅឡើយទេ។
ក្នុងពេលនេះ រដ្ឋមន្ត្រីក្រសួងមហាផ្ទៃបង់ក្លាដែស កំពុងស្ថិតនៅក្នុងទីក្រុងរ៉ង់ហ្គូនដើម្បីធ្វើការពិគ្រោះគ្នារកដំណោះស្រាយជាប់លាប់មួយនៅក្នុងវិបត្តិជនភៀសខ្លួនរ៉ូហ៊ីងយ៉ា-នេះជាការបញ្ជាក់បន្ថែមរបស់ឯកអគ្គរដ្ឋទូតបឹងក្លាដែសប្រចាំ អ.ស.ប.។ “ម្យ៉ាងទៀតភូមានៅតែបន្តការឃោសនារបស់ខ្លួនថា ជនភាគតិចរ៉ូហ៊ីងយ៉ា គឺជាជនអន្តោប្រវេស្តន៍ខុសច្បាប់មកពីប្រទេសបង់ក្លាដែស។ “ការបដិសេធយ៉ាងជាក់ស្តែងនៃអត្តសញ្ញាណជនជាតិភាគតិចរ៉ូហ៊ីងយ៉ានេះ នៅតែជាឧបសគ្គដ៏ចម្បងមួយ-នេះជាការបញ្ជាក់បន្ថែមរបស់លោក Ashan ។
នៅថ្ងៃចន្ទម្សិលមិញនេះ សន្និសីទអន្តរជាតិមួយបានបើកនៅទីក្រុងហ្សឺណែវ ដើម្បី ធ្វើការរៃអង្គាសមូលនិធិ យកទៅជួយដល់ជនភៀសខ្លួនរ៉ូហ៊ីងយ៉ា ប្រមាណជា៩សែននាក់នៅក្នុងប្រទេសបង់ក្លាដែស បន្ទាប់ពីបានភៀសខ្លួនគេចចេញពីអំពើហិង្សានៅក្នុងប្រទេសភូមាដែលមានអ្នកកាន់ព្រះពុទ្ធសាសនាភាគច្រើនបំផុតនៅក្នុងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ