ចិន ៖ លោកស៊ី ជិនពីង ជាប់ឆ្នោតជាប្រធានបក្សជាថ្មី សម្រាប់៥ឆ្នាំ
ជាផ្លូវការហើយ នៅថ្ងៃទី ២៥ តុលា ២០១៧នេះ គណបក្សកុម្មុយនិស្តចិន បានបោះឆ្នោតបន្តតំណែងលោក ស៊ី ជីនពីង ជាអគ្គលេខាធិការបក្សអាណត្តិទីពីរ រយៈពេល៥ឆ្នាំទៀត។ ជាមួយនឹងការបន្តតំណែងអគ្គលេខាធិការបក្ស លោកស៊ី ជីនពីងក៏នឹងត្រូវបន្តកាន់តំណែងប្រធានាធិបតីអាណត្តិថ្មីរយៈពេល ៥ឆ្នាំ ចាប់ពីខែមីនា ឆ្នាំ ២០១៨។ គណៈកម្មាធិការអចិន្ត្រៃយ៍នៃការិយាល័យនយោបាយបក្ស ក៏ត្រូវបានផ្លាស់ប្តូរសមាសភាពថ្មីស្ទើរតែទាំងស្រុង ប៉ុន្តែគេហាក់ដូចជាមើលមិនឃើញថាឥស្សរជនណាម្នាក់នឹងក្លាយជាអ្នកស្នងតំណែងលោកស៊ី ជីនពីង នាថ្ងៃអនាគតសោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
គេបានស្គាល់អត្តសញ្ញាណឥស្សរជនដ៏មានឥទ្ធិពលនិងអំណាចខ្លាំងបំផុតរបស់ចិន ដែលជាសមាជិកគណៈកម្មាធិការអចិន្ត្រៃយ៍នៃការិយាល័យនយោបាយបក្សហើយ ! ក្រៅពីលោកប្រធានាធិបតី ស៊ី ជិនពីង និងលោកនាយករដ្ឋមន្ត្រី លី ខឺឈាំង សមាជិកគណៈកម្មាធិការ៥នាក់ផ្សេងទៀតត្រូវផ្លាស់ចេញប្តូរថ្មីទាំងអស់។
មានន័យថាលោក ស៊ី ជិនពីង បានសម្រេចបំណង ក្លាយជាមេដឹកនាំបក្ស ដែលគ្មានចរន្តផ្សេងមកប្រជែងឡើយ ជាលើកទីមួយ។ ឥទ្ធិពលរបស់អតីតប្រធានបក្ស និងអតីតប្រធានាធិបតី ហ៊ូ ជិនតាវ ត្រូវចប់ត្រឹមថ្ងៃនេះ ព្រោះសមាជិកថ្មី សុទ្ធសឹងជាមនុស្សជំនិត និងជាស្រមោលរបស់លោកប្រធានាធិបតីទាំងអស់ !
អមដោយសមាជិកថ្មី នៃគណៈកម្មការអចិន្ត្រៃយ៍បក្សថ្មី មានជាអាទិ៍ លោក Wang Yang, Han Zheng, Zhao Leji, Li Zhanshu, Wang Huning និងWang Yang លោក ស៊ីជិនពីង បានសន្យាប្រឹងប្រែងឱ្យកាន់ខ្លាំងថែមទៀតក្នុងការដឹកនាំប្រទេស និងបន្តប្រយុទ្ធប្រឆាំងនឹងអំពើពុករលួយ រហូតគ្មានថ្ងៃឈប់ ដើម្បីជម្រុះមេរោគដែលបំផ្លាញស្រទាប់បក្ស។
ហើយផ្ទុយពីការបំប៉ោងព័ត៌មានមុនការបើកសមាជ បុរសខ្លាំងប៉េកាំងបន្តគោរព ច្បាប់កំរិតអាយុកាលចូលនិវត្តន៍ ដែលហាមឃាត់មិនឱ្យឥស្សរជនអាយុលើសពី៦៨ឆ្នាំ ជាប់ឈរនៅក្នុងការិយាល័យនយោបាយបក្ស។ តើនេះជាសញ្ញាប្រាប់ថា លោកស៊ី ដែលនឹងមានអាយុ៦៩ឆ្នាំ នៅឆ្នាំ២០២២ នឹងត្រូវចាកចេញពីស្ថាប័នកំពូលមួយនេះដែរ និងមិនតោងអំណាចឱ្យពីពីរអាណត្តិ ?
គ្មានអ្វីជាប្រាកដទេ ! ព្រោះមកទល់ពេលនេះ គេមើលមិនឃើញអ្នកដែលគួរមកបន្តតំណែងពីលោកស៊ី ជីនពីងសោះ។ លោក ឆេន មិន អឺរ អាយុ៥៧ឆ្នាំ ដែលអ្នកវិភាគសំលឹងឃើញថាមានសក្តានុពលខ្លាំងអាចក្លាយជាកូនស្នងរាជនោះ មិនអាចលោតផ្លោះរំលងគេឯងមកចូលការិយាល័យនយោបាយឡើយ។ លោក ស៊ី ជិនពីង ចេះគិតវែងឆ្ងាយ មិនចង់បែងចែកអំណាច មិនចង់មាននរណានៅពីក្រោយខ្នងចាំដេញយកតំណែងទេ។ អ្នកដែលមានសក្តានុពលអាចមកបន្តតំណែងពីលោក ត្រូវប្រឹងប្រកួតប្រជែងគ្នា ហើយលោករក្សាសម្ពាធលើគ្រប់ឥស្សរជននយោបាយគ្រប់រូប ក្តាប់អំណាចយ៉ាងពេញដៃរយៈពេល៥ឆ្នាំ ឬ១០ឆ្នាំ ដោយគ្មានជាប់ជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ