ថៃ៖យោធាឃាត់ខ្លួនសកម្មជនម្នាក់ដែលចង់បង្ករឿងក្នុងថ្ងៃពិធីបូជាសពព្រះចៅភូមិបុល
នៅក្នុងប្រទេសថៃ ពិធីបូជាសពអតីតព្រះហាក្សត្រព្រះចៅភូមិបុលរយៈពេល ៥ថ្ងៃចាប់ផ្តើមនាថ្ងៃព្រហស្បតិ៍ ទី២៦ តុលានេះ។ តែតាំងពីថ្ងៃពុធ ទី២៥ តុលាមក មានប្រជារាស្រ្តថៃជាច្រើនរយនាក់បាននាំគ្នាទៅបោះទីតាំងរង់ចាំនៅតាមដងផ្លូវដែលហែក្បួនសពដើម្បីលាជាលើកចុងក្រោយ។ ដោយឡែក អង្គការក្រៅរដ្ឋាភិបាលឈ្មោះ Thai Lawyers for Human Rights បានប្រាប់ឲ្យដឹងថា មានសកម្មជនម្នាក់ត្រូវបានក្រុមយោធាចាប់ឃុំក្នុងបទមានបំណងបង្ករឿងនៅក្នុងថ្ងៃបូជាសពព្រះចៅភូមិបុល។
ចុះផ្សាយនៅថ្ងៃ៖
ស្តាប់ - ០១:៤៥
សកម្មជនជនជាតិថៃដែលក្រុមយោធាបានចាប់ឃុំនោះមានឈ្មោះថា អ៊ីកាចៃ ហុងកងវ៉ានដែលរស់ក្នុងទីក្រុងបាងកក។ តាមអង្គការក្រៅរដ្ឋាភិបាល Thai Lawyers for Human Rights ក្រុមយោធាបានចុះចាប់សកម្មជនអ៊ីកាចៃដល់លំនៅដ្ឋានកាលពីយប់ថ្ងៃអង្គារ ទី២៤ តុលា និងបានផ្តល់ជម្រើសពីរឲ្យលោកអ៊ីកាចៃ ទី១ សុខចិត្តជាប់ឃុំបណ្តោះអាសន្ននៅស្រុកកងចាណាប៊ូរីស្ថិតប៉ែកខាងលិចប្រទេសថៃ និងទី២ សុខចិត្តជាប់ឃុំបណ្តោះអាសន្ននៅក្នុងបន្ទាយទាហានក្នុងក្រុងបាងកករហូតដល់ថ្ងៃចប់ពិធីបូជាសពព្រះចៅភូមិបុល។
លោកអាណន នូមប៉ា មេធាវីរបស់ Thai Lawyers for Human Rights ដែលបានជួបនិយាយជាមួយលោកអ៊ីកាចៃបានបញ្ជាក់នៅថ្ងៃពុធ ទី២៥ តុលាថា លោកអ៊ីកាចៃត្រូវបានក្រុមយោធាឃុំនៅក្នុងសណ្ធាគារមួយក្នុងស្រុកកងចាណាប៊ូរីរហូតដល់ថ្ងៃទី២៧ តុលាដោយមានការយាមកាមយ៉ាងយកចិត្តទុកដាក់ជាទីបំផុត។ តាមរូបមេធាវីដដែល លោកអ៊ីកាចៃមិនត្រូវបានជាប់ចោទអ្ចវីទេ និងថា ក្រុមយោធាគ្រាន់តែយករូបគេទៅឃុំបណ្តោះអាសន្នដើម្បីឲ្យពិធីបូជាសពព្រះចៅភូមិបុលមានដំណើរការដោយរលូន។
ការចាប់ឃុំខ្លួនបណ្តោះអាសន្នលោកអ៊ីកាចៃពេលនេះបានធ្វើឡើង បន្ទាប់ពីសកម្មជនរូបនេះបានសរសេរនៅលើទំព័រហ្វេសប៊ុកកាលពីសប្តាហ៍កន្លងទៅថា រូបគេនឹងពាក់អាវយឺតពណ៌ក្រហម និងធ្វើអ្វីដែលគ្មាននរណានឹកស្មានដល់នៅក្នុងថ្ងៃទី២៦ តុលាដែលជាថ្ងៃចាប់ផ្តើមពិធីបូជាសពព្រះចៅភូមិបុល។ ដោយឡែកក្នុងថ្ងៃផ្តើមពិធីបូជាសពថ្ងៃព្រហស្បតិ៍ ទី២៦ តុលានេះ មានមនុស្សមិនតិចជាង ២៥ម៉ឺននាក់ទេដែលបានឈរតាមដងផ្លូវនៃក្បួនដង្ហែសពព្រះចៅភូមិបុលដើម្បីសម្តែងការគោរពលាជាលើកចុងក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ