សមភាពស្ត្រីនិងបុរស នៅចិន មានតែនៅលើក្រដាស ?
ចុះផ្សាយនៅថ្ងៃ៖
ស្តាប់ - ០៤:០៩
សមាជបក្សកុម្មុយនិស្តចិនបានបិទបញ្ចប់ហើយ នៅថ្ងៃទី ២៤តុលានេះ។ សមាសភាពសមាជិកគណៈកម្មាធិការមជ្ឈិមបក្ស គណៈកម្មាធិការនៃការិយាល័យនយោបាយ យោធា... ថ្មី ត្រូវបានបង្ហាញ ប៉ុន្តែសួរតើនៅក្នុងស្ថាប័នបក្សដែលជាតំណាងអំណាចកំពូលរបស់ចិន មានស្ត្រីប៉ុន្មាននាក់ ? ពាក្យព្រមានរបស់លោក ស៊ី ជីនពីង បានបង្ហាញអំពីរឿងអាស្រូវ សមាជិកបុរស ព្រោះបញ្ហាស្រីញី តែចំពោះតួនាទីនយោបាយវិញ តើស្ត្រីនៅឯណា ?
“ស្ត្រីទ្រពាក់កណ្តាល មេឃ” នេះជាប្រសាសន៍ធានាអះអាងរបស់លោក មៅ សេទុង បិតាបក្សកុម្មុយនិស្តចិន នៅក្នុងទសវត្សរ៍ឆ្នាំ១៩៥០ ! ប្រសាសន៍មួយឃ្លានេះ បានក្លាយជាពាក្យស្លោក ក្នុងន័យជំរុញឱ្យមានការគោរព និងលើកតម្កើងស្ត្រីឱ្យមានសមភាពនឹងបុរស ! ជាពាក្យស្លោកបដិវត្ត ដ៏ធំធេងមួយ ព្រោះចិនមានប្រពៃណីទំនៀមទម្លាប់ មិនផ្តល់តម្លៃដល់ស្ត្រី តាំងតែពីយូរលង់រាប់ពាន់ឆ្នាំមកហើយ មិនដឹងជាប៉ុន្មានរជ្ជកាលទេ។
ប៉ុន្តែពាក្យស្លោក នៅតែជាពាក្យស្លោក ! តាំងពីរបបសាធារណរដ្ឋប្រជាមានិត បង្កើតឡើងដោយជនកុម្មុយនិស្តនៅឆ្នាំ១៩៤៩មក គ្មានស្ត្រីណាម្នាក់អាចចូលកាន់តំណែងកំពូលរបស់បក្សទេ ! គ្មានម្នាក់សោះនៅក្នុងគណៈកម្មាធិការអចិន្ត្រៃយ៍នៃការិយាល័យនយោបាយបក្ស ដែលជាស្ថាប័នកំពូល មានបន្សំឥស្សរជន៧រូប ជាអ្នកដឹកនាំប្រទេសពិតប្រាកដនោះ។ គណៈកម្មាធិការនេះ ត្រូវប្តូរសមាសភាពថ្មី នៅថ្ងៃពុធនេះ នឹងត្រូវមានសមាជិក ១០០%បុរសដដែល។
គណៈកម្មាធិការមជ្ឈិមបក្ស ដែលមានទម្រង់ជាសភាផ្ទៃក្នុងបក្ស និងដែលមានសមាជិកសរុប២០៥នាក់ គេរាប់ឃើញមានស្ត្រីប្រមាណជាង១០នាក់ដែរ។ នៅក្នុងចំណោមប្រតិភូជិត២៣០០នាក់ ដែលមកចូលរួមក្នុងសមាជបក្សលើកទី១៩ កាលពីថ្ងៃអង្គារទី ១៧ តុលារហូតដល់ថ្ងៃទី ២៤តុលា មានមិនដល់តែមួយភាគបួនទេ ជាស្ត្រី។
ក្នុងស្ថានភាពបែបនេះ លោកស្រីមេធាវី Guo Jianmei ឯកទេសផ្នែកសិទ្ធិស្ត្រី បានសរសេរលិខិតមួយជូនចំពោះអង្គសមាជបក្ស ដើម្បីទាញសញ្ញាអាសន្នដាស់ប្រាប់ប្រតិភូទាំងអស់ អំពីកង្វះស្ត្រីក្នុងនយោបាយ។ ប៉ុន្តែលោកស្រី គ្មានមធ្យោបាយអ្វីនឹងបញ្ជូនលិខិតនោះទៅដល់សមាជទេ ! គ្មានតំណាងបក្សណាម្នាក់ ព្រមជួយឡើយ ! ជាទូទៅចិន ហាក់ដូចជាគ្មានគំនិត និងគិតរកមធ្យោបាយបំផុសបំផុសស្ត្រីឱ្យចូលប្រលូកក្នុងនយោបាយទេ។
មានន័យថាចិននៅតែបន្តមិនផ្តល់តម្លៃដល់ស្រ្តីឬ ? មិនមែនទេ! សមភាពស្ត្រីនិងបុរស មានចែងយ៉ាងច្បាស់នៅក្នុងរដ្ឋធម្មនុញ្ញចិន។ បើតាមក្បួនច្បាប់ ក្នុងតួនាទីដូចគ្នាឋានៈដូចគ្នា បុគ្គលិកស្រីត្រូវទទួលបានប្រាក់បំណាច់ កំរិតស្មើគ្នានឹងបុគ្គលិកភេទប្រុស។ សម្រាប់ប្រតិភូសមាជបក្ស រដ្ឋាភិបាលធ្វើបានច្រើនណាស់ ! រដ្ឋាភិបាលបានប្រឹងប្រែង និងគាំទ្រគំនិតផ្តួចផ្តើមរបស់ស្ត្រី ! ចិនបានសម្រេចហើយកម្មវត្ថុផ្តល់សមភាពឱ្យស្ត្រីនិងបុរសនោះ។
ប៉ុន្តែប្រពៃណីទំនៀមទំលាប់ក្នុងសង្គមចិន បានលើកទឹកចិត្តឱ្យស្ត្រីផ្តល់តម្លៃ និងគិតគូរដល់ជីវិតគ្រួសារជាងជីវិតការងាររបស់ពួកគេ។ រហូតមកទល់នឹងពាក់កណ្តាលទសវត្សរ៍ឆ្នាំ២០០០ទៅហើយ ស្ត្រីចិននៅលីវ អាយុលើសពី២៧ឆ្នាំ ទៅហើយ នៅតែគ្មានប្តី គ្មានមិត្តប្រុស គេហៅស្ត្រី នោះថា ព្រៅ ស្ត្រីមានស្ថានភាពលំបាក។
ផ្ទុយទៅវិញ ក្នុងខណៈដែលស្ត្រីចិនអវត្តមានស្ទើរតែស្រុងនៅក្នុងរង្វង់នយោបាយ និងនៅក្នុងរង្វង់អ្នកកាន់អំណាច គេបែរជាឮច្រើនអំពីរឿងអាស្រូវព្រោះស្រីទៅវិញ។ យុទ្ធនាការប្រយុទ្ធប្រឆាំងនឹងអំពើពុករលួយ របស់លោក ស៊ី ជីនពីង បានឆ្លុះបញ្ចាំងឱ្យឃើញអំពីការប្រព្រឹត្តទង្វើខុសសីលធម៌ជាច្រើនទាក់ទងនឹងស្រី។
អតីតមេភ្នាក់ងារសន្តិសុខ លោក ចូ យ៉ុងកាង ជាតំណាងថ្នាក់ដឹកនាំជាន់ខ្ពស់ជាងគេបំផុតរបស់បក្ស ដែលត្រូវដាច់ក្បាលធ្លាក់ពីតំណែង បានជាប់ចោទពីបទមានស្រីញីច្រើន និងបានប្រើអំណាចជាមធ្យោបាយទាក់ទាញប្តូរយកផលប្រយោជន៍ផ្លូវភេទ និងប្រាក់កាស។ កាលពីខែកញ្ញា អតីតឥស្សរជនដ៏ល្បីល្បាញ ជាផ្កាយរះប្រចាំបក្សកុម្មុយនិស្តចិន លោក ស៊ុន ចឹងឆាយ ត្រូវបានបណ្តេញពីបក្ស ពីបទរំលោភវិន័យបក្សយ៉ាងធ្ងន់ធ្ងរ (ពុករលួយ)ផង និងពីបទបានឆ្លៀតយកអំណាចដើម្បីបំរើតណ្ហាផ្លូវភេទផង។
លទ្ធផលនៃសិក្សាមួយរបស់សាកលវិទ្យាល័យប្រជាជនប៉េកាំង នៅឆ្នាំ២០១៣ បានសន្និដ្ឋាន មន្ត្រីជាន់ខ្ពស់ចិនដែលធ្លាក់ពីតំណែង ក្នុងយុទ្ធនាការប្រយុទ្ធប្រឆាំងនឹងអំពើពុករលួយរបស់លោក ស៊ី ជីនពីង ចំនួន ៩៥% សុទ្ធតែមានស្រីក្រៅ។ នេះជាទម្លាប់ របស់បុរសចិនភាគច្រើន ព្រោះក្នុងអតីតកាល បុរសចិនអាចពន្លាតទំនាក់ទំនងនិងអំណាចក្នុងសង្គម ដោយសារតែមានប្រពន្ធច្រើន។ ក្រោយឆ្នាំ១៩៤៩ ច្បាប់រដ្ឋធម្មនុញ្ញចិនហាមមិនឱ្យបុរសមានភរិយាច្រើនដូចមុន ប្រុសចិនប្តូរទម្លាប់ទៅជាការមានស្រីកំណាន់វិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ