សេអ៊ូលនឹងមិនអភិវឌ្ឈអាវុធនុយក្លេអ៊ែរទេ
កូរ៉េខាងត្បូងនឹងអភិវឌ្ឈសព្វាវុធនុយក្លេអ៊ែររបស់ខ្លួនឡើយបើទោះបីជាមានការគំរាមនានាពីសំណាក់ទីក្រុងព្យុងយ៉ាងក្តី។ កូរ៉េខាងជើងដែលជិតខាងកូរ៉េខាងត្បូង ជាប្រទេសមានអាវុធបរិមាណូ-នេះបើយោងតាមសេចក្តីថ្លែងរបស់ប្រធានាធិបតីកូរ៉េខាងត្បូងលោក Moon Jae-In នៅថ្ងៃពុធទី ១វិច្ឆិការនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
ប្រធានាធិបតីកូរ៉េខាងត្បូង នាឱកាសថ្លែងសុន្ទរកថាមួយ នៅចំពោះមុខសភានាថ្ងៃពុធទី១វិច្ឆិការនេះ បានគូសបញ្ជាក់យ៉ាងច្បាស់ៗថា “សេអ៊ូល ពុំអាចទទួលយកបាននិងក៏ពុំអាចអត់អោន ឲ្យបានដែរ រាល់កិច្ចខិតខំប្រឹងប្រែងរបស់កូរ៉េខាងជើង ដើម្បីជំរុញអោយប្រទេសខ្លួន ក្លាយទៅជារដ្ឋនុយក្លេអ៊ែរ”។ លោក Moon Jae-In បានគូសបញ្ជាក់បន្ថែមទៀតថា “រីឯ កូរ៉េខាងត្បូងវិញ ក៏នឹង មិនអភិវឌ្ឈ ឬក៏ ពុំមានអាវុធនុយក្លេអ៊ែរ”នេះទេ។ គួរបញ្ជាក់ថា ទីក្រុងព្យុងយ៉ាង បានធ្វើការបាញ់សាកល្បងនុយក្លេអ៊ែរលើកទី៦របស់ខ្លួនដែលមានឥទ្ធិពលសម្បើមអស្ចារ្យកាលពីខែកញ្ញាកន្លងមកនេះ។
ម្យ៉ាងទៀត ទីក្រុងព្យុងយ៉ាង បានបាញ់សាកល្បង គ្រាប់មីស៊ីល ដែលអាចផ្លោងទៅដល់ដែនដីអាមេរិកដែលជាហេតុបង្កឲ្យមានក្តីព្រួយបារម្ភជាពន់ពេកនៅក្នុងស្រទាប់សាធារណៈជនកូរ៉េខាងត្បូង ដោយហេតុតែកូរ៉េខាងត្បូង ក៏ជាសម្ព័ន្ធមិត្តមួយ យ៉ាងជិតស្និទ្ធរបស់សហរដ្ឋអាមេរិក។
ពាក់ព័ន្ធនឹងបញ្ហាសន្តិសុខជាតិកូរ៉េខាងត្បូងនេះ ប្រព័ន្ធផ្សព្វផ្សាយព័ត៌មានកូរ៉េខាងត្បូងនិងបក្សប្រឆាំងនៅក្នុងប្រទេស បានស្រែកទាមទារ អោយប្រទេសខ្លួន ដាក់ពង្រាយ អាវុធនុយក្លេអ៊ែរយុទ្ធសាស្ត្រអាមេរិកជាថ្មីឡើងវិញ-អាវុធនុយក្លេអ៊េរ ដែលត្រូវបាន ដកចេញពីឧបទ្វីបកូរ៉េ នៅក្នុងទស្សវត្តន៍ ឆ្នាំ១៩៩០។
នៅក្នុងបញ្ហានេះ មតិសាធារណៈកូរ៉េខាងត្បូងខ្លះ បានវិនិច្ឆ័យថា “ បើសិនជា វ៉ាស៊ីនតោន បដិសេធនៅក្នុងការដាក់ពង្រាយអាវុធនុយក្លេអ៊ែរ ហើយម្យ៉ាង រដ្ឋមន្ត្រីការពារជាតិអាមេរិកនៅឱកាសបំពេញទស្សនកិច្ចនៅសេអ៊ូលកាលពីសប្តាហ៍មុន ក៏មានក្តីមន្ទិលសង្ស័យដែរនៅលើគំនិតនេះ ទីក្រុងសេអ៊ូល គួរតែមានអាវុធនុយក្លេអ៊ែរផ្ទាល់ខ្លួនឯងទៅ។
ពីព្រោះ នៅក្នុងក្រសែភ្នែករបស់ពួកគេ ការបំពាក់អាវុធនុយក្លេអ៊ែរ គឺជា ការ ធានាសន្តិសុខជាតិផងនិងក៏ដើម្បី កុំអោយកូរ៉េខាងជើង បានចិត្ត មានអំនួតក្អេងក្អាងតែម្នាក់ឯងពេកនៅក្នុងឧបទ្វីបកូរ៉េ ។
ក៏ប៉ុន្តែចំពោះប្រធានាធិបតីកូរ៉េខាងត្បូងវិញ លោកបានគូសបញ្ជាក់ពី ជំហរកូរ៉េខាងត្បូងយ៉ាងច្បាស់ថា “នយោបាយរបស់កូរ៉េខាងត្បូងនៅលើវិស័យអាវុធនុយក្លេអ៊ែរនេះ ត្រូវផ្អែកនៅលើសេចក្តីថ្លែងការណ៍រួមមួយស្តីពីការលុបបំបាត់អាវុធនុយក្លេអ៊ែរនៅក្នុងឧបទ្វីបកូរ៉េដែលបានប្រកាសឡើងដោយកូរ៉េទាំងពីរនៅក្នុងឆ្នាំ១៩៩២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ