ទស្សនកិច្ចលោកដូណាល់ ត្រាំ នៅកូរ៉េខាងត្បូងបន្តផ្តោតលើបញ្ហាកូរ៉េខាងជើង
ចុះផ្សាយនៅថ្ងៃ៖
ស្តាប់ - ០៥:២៣
បន្ទាប់ពីទស្សនកិច្ចនៅជប៉ុនមក ថ្ងៃអង្គារនេះ លោកដូណាល់ ត្រាំ បានបន្តដំណើរទៅដល់ទីក្រុងសេអ៊ូល កូរ៉េខាងត្បូង និងបានជួបជាមួយមេដឹកនាំកូរ៉េខាងត្បូង លោកមូន ចែអ៊ីន។ ពេលទៅដល់កូរ៉េខាងត្បូង លោកត្រាំ បានចុះទៅមូលដ្ឋានយោធាអាមេរិក Camp Humphreys ដែលនៅចំងាយតែជាង១០០គីឡូម៉ែត្រប៉ុណ្ណោះពីទឹកដីកូរ៉េខាងជើង។ នៅទីក្រុងសេអ៊ូល ប្រធានាធិបតីអាមេរិកបានលើកឡើងក្នុងន័យថា ការដោះស្រាយសំណុំរឿងកូរ៉េខាងជើងហាក់ដូចជាដំណើរការទៅមុខច្រើន។ លោកត្រាំក៏ឆ្លៀតលើកសរសើរចិនផងដែរ ដែលបានដើរតួនាទីដ៏មានប្រយោជន៍ក្នុងសំណុំរឿងកូរ៉េខាងជើង។
ទស្សនកិច្ចរបស់លោកដូណាល់ ត្រាំ នៅកូរ៉េខាងត្បូងជាដំណាក់កាលពិបាកជាងនៅជប៉ុន
សំរាប់លោកដូណាល់ ត្រាំ ទស្សនកិច្ចនៅកូរ៉េខាងត្បូង មានលក្ខណៈពិបាកជាងទស្សនកិច្ចនៅជប៉ុនទៅទៀត ព្រោះថា ទំនាក់ទំនងរវាងលោកត្រាំ និងប្រធានាធិបតីកូរ៉េខាងត្បូងមិនជាស្និទ្ធស្នាលកក់ក្តៅ ដូចជាមួយលោកស្ហ៊ីនហ្សូ អាបេ នៅជប៉ុនទេ។ ប្រជាជនកូរ៉េខាងត្បូងទៀតសោតក៏បានធ្វើបាតុកម្មប្រឆាំងលោកដែរ។
ទំនាក់ទំនងរវាងលោកត្រាំ និងលោកមូន ចែអ៊ីន មិនសូវជាកកក់ក្តៅ ក៏ដោយសារតែប្រធានាធិបតីកូរ៉េខាងត្បូង មូន ចែអ៊ីន ចង់ចរចាជាមួយមេដឹកនាំកូរ៉េខាងជើង គឹម ជុងអ៊ុន ដើម្បីដោះស្រាយបញ្ហាតានតឹង។ ដោយសាររឿងនេះ លោកត្រាំ កន្លងមក ធ្លាប់រិះគន់លោកមូនចែអ៊ីន។ ត្បិតថា ទស្សនកិច្ចនៅសេអ៊ូលពេលនេះ ពិបាកជាងនៅជប៉ុន ប៉ុន្តែ លោកដូណាល់ ត្រាំ និងលោកមូនចែអ៊ីន នៅតែញញឹមញញែមរកគ្នាតាមបែបការទូត ព្រោះពួកគាត់ដឹងច្បាស់ថា អាមេរិកនិងកូរ៉េខាងត្បូងនៅតែត្រូវការគ្នាទៅវិញទៅមក ក្នុងការដោះស្រាយវិបត្តិនុយក្លេអ៊ែរបស់ក្រុងព្យុងយ៉ាង។
ល្ងាចមិញ មុនមកដល់សេអ៊ូល លោកដូណាល់ ត្រាំ ចេះប្រើពាក្យពេចន៍លើកសរសើរលោកមូន ចែអ៊ីន មុនរួចទៅហើយថា លោកត្រៀមជួបចរចាជាមួយលោកមូន ដែលជាមនុស្សមានតម្លៃ។ ចំណែក លោកមូន ចែអ៊ីន វិញ ល្ងាចថ្ងៃចន្ទម្សិលមិញនេះ ក៏បានប្រកាសបន្ថែមទណ្ឌកម្មទៅលើកូរ៉េខាងជើងដែរ វាជាការបង្ហាញទៅអាមេរិកថា កូរ៉េខាងត្បូងចង់ចរចាជាមួយលោកគឹម ជុងអ៊ុនក៏ពិតមែន តែក៏មិនបណ្តោយតាមអ្វីដែលលោកគឹម ជុងអ៊ុន ចង់បានដែរ។ ត្រង់នេះ យើងឃើញថា មេដឹកនាំអាមេរិក និងមេដឹកនាំកូរ៉េខាងត្បូង សុទ្ធតែមិនចង់រិះគន់គ្នាឥតប្រយោជន៍ដោយសារតែរឿងកូរ៉េខាងជើងតែមួយមុខទេ។
ត្បិតថា កូរ៉េខាងត្បូងសម្រេចបន្ថែមទណ្ឌកម្មលើកូរ៉េខាងជើងក៏ពិតមែន ប៉ុន្តែ លោកមូន ចែអ៊ីន ក៏មិនភ្លេចទាមទារអោយលោកដូណាល់ ត្រាំ មុននឹងប្រើអន្តរាគមយោធាណាមួយប្រឆាំងក្រុងព្យុងយ៉ាង ត្រូវតែមានការយល់ព្រមជាមុនពីកូរ៉េខាងត្បូងដែរ។ ប្រធានាធិបតីកូរ៉េខាងត្បូងបារម្ភដូច្នេះ ដោយសារតែម្សិលមិញនេះ លោកត្រាំ និងនាយករដ្ឋមន្ត្រីជប៉ុន សុទ្ធតែគាំទ្រពីជម្រើសគ្រប់បែបយ៉ាង ដើម្បីដោះស្រាយបញ្ហាកូរ៉េខាងជើង វាអាចជាជម្រើសយោធាក៏ថាបាន បើយើងមើលចរឹតលោកត្រាំ ដែលតែងតែឆេវឆាវនោះ។
ដោយឡែក ប្រធានាធិបតីកូរ៉េខាងត្បូងសង្ឃឹមថា ទស្សនកិច្ចលោកត្រាំ នៅសេអ៊ូលពេលនេះ អាចជួយបន្ថយការបារម្ភរបស់ជនជាតិកូរ៉េខាងត្បូង ដែលខ្លាចមានសង្គ្រាមផ្ទុះនោះដែរ។ ប្រជាជនកូរ៉េខាងត្បូងមានការយល់ឃើញផ្សេងគ្នាចំពោះលោកត្រាំ។ អ្នកខ្លះយល់ថា លោកត្រាំ មិនអាចដោះស្រាយបញ្ហាឧបទ្វីបកូរ៉េទេ តែអ្នកខ្លះទៀតគិតថា លោកត្រាំ អាចជួយដោះស្រាយបាន។
លោកមូន ចែអ៊ីន នៅតែចងចាំពីសគុណរបស់អាមេរិកដែលបានជួយជម្លៀសប្រជាជនកូរ៉េ ក្នុងសម័យសង្គ្រាមកូរ៉េទស្សវត្សឆ្នាំ១៩៥០នោះ។ ឱពុកម្តាយរបស់លោកក៏ជាអ្នកដែលបានភៀសខ្លួនពីកូរ៉េខាងជើងតាមកប៉ាល់អាមេរិកមួយគ្រឿងដែរ កាលនោះ។
តើលោកដូណាល់ ត្រាំ សង្ឃឹមបានអ្វីពីទស្សនកិច្ចនៅសេអ៊ូល ?
ដូចយើងបានដឹងជាចំបងអញ្ចឹង ប្រធានាធិបតីអាមេរិកសង្ឃឹមថា ទស្សនកិច្ចនៅសេអ៊ូល ក៏ដូចជានៅអាស៊ី សប្តាហ៍នេះ អាចជួយជំរុញរកបានដំណោះស្រាយវិបត្តិនុយក្លេអ៊ែរកូរ៉េខាងជើង។ លោកត្រាំ បានឆ្លៀតសរសើរចិនរួចទៅហើយថា តួនាទីចិនមានប្រយោជន៍ក្នុងការដោះស្រាយបញ្ហានេះ។ ហើយលោកក៏បានឆ្លៀតបង្ហាញក្តីសង្ឃឹមថា រុស្ស៊ីអាចដើរតួនាទីសំខាន់និងមានប្រយោជន៍ដូចចិនដែរ។ លោកត្រាំសរសើរចិន ទាំងមិនទាន់បានជាន់ដីចិនផង ដូច្នេះ ឃើញថា លោកបានខំបន្ទន់សំដីសំដៅចំពោះចិននិងរុស្ស៊ី ដើម្បីជួយបន្ថយភាពតានតឹង។ លោកត្រាំ ដឹងច្បាស់ថា ចិននិងរុស្ស៊ីសុទ្ធតែផ្តល់អាទិភាពដល់ភាពអំណត់ និងការចរចាការទូត ជាជាងការប្រើកម្លាំងយោធា ប្រឆាំងនឹងក្រុងព្យុងយ៉ាង។ ពាក្យចាស់លើកឡើងថា "ចូលស្ទឹងតាមបទ" បើលោកដូណាល់ ត្រាំ មិនបង្ហាញភាពអត់ធ្មត់ ក្នុងនយោបាយទាក់ទងនឹងកូរ៉េខាងជើង ស្របតាមចិននិងរុស្ស៊ី អ្វីៗក៏ពិបាកនឹងដោះស្រាយដែរ ហើយទស្សនកិច្ចលោកនៅអាស៊ីអាចបរាជ័យបាន។
ដោយឡែក ទស្សនកិច្ចលោកត្រាំ នៅសេអ៊ូល ក៏មានទិសដៅស្វែងរកផលប្រយោជន៍ទំនាក់ទំនងទ្វេភាគីអាមេរិក-កូរ៉េខាងត្បូងដែរ។ មូលដ្ឋានយោធា Camp Humphreys នៅកូរ៉េខាងត្បូង មានទាហានអាមេរិក២ម៉ឺន៨ពាន់៥រយនាក់ ជាមូលដ្ឋានយោធាសំខាន់មួយធំរបស់អាមេរិក នៅអាស៊ី។
កូរ៉េខាងត្បូងជួយឧបត្ថម្ភមូលដ្ឋានអាមេរិកដល់ទៅជាង៩០ភាគរយឯណោះ។ អញ្ចឹងអាមេរិកមិនអាចមើលរំលងកូរ៉េខាងត្បូងទេ។ រដ្ឋបាលអាមេរិកបានប្រកាសថា ប៉ុន្មានថ្ងៃខាងមុខនេះ កប៉ាល់ផ្ទុកយន្តហោះអាមេរិក៣គ្រឿងដែលបានដាក់នៅតំបន់ប៉ាស៊ីហ្វិកខាងលិច នឹងធ្វើសមយុទ្ធយោធាធំមួយ ដែលមិនធ្លាប់មានក្នុងតំបន់។
អ្វីគួរកត់សម្គាល់គឺថា លោកដូណាល់ ត្រាំ សង្ឃឹមរកបានកិច្ចព្រមព្រៀងជាមួយកូរ៉េខាងត្បូង ទាក់ទងនឹងការទិញសព្វាវុធយោធាអាមេរិក។ ថ្ងៃនេះ លោកដូចជាបានសម្រេចបំណងហើយ ដោយបានប្រកាសថា កូរ៉េខាងត្បូងនឹងទិញអាវុធតម្លៃរាប់ពាន់លានដុល្លារពីអាមេរិក ដើម្បីប្រឈមនឹងការគំរាមកំហែងពីកូរ៉េខាងជើង។ ដូចគេធ្លាប់ដឹងជាទូទៅអញ្ចឹង អាមេរិកមិនភ្លេចគិតគូររឿងរកស៊ីនៅគ្រប់ទិសទីទេ រឹតតែមិនភ្លេចពីការលក់អាវុធយោធាទៅបរទេសទៅទៀត ដើម្បីយកថវិកាទៅដោះស្រាយឱនភាពសេដ្ឋកិច្ចក្នុងស្រុក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ