នៅប៉ាពូអាស៊ី នូវែលហ្គីណេ តុលាការបែរខ្នងដាក់ជនភៀសខ្លួន
តុលាការកំពូលរបស់ប្រទេសប៉ាពូអាស៊ី នូវែលហ្គីណេ នៅថ្ងៃអង្គារនេះបានបដិសេធ មិនទទួលយក ការសុំទាមទាររបស់ជនភៀសខ្លួន ដែលកំពុងជាប់ក្នុងជំរំភៀសខ្លួន នៅលើកោះម៉ានុស។ ជនភៀសខ្លួន ប្រមាណ ៦០០នាក់ ដែលបដិសេធ មិនចាកចេញ ពីជំរំភៀសខ្លួនរបស់អូស្ត្រាលី លើកោះ ម៉ានុស បានដាក់ពាក្យបណ្តឹង ទៅតុលាការ ប៉ាពូអាស៊ី នូវែលហ្គីណេ ដើម្បីសុំឲ្យមានការផ្តល់ទឹក ភ្លើង និងអាហារ ដល់ពួកគេ ឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
មួយសប្តាហ៍មកហើយ ដែលជនភៀសខ្លួន នៅលើកោះម៉ានុស បានរស់នៅដោយ គ្មានទឹក ភ្លើង និងអាហារ។ នៅថ្ងៃទី៣១ តុលា កន្លងទៅ រដ្ឋាភិបាលអូស្រា្តលី ដែលគ្រប់គ្រងលើជំរំជនភៀសខ្លួន នៅលើកោះ ម៉ានុស បានដកទាំងស្រុង បុគ្គលិក និងបិទបញ្ចប់សកម្មភាពរបស់ខ្លួន នៅក្នុងជំរំជនភៀសខ្លួន ទៅតាមការបញ្ជាររបស់តុលាការប៉ាពូអាស៊ី នូវែលហ្គីណេ ដែលបានចាត់ទុក ការចាប់ឃុំ ជនភៀសខ្លួន ថា ជាសកម្មភាពប្រឆាំង ខុសនឹងច្បាប់រដ្ឋធម្មនុញ្ញប៉ាពូអាស៊ី នូវែលហ្គីណេ។
តុលាការកំពូលរបស់ប៉ាពូអាស៊ី នូវែលហ្គីណេ ដដែល នៅថ្ងៃនេះ បានបដិសេធ មិនឆ្លើយតបទៅនឹងការទាមទាររបស់ជនភៀសខ្លួន ចំនួន ៦០០នាក់ ដែលនៅក្រាញ មិនព្រមចាកចេញពីមណ្ឌលឃុំខ្លួន របស់អូស្ត្រាលី។ នៅក្នុងការសម្រេចរបស់ខ្លួន ចៅក្រមរបស់តុលាការកំពូលបានលើកឡើងថា ជនភៀសខ្លួន គ្មានអំណះអំណាងគ្រប់គ្រាន់ ដើម្បីបញ្ជាក់ពីមូលហេតុ ដែលគេមិនព្រមចាកចេញពីជំរំ។ អាចនិយាយបានថា ទឹកភ្លើង និងអាហារ មិនអាចត្រូវផ្តល់ ទៅអ្នករស់នៅក្នុងជំរំ ដែលតាមពិត ត្រូវបង្កើតឡើង ដោយខុសនឹងច្បាប់របស់ប៉ាពូអាស៊ី នូវែលហ្គីណេនោះ។
មេធាវីរបស់ជនភៀសខ្លួន ឈ្មោះ Boochani បាននិយាយថា គេនឹងធ្វើបណ្តឹងឧទ្ធរណ៍បន្តទៀត។ Boochani ដែលនិយាយក្នុងនាមរបស់ជនភៀសខ្លួន មកពី អ៊ីរ៉ាក់ អ៊ីរ៉ង់ សូម៉ាលី អាហ្វានីស្ថាន ឬវៀតណាម បានចាត់ទុកការសម្រេចរបស់តុលាការប៉ាពូអាស៊ី នូវែលហ្គីណេថា ជាការបំភ្លេចចោល ជីវិត មនុស្ស និងថា គ្មានទេ យុត្តិធម៌សម្រាប់ពួកគេ។ អង្គការការពារសិទ្ធិមនុស្សអន្តរជាតិAmnesty Internationalបានចាត់ទុកការសម្រេចរបស់តុលាការថា ជាការធ្វើឲ្យអន្តរាយដល់ជីវិតមនុស្ស។
ទៅតាមការសម្រេចរបស់តុលាការ ដែលទាមទារឲ្យបិទមណ្ឌលឃុំខ្លួនរបស់អូស្ត្រាលី នៅលើកោះ ម៉ានុស ជនភៀសខ្លួនត្រូវគេបែងចែក យកទៅដាក់ នៅកន្លែងរស់នៅផ្សេងទៀត នៅលើកោះ ម៉ានុស និងនៅលើកោះ ណូរុ។ ប៉ុន្តែ ជនភៀសខ្លួន បានបដិសេធ មិនព្រមចាចេញ ពីជំរំនៅម៉ានុស ដោយសារតែខ្លាចបារម្ភពីការវាយប្រហារ ស្អប់ឈ្នានិស្ត របស់ប្រជាជនក្នុងស្រុក នៅប៉ាពូអាស៊ី នូវែលហ្គីណេ។ អនាធិបតេយ្យ និងអស្ថិរភាពរបស់ជនភៀសខ្លួន នៅលើកោះ ម៉ានុស ជាលទ្ធផលនៃនយោបាយរើសអើង ប្រឆាំងជនអន្តោប្រវេសន៍របស់រដ្ឋាភិបាលអូស្រា្តលី ដែលបានអនុវត្តនយោបាយបង្កើតជំរំ នៅក្នុងទឹកដីបរទេស សម្រាប់ដាក់ឃុំ ឃាត់ទុក រាល់ជនភៀសខ្លួន ដែលធ្វើដំណើរតាមទូក សំដៅទឹកដីអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ