ទាហានកូរ៉េខាងជើងម្នាក់រត់ចូលទៅកូរ៉េខាងត្បូង
ទាហានកូរ៉េខាងជើងម្នាក់ បានរត់ចូលទៅកូរ៉េខាងត្បូងកាលពីរសៀលថ្ងៃចន្ទម្សិលមិញ ដោយបានឆ្លងកាត់ព្រំដែនដែលខណ្ឌចែករវាងកូរ៉េខាងជើងនិងកូរ៉េខាងត្បូង។ គឺជាតំបន់មួយដែលមានកងទ័ពកូរ៉េទាំងពីរយ៉ាងសន្ធឹកសន្ធាប់។ ទាហានកូរ៉េខាងជើងនោះ ត្រូវរងរបួសដោយគ្រាប់កាំភ្លើងរបស់កងទ័ពខ្លួន។ រីឯទាហានកូរ៉េខាងត្បូងវិញ បានតម្លើងកំរិតប្រុងប្រយ័ត្នរបស់ខ្លួន ដោយបារម្ភខ្លាចមានការបង្កហេតុណាមួយពីសំណាក់ទ័ពកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
គឺជាការរត់ចោលជួរមួយពុំសូវជាអស្ចារ្យណាស់ណាទេ។ ទាហានកូរ៉េខាងជើងរូបនោះ បានធ្វើការឆ្លងកាត់ព្រំដែននៅ Panmunjom “ដែលជាតំបន់សន្តិសុខរួម”និងក៏ជាចំណុចនៃទំនាក់ទំនងតែមួយគត់រវាងកូរ៉េទាំងពីរ។ នៅទីនោះ កងទ័ពកូរ៉េទាំងពីរ តែងតែប្រឈមមុខគ្នាដោយមានអាវុធនៅក្នុងដៃតែប៉ុណ្ណោះនិងក៏នៅឆ្ងាយពីគ្នាតែពីរឬ៣ម៉ែត្រប៉ុណ្ណោះ។
យោងតាមកងទ័ពកូរ៉េខាងត្បូង ទាហានកូរ៉េខាងជើងនោះ បានរត់ចាកចេញពីប៉ុស្តិ៍យាមល្បាតរបស់ខ្លួននៅពាក់កណ្តាលរសៀលម្សិលមិញនិងត្រូវបានកងទ័ពរបស់ខ្លួន ធ្វើការបាញ់រះមកលើរូបគេ នាខណៈពេលរត់ចូលទៅក្នុងទឹកដីកូរ៉េខាងត្បូង។ ទាហានកូរ៉េខាងជើងនោះ បានត្រូវរងរបួសនៅស្មានិងកែងដៃ និងត្រូវបានទាហានកូរ៉េខាងត្បូងរកឃើញនៅចម្ងាយប្រមាណតែ៥០ម៉ែត្រប៉ុណ្ណោះពីព្រំដែន។ បន្ទាប់មក ទាហានកូរ៉េខាងជើងរូបនោះត្រូវបានគេដឹកបញ្ជូនតាមឧត្ថម្ភភាគចក្រឆ្ពោះទៅកាន់មន្ទីរពេទ្យមួយនៅកូរ៉េខាងត្បូង។
ឧប្បត្តិហេតុនេះ ពុំបានបណ្តាលឲ្យមានការបាញ់កាំភ្លើងតទល់គ្នារវាងកងទ័ពកូរ៉េទាំងពីរនោះទេ។
ម្យ៉ាងទៀត ការរត់ចូលទឹកដីកូរ៉េខាងត្បូងបែបនេះ នៅតាមបណ្តោយព្រំដែនដែលមានកងទ័ពកូរ៉េទាំងពីរយ៉ាងសន្ធឹកសន្ធាប់នោះ ក៏ពុំមែនជាហេតុការណ៍លើកទីមួយដែរ។
ពីព្រោះ កាលពីថ្ងៃទី១៣និង២៣ មិថុនាកន្លងទៅនេះ ក៏មានទាហានកូរ៉ខាងជើងចំនួន២រូបដែរដែលបានឆ្លងកាត់បណ្តោយព្រំដែនដែលខណ្ឌចែករវាងកូរ៉េខាងជើងនិងកូរ៉េខាងត្បូងនេះដែរ។
ទោះបីជាមានភាពតានតឹងរវាងកូរ៉េទាំងពីរយ៉ាងណាក្តី តំបន់សន្តិសុខរូមនៅ Panmunjeom បានក្លាយទៅជាតំបន់ទេសចរណ៍មួយដ៏ពេញនិយមខ្លាំងណាស់នៅក្នុងចំណោមពួកអ្នកទេសចរបរទេស ដោយសារតែពួកគេយល់ឃើញថា តំបន់នោះ គឺជាកេរ្តិ៍ដំណែលមួយក្នុងចំណោមកេរ្តិ៍ដំណែលនានាដែលនៅសេសសល់ចុងក្រោយបង្អស់នៃសង្គ្រាមត្រជាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ