តំណាងការទូតអឺរ៉ុបពិភាក្សាវិបត្តិរ៉ូហ៊ីងយ៉ាជាមួយលោកស្រីស៊ូជី ថ្ងៃចន្ទនេះ
ប្រមុខការទូតអឺរ៉ុប លោកស្រី Federica Mogherini នឹងជួបលោកស្រីអ៊ុងសាន ស៊ូជី ថ្ងៃចន្ទ ២០វិច្ឆិកានេះ ដើម្បីពិភាក្សាពីវិបត្តិជនភៀសខ្លួនរ៉ូហ៊ីងយ៉ា។ ប្រមុខការទូតសហភាពអឺរ៉ុបចង់ផ្តោះប្តូរទស្សនៈយល់ឃើញចំពោះការដោះស្រាយវិបត្តិនេះ ជាមួយលោកស្រីស៊ូជី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
មុននឹងជួបលោកស្រី អ៊ុងសាន ស៊ូជី នៅទីក្រុងរ៉ង់ហ្គូន ប្រទេសភូមា ថ្ងៃចន្ទនេះ លោកស្រីប្រមុខការទូតអឺរ៉ុប Federica Mogherini និងរដ្ឋមន្ត្រីការបរទេសមកពីប្រទេសផ្សេងទៀត មានរដ្ឋមន្ត្រីការបរទេសជប៉ុន បង់ក្លាដែស ស៊ុយអែត និងអាល្លឺម៉ង់ សុទ្ធតែបានទស្សនកិច្ច ជំរំភៀសខ្លួនជនជាតិរ៉ូហ៊ីងយ៉ា ក្នុងទឹកដីបង់ក្លាដែសរួចហើយ។ រដ្ឋមន្ត្រីការបរទេសទាំងអស់នេះក៏បានស្តាប់សាក្សីរ៉ាយរ៉ាប់នៅទីនោះដែរ។
យោងតាមលោកស្រីប្រមុខការទូតសហភាពអឺរ៉ុប ជំនួបជាមួយលោកស្រីស៊ូជី នៅភូមា ថ្ងៃចន្ទនេះ ជាឱកាសផ្តោះប្តូរជាមួយលោកស្រីស៊ូជី នូវទស្សនៈយល់ឃើញ ទាក់ទងការដោះស្រាយវិបត្តិជនភៀសខ្លួនរ៉ូហ៊ីងយ៉ា។ យោងតាមប្រមុខការទូតអឺរ៉ុប ការជួបជាមួយលោកស្រីស៊ូជីមិនមែនជាការដាក់សម្ពាធអ្វីទេ តែជាការស្វែងរកបែបផែនក្នុងការពិភាក្សាច្រើនជាង។ លោកស្រីស៊ូជីតែងរងការរិះគន់ថា បិទភ្នែក មិនអើពើចំពោះជនជាតិរ៉ូហ៊ីងយ៉ា ដែលរងការធ្វើបាបពីអ្នកកាន់ពុទ្ធសាសនាជ្រុលនិយមក្នុងស្រុក ក៏ដូចជាពីសំណាក់កងទ័ព។
សព្វថ្ងៃនេះ ជនភៀសខ្លួនរ៉ូហ៊ីងយ៉ានៅជំរំភៀសខ្លួនបង់ក្លាដែស បានកើនដល់៦០ម៉ឺននាក់។ ពួកគេបានគេចខ្លួនពីហិង្សាយោធា រដ្ឋរ៉ាក់ឃីនភាគខាងលិច តាំងពីខែសីហាមក។ ក្រោយក្រុមឧទ្ទាមរ៉ូហ៊ីងយ៉ាវាយប្រហារលើប៉ុស្តិ៍ប៉ូលិស កាលពីខែសីហា កងទ័ពភូមាបានបើកប្រតិបត្តិការបោសសម្អាត នៅរដ្ឋរ៉ាក់ឃីន។
កងទ័ពភូមាចោទថា ជនជាតិរ៉ូហ៊ីងយ៉ាដែលរត់ភៀសខ្លួនចេញពីភូមា សុទ្ធតែជាក្រុមភេរវជនដែលនាំទាំងក្រុមគ្រួសារ គេចទៅបង់ក្លាដែស។ កងទ័ពភូមាថែមទាំងទាត់ចោលនូវការចោទប្រកាន់របស់អង្គការសហប្រជាជាតិដែលវាយតម្លៃថា ប្រតិបត្តិការយោធាភូមាជាការបោសសម្អាតពូជសាសន៍។ ប្រមុខទ័ពភូមា មីន អ៊ុងឡាំង ទើបតែដាក់ លក្ខខណ្ឌនៅសប្តាហ៍កន្លងទៅថា ជនភៀសខ្លួនរ៉ូហ៊ីងយ៉ាអាចត្រលប់ចូលស្រុកភូមាវិញ លុះត្រាតែជនជាតិភូមាម្ចាស់ស្រុកយល់ព្រមទទួលពួកគេ។
ការពិភាក្សាវិបត្តិរ៉ូហ៊ីងយ៉ា រវាងរដ្ឋាភិបាលភូមានិងបង់ក្លាដែសទៀតសោត ក៏ជួបបញ្ហាស្មុគស្មាញ ដោយសារតែភាគីចរចាមិនត្រូវរ៉ូវគ្នាលើអត្តសញ្ញាណ និងកូតាជនភៀសខ្លួនរ៉ូហ៊ីងយ៉ាដែលត្រូវត្រលប់ទៅភូមាវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ