រដ្ឋមន្ត្រីក្រសួងការបរទេសកូរ៉េខាងជើង បំពេញទស្សនកិច្ចនៅគុយបានៅថ្ងៃចន្ទនេះ
រដ្ឋមន្ត្រីក្រសួងការបរទេសកូរ៉េខាងជើង លោក Ri Yong Ho អញ្ជើញទៅបំពេញទស្សនកិច្ចនៅគុយបានាថ្ងៃចន្ទនេះ នៅខណៈពេលដែលកូរ៉េខាងជើងនិងគុយបា កំពុងតែមានភាពតានតឹងជាមួយនឹងសហរដ្ឋអាមេរិក។ ជាទស្សនកិច្ចនៅក្នុងប្រទេសសម្ព័ន្ធមិត្តចុងក្រោយបង្អស់របស់ខ្លួន និងនៅខណៈពេលដែលកូរ៉េខាងជើងកំពុងមានភាពតានតឹងជាមួយនឹងសហរដ្ឋអាមេរិក និងរងនូវភាពទោលឯកា ទាំងនៅលើការទូតនិងសេដ្ឋកិច្ច ដោយសារតែកម្មវិធីនុយក្លេអ៊ែរនិងបាលីស្ទីករបស់កូរ៉េខាងជើង៕
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
នៅក្នុងសេចក្តីជូនដំណឹងសង្ខេបមួយកាលពីយប់ថ្ងៃសៅរ៍មុន រដ្ឋមន្ត្រីការបរទេសគុយបា បានគូសបញ្ជាក់ប្រាប់ថា នៅគុយបា រដ្ឋមន្ត្រីការបរទេសកូរ៉េខាងជើងលោកRi Yong Ho ត្រូវជួបប្រាស្រ័យជាមួយសមភាគីគុយបា លោក Bruno Rodriguez Parilla និងចូលរួមក្នុងព្រឹត្តិការណ៍ផ្សេងៗទៀត។
ដំណើរទស្សនកិច្ចរបស់រដ្ឋមន្ត្រីការបរទេសកូរ៉េខាងជើងនៅគុយបាដែលជាប្រទេសសម្ព័ន្ធមិត្តមួយចុងក្រោយរបស់កូរ៉េខាងជើង ត្រូវប្រព្រឹត្តទៅនៅខណៈពេលដែលកូរ៉េខាងជើង កំពុងមានភាពតានតឹងជាមួយនឹងសហរដ្ឋអាមេរិកនិងនៅទោលឯកាទាំងនៅលើផ្នែកការទូតនិងសេដ្ឋកិច្ច ដោយសារតែកម្មវិធីនុយក្លេអ៊ែរនិងបាលីស្ទីករបស់ព្យុងយ៉ាង ជាមួយនឹងការគំរាមយ៉ាងធំធេងដោយសារគ្រាប់មីស៊ីលកូរ៉េខាងជើងអាចបាញ់ទៅដល់ទឹកដីអាមេរិក។
នៅលើទំនាក់ទំនងរវាងទីក្រុងវ៉ាស៊ីនតោននិង La Havane ដែលត្រូវបានរៀបចំឡើងនៅឆ្នាំ ២០១៥ បន្ទាប់ពីបាក់បែកអស់ពាក់កណ្តាលសតវត្សមក ក៏នៅតែពុំទាន់ជាស្រូលបួលនឹងគ្នាវិញទេ ជាពិសេសចាប់តាំងពីលោក Donald Trump បានឡើងកាន់មុខតំណែងជាប្រធានាធិបតីអាមេរិកតាំងពីខែមករាមក។
រីឯទីក្រុងឡា ហាវ៉ាននិងព្យុងយ៉ាងវិញ ក៏ពុំសូវមានទំនាក់ទំនងពាណិជ្ចកម្មជាមួយគ្នាទេ តែប្រទេសទាំងពីរនេះ ត្រូវជាប់ចោទរួមគ្នាពីបទរំលោភលើទណ្ឌកម្មរបស់អសប ដោយកាលពីឆ្នាំ ២០១៣ នាវាដឹកទំនិញកូរ៉េខាងជើងមួយគ្រឿងត្រូវបានគេព័ទ្ធស្កាត់ចាប់នៅប៉ាណាម៉ា។ នៅក្នុងនាវានោះ គេបានរកឃើញសារធាតុសម្រាប់ផ្សុំធ្វើមីស៊ីលនិងយន្តហោះពីរគ្រឿងជំនាន់សម័យសូវៀត លាក់នៅពីខាងក្រោមបាវស្ករ សជាច្រើនពាន់តោន។
ម្យ៉ាងទៀត នៅខណៈពេលដែលទំនាក់ទំនងរវាងគុយបានិងសហរដ្ឋអាមេរិក កំពុងធ្លាក់ចុះនាពេលថ្មីៗនេះ កូរ៉េខាងជើងវិញ ក៏កំពុងតែនឹកស្រម័យថា នេះជាឱកាសល្អមួយសម្រាប់ប្រទេសខ្លួន ដើម្បីព្យាយាមគេចផុតពីគំនាបទណ្ឌកម្មនានាដែលកំពុងតែរឹតបន្តឹងកាន់តែខ្លាំងឡើងៗពីមួយថ្ងៃទៅមួយថ្ងៃមកលើកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ