អ.ស.ប.៖ពលរដ្ឋរ៉ូហ៊ីងយ៉ាអាចជាជនរងគ្រោះដោយអំពើប្រល័យពូជសាសន៍
នៅថ្ងៃអង្គារ ទី៥ ធ្នូ ក្រុមប្រឹក្សាសិទ្ធិមនុស្សអន្តរជាតិបានសម័យប្រជុំវិសាមញ្ញក្នុងទីក្រុងហ្សឺណែវ ប្រទេសស្វ៊ីសដើម្បីនិយាយពីស្ថានភាពពលរដ្ឋរ៉ូហ៊ីងយ៉ានៅក្នុងប្រទេសភូមា។ ថ្លែងនៅក្នុងសម័យប្រជុំវិសាមញ្ញ លោក Zeid Ra’ad al Hussein ឧត្តមស្នងការសិទ្ធិមនុស្សអន្តរជាតិបានបរិហារលើផែនការរៀបចំទុកមុនរបស់កម្លាំងសន្តិសុខភូមាប្រឆាំងជនជាតិភាគតិចរ៉ូហ៊ីងយ៉ា។ តាមលោក Hussein ទង្វើរបស់កម្លាំងសន្តិសុខភូមារបៀបនេះអាចចាត់ទុកជាអំពើប្រល័យពូជសាសន៍។
ចុះផ្សាយនៅថ្ងៃ៖
ស្តាប់ - ០១:៥៣
កន្លងមក អង្គការសហប្រជាជាតិធ្លាប់បានចាត់ទុកការធ្វើទុក្ខបុកម្នេញលើពលរដ្ឋរ៉ូហ៊ីងយ៉ាពីសំណាក់កងទ័ពភូមានៅក្នុងរដ្ឋរ៉ាក់ឃីនថាជាការបោសសំអាតជនជាតិភាគតិច។ តែលើកនេះ ឧត្តមស្នងការសិទ្ធិមនុស្សអន្តរជាតិលោក Zeid Ra’ad al Hussein បានប្រើពាក្យធ្ងន់ៗដោយចាត់ទុកជាអំពើប្រល័យពូជសាសន៍។ ការហ៊ានប្រើពាក្យ « ប្រល័យពូជសាសន៍ » ដោយលោក Hussein សំអាងលើភស្តុតាងមួយចំនួនដូចជា ការដុតបំផ្លាញផ្ទះសម្បែងរបស់ពួករ៉ូហ៊ីងយ៉ាជាមួយនឹងមនុស្សចាស់ កូនក្មេងនៅខាងក្នុង ការបាញ់រះលើពួករ៉ូហ៊ីងយ៉ាដោយមិនរើសមុខ ឬមួយក៏ការជម្លៀសពួករ៉ូហ៊ីងយ៉ាចេញពីលំនៅដ្ឋានដោយបង្ខំ។
បើទង្វើទាំងអស់នេះមិនមែនជាអំពើប្រល័យពូជសាសន៍ តើវាជាទង្វើអ្វី? នេះជាការចោទសួររបស់លោក Hussein ដោយបន្ថែមថា លោកបានស្នើក្រុមប្រឹក្សាឲ្យចាត់វិធានការគ្រប់បែបយ៉ាងដើម្បីបិទបញ្ចប់វិបត្តិមួយនេះ។ បន្ទាប់មក លោក Hussein ក៏បានបញ្ជាក់ពីការចង់ឃើញការវិលត្រឡប់ប្រកបដោយលក្ខខណ្ឌសន្តិសុខ និងសុវត្ថិភាពល្អរបស់ជនភៀសខ្លួនរ៉ូហ៊ីងយ៉ាប្រមាណជា ៦២៦ ០០០នាក់ពីជំរំស្ថិតក្នុងប្រទេសបង់ក្លាដែសទៅកាន់ប្រទេសភូមាវិញ។ នៅត្រង់ចំណុចនេះ លោកឯកអគ្គរដ្ឋទូត Htin Lynn ប្រចាំក្រុមប្រឹក្សាសិទ្ធិមនុស្សអន្តរជាតិបានអះអាងថា រដ្ឋាភិបាលភូមាកំពុងធ្វើការជាមួយរដ្ឋាភិបាលបង់ក្លាដែសដើម្បីធានាការវិលត្រឡប់របស់ពួករ៉ូហ៊ីងយ៉ាក្នុងរយៈពេល ២ខែ។
យ៉ាងណាក៏ដោយ លោក Hussein បានស្នើឲ្យមានការបង្កើតយន្តការណ៍យុត្តិធម៌ និងឯករាជ្យមួយដើម្បីស៊ើបអង្កេតលើឧក្រិដ្ឋកម្មដែលប្រព្រឹត្តនៅភូមាដូចដែលធ្លាប់បានបង្កើតឡើងសម្រាប់ប្រទេសស៊ីរី។ តែឧបសគ្គអាចនឹងកើតមានដូចនៅស៊ីរីដែរ គឺរដ្ឋអំណាចភូមាមិនចង់ឃើញវត្តមានក្រុមអ្នកស៊ើបអង្កេតអន្តរជាតិនៅលើទឹកដីរបស់ខ្លួនទេ ពិសេសនៅរដ្ឋរ៉ាក់ឃីនដែលសម្បូរពលរដ្ឋរ៉ូហ៊ីងយ៉ារស់នៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ