ហ្វីលីពីន ស្លាប់២៦នាក់ និងបាត់ខ្លួនជាច្រើននាក់ក្រោយព្យុះត្រូពិក Kai-Tak
មានស្លាប់យ៉ាងហោចណាស់២៦នាក់ នៅក្នុងគ្រោះហូរបាក់ដី បង្កឡើងដោយខ្យល់ព្យុះត្រូពិក កៃតាក់ ដែលកំពុងបោកបក់លើភាគកណ្តាលនិងភាគខាងកើតនៃហ្វីលីពីន តាំងពីថ្ងៃសៅរ៍មក។ មនុស្ស២៣នាក់ផ្សេងទៀត កំពុងបាត់ខ្លួន។ កាលពីថ្ងៃសៅរ៍ជាកិច្ចការពារ អាជ្ញាធរបានជម្លៀសប្រជាពលរដ្ឋប្រមាណ៨៨០០០នាក់។
ចុះផ្សាយនៅថ្ងៃ៖
ស្តាប់ - ០២:០២
ព្យុះសង្ឃរា កៃតាក់ អស់អំណាចនិងបានក្លាយជាព្យុះភ្លៀងត្រូពិកវិញ នៅថ្ងៃអាទិត្យ និងពេលបោកបក់លើដែនដីគោកហ្វីលីពីន។ ប៉ុន្តែយោលទៅលើកម្លាំងខ្យល់ និងទឹកភ្លៀងដ៏ជោគជាំខ្លាំង រយៈពេលបីថ្ងៃបីយប់ បានបង្កឱ្យផ្ទាំងថ្មធំៗប៉ុនឡានក៏រលំទាំងផ្ទាំងៗ បុកបំបែកផ្ទះថ្ម ... នេះជាការរៀបរាប់របស់អាជ្ញាធរហ្វីលីពីនដែលបានព្រមានបន្ថែមអំពីគ្រោះហូរបាក់ដី និងទឹកជំនន់នៅថ្ងៃបន្តបន្ទាប់។
ព្យុះកៃតាក់លែងសូវកំណាចមែន ប៉ុន្តែរសាត់ចេញយឺតៗ ជាហេតុធ្វើសង្កាត់ខ្លះ នៃកោះ Samar ត្រូវប្រឈមនឹងគ្រោះទឹកជំនន់យ៉ាងគំហុក សង្កាត់ខ្លះទៀតនៃកោះLeyte ត្រូវលង់លិចអស់ចំនួនជាង៨០%។
បើតាមភ្នាក់ងារគ្រប់គ្រងគ្រោះធម្មជាតិ ការខូចខាតជាសម្ភារៈមានទំហំ ចរន្តអគ្គីសនីត្រូវកាត់ផ្តាច់ក្នុងមូលដ្ឋានចំនួន៣៩នៃកោះ ស្ពាន ផ្លូវថ្នល់ ជាច្រើនត្រូវខូចខាត។ អ្នកដំណើរជាង១៥០០០នាក់ ដែលភាគច្រើនជាអ្នកកាន់សាសនាគ្រឹស្ត ចង់ទៅជួបជុំគ្រួសារដើម្បីបារព្វពិធីបុណ្យណូអែលនិងចូលឆ្នាំសកល កំពុងជាប់កុន នៅកណ្តាលទីអស់ជាច្រើនថ្ងៃមកហើយ ព្រោះចរាចរណ៍ផ្លូវទឹកឆ្លងសាឡាង ត្រូវបានផ្អាក និងកាត់ផ្តាច់។
កាន់តែធ្ងន់ធ្ងរជាងនេះទៀត ចំនួនអ្នករងគ្រោះដល់ស្លាប់ ដោយកម្លាំងទឹកភ្លៀងហូរច្រោះបាក់ដី បានកើនឡើងឥតឈប់។ អភិបាលខេត្តបានជូនដំណឹង តាមកញ្ចក់ទូរទស្សន៍ថាគិតមកត្រឹមល្ងាចថ្ងៃអាទិត្យនេះ ចំនួនមនុស្សស្លាប់បានឡើងដល់ ២៦នាក់ និងបាត់ខ្លួន២៣នាក់។
សូមបញ្ជាក់ថា កោះសាម៉ា Samar និងកោះលៃតេ Leyte របស់ហ្វីលីពីននេះ ធ្លាប់ជួបគ្រោះមហន្តរាយដ៏ធ្ងន់ធ្ងរខ្លាំងកាលពីឆ្នាំ២០១៣ ដោយព្យុះកំណាច ហៃយ៉ាន ដែលបានសម្លាប់ជីវិតមនុស្សអស់ជាង ៧៣៥០នាក់។ ប្រជាជនមួយភាគធំមិនទាន់ស្តារជីវភាព បានរួចផង។ ក្នុងមួយឆ្នាំៗ ហ្វីលីពីនត្រូវព្យុះសង្ឃរាទីហ្វុងប្រមាណជាង២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ