ក្រុមប្រឹក្សាសន្តិសុខអង្គការសហប្រជាជាតិបានរឹតបន្តឹងទណ្ឌកម្មថ្មីប្រឆាំងកូរ៉េខាងជើង
ចុះផ្សាយនៅថ្ងៃ៖
ស្តាប់ - ០៤:៥៧
នៅថ្ងៃសុក្រ ទី២២ ធ្នូ ក្រុមប្រឹក្សាសន្តិសុខអង្គការសហប្រជាជាតិបានអនុម័តជាឯកច្ឆន្ទលើសេចក្តីសម្រេចចិត្តមួយដាក់ទណ្ឌកម្មថ្មីប្រឆាំងនឹងកូរ៉េខាងជើងក្នុងសំណុំរឿងនុយក្លេអ៊ែរ និងគ្រាប់មីស៊ីល។ នេះជាទណ្ឌកម្មលើកទី៣ គិតតាំងពីដើមឆ្នាំ ២០១៧ នេះ ហើយជាលើកទី១០ បើគិតតាំងពីឆ្នាំ ២០០៦ មក។ អ្វីជាការកត់សម្គាល់ នៅក្នុងចំណោមទណ្ឌកម្មទាំង ១០លើកអនុម័តដោយក្រុមប្រឹក្សាសន្តិសុខ មាន ៣ចុងក្រោយជាទណ្ឌកម្មដែលបានស្នើឡើងដោយអាមេរិក និងដោយមានការជជែកពិគ្រោះយោបល់គ្នាជាមួយប្រទេសចិនដែលជាសម្ព័ន្ធមិត្តរបស់កូរ៉េខាងជើង។ កូរ៉េខាងជើងដែលនៅមិនទាន់មានប្រតិកម្មអ្វីតបនឹងទណ្ឌកម្មចុងក្រោយនេះនៅឡើយទេ។
ទណ្ឌកម្មថ្មីលើកទី១០ ប្រឆាំងកូរ៉េខាងជើងអនុម័តដោយក្រុមប្រឹក្សាសន្តិសុខពេលនេះបានសំដៅលើផ្នែកច្រើន តែសំខាន់មានពីរ ទណ្ឌកម្មទី១ គឺសំដៅលើពលករកូរ៉េខាងជើងជាច្រើនពាន់នាក់ដែលកំពុងស្នាក់នៅធ្វើការងារនៅបរទេស ពិសេសនៅក្នុងប្រទេសចិន និងប្រទេសរុស្ស៊ី។ ចូរកុំភ្លេចថា ពលករកូរ៉េខាងជើងនៅបរទេស ជាប្រភពចំណូលមួយយ៉ាងសំខាន់ខ្លាំងណាស់សម្រាប់ជីវភាពក្រុមគ្រួសាររបស់ពួកគេនៅក្នុងស្រុក តែគេមិនត្រូវភ្លេចនិយាយទេថា ក្រៅពីចែកប្រាក់ខែរបស់ខ្លួនទៅឲ្យក្រុមគ្រួសារ ពលករកូរ៉េខាងជើងម្នាក់ៗក៏ត្រូវដកប្រាក់ខែខ្លួនមួយចំណែកទៅឲ្យរដ្ឋដែរ។
ក្រុមប្រឹក្សាសន្តិសុខយល់ឃើញថា របបក្រុងព្យុយ៉ាងមិនបានយកលុយប្រមូលពីពលករខ្លួននៅបរទេសដើម្បីជួយលើកដំកើងជីវភាពរស់នៅប្រចាំថ្ងៃរបស់ពលរដ្ឋទេ តែបែរជាយកទៅអភិវឌ្ឍន៍កម្មវិធីនុយក្លេអ៊ែរ និងផលិតគ្រាប់មីស៊ីលទៅវិញ។ សេចក្តីសម្រេចចិត្តនៅថ្ងៃសុក្រ ទី២២ ធ្នូបានហាមមិនឲ្យទទួលពលករកូរ៉េខាងជើងជាថ្មី និងបានតម្រូវឲ្យមានការបញ្ជូនពលករកូរ៉េខាងជើងនៅបរទេសទាំងអស់ឲ្យត្រឡប់ទៅកាន់ស្រុកកំណើតវិញចាប់ពីពេលនេះទៅដល់ដំណាច់ឆ្នាំ ២០១៩។ ចំណែកទណ្ឌកម្មសំខាន់ទី២ គឺសំដៅលើការទិញ លក់ប្រេងឥន្ធនៈទៅឲ្យរបបក្រុងព្យុងយ៉ាង។
វិធានការមួយនេះធ្លាប់បានចែងនៅក្នុងទណ្ឌកម្មលើកមុនរួចហើយ គ្រាន់តែមានការរឹតបន្តឹងបន្ថែមទៀតនៅក្នុងទណ្ឌកម្មលើកនេះ។ ការលក់ប្រេងឆៅ និងប្រេងចម្រាញ់រួចទៅឲ្យកូរ៉េខាងជើងនឹងត្រូវកាត់បន្ថយចំនួន ៧៥%។ សេចក្តីសម្រេចចិត្តថ្មីបានកម្រិតឲ្យមានការបញ្ជូនប្រេងឆៅទៅឲ្យកូរ៉េខាងជើងត្រឹម ៤លានបារីលក្នុង១ឆ្នាំ ហើយការនាំចូលប្រេងចម្រាញ់រួចនឹងត្រូវកម្រិតត្រឹមតែ ៥០០ ០០០បារីលនៅឆ្នាំ ២០១៨ ទល់នឹង ២លានបារីលនាពេលកន្លងមក។ សេចក្តីសម្រេចចិត្តដដែលបានព្រមានថា បើរបបក្រុងព្យុងយ៉ាងធ្វើការសាកល្បងនុយក្លេអ៊ែរ ឬបាញ់គ្រាប់មីស៊ីលជាថ្មី នោះក្រុមប្រឹក្សាសន្តិសុខនឹងកាត់បន្ថយថែមទៀតលើការនាំចូលផលិតផលប្រេងទៅឲ្យកូរ៉េខាងជើង។
ទណ្ឌកម្មជាគំនាបដើម្បីបង្ខំឲ្យកូរ៉េខាងជើងត្រឡប់ចូលតុចរចា
គិតតាំងពីដើមឆ្នាំ ២០១៧ នេះជាទណ្ឌកម្មលើកទី៣ ហើយបើគិតតាំងពីឆ្នាំ ២០០៦ គឺជាទណ្ឌកម្មលើកទី១០ ដែលក្រុមប្រឹក្សាសន្តិសុខបានដាក់លើកូរ៉េខាងជើង។ តែគេសង្កេតឃើញជាទូទៅថា ទណ្ឌកម្មទាំងអស់នោះមិនត្រឹមតែមិនបានធ្វើឲ្យកូរ៉េខាងជើងរាងចាលទេ តែបែរជាបន្តផ្គើនសហគមន៍អន្តរជាតិកាន់តែខ្លាំងថែមទៀត។ ចូរកុំភ្លេចថារហូតមកដល់ពេលនេះ ពោលតាំងពីកូរ៉េខាងជើងបានយកនុយក្លេអ៊ែរ និងគ្រាប់មីស៊ីលផ្គើនសហគមន៍អន្តរជាតិមក ក្រុមប្រឹក្សាសន្តិសុខហាក់មានជម្រើសតែពីរគត់ ឬមួយថ្កោលទោស និងស្វែងរកទណ្ឌកម្មថ្មីដាក់លើរបបក្រុងព្យុងយ៉ាង ឬមួយក៏ឈរក្រពាត់ដៃមើលការផ្គើនរបស់ក្រុងព្យុងយ៉ាងដោយមិនបញ្ចេញប្រតិកម្មអ្វីទាំងអស់។
ពិតណាស់ថា ទណ្ឌកម្មដាក់លើកូរ៉េខាងជើងអាចធ្វើឡើងជាលក្ខណៈឯកតោភាគីពីប្រទេសបស្ចិមលោកមួយចំនួន ដូចយ៉ាងអាមេរិកជាដើម។ តែការស្វែងរកកុងសង់ស៊ុសរួមជាលក្ខណៈអន្តរជាតិមិនមែនជារឿងងាយស្រួលប៉ុន្មានទេ ពិសេសជាមួយប្រទេសមានសិទ្ធិវ៉េតូដូចយ៉ាងចិន និងរុស្ស៊ីដែលកំពុងទទួលបានប្រយោជន៍ច្រើនពីកូរ៉េខាងជើង។ នៅក្នុងសេចក្តីសម្រេចចិត្តលើកនេះ ចិន និងរុស្ស៊ីបានបោះឆ្នោតគាំទ្រ តែចិនបានបញ្ជាក់ត្រង់ៗថា ទណ្ឌកម្មគ្រាន់ជាមធ្យោបាយមួយដែលគេមិនអាចដោះស្រាយជម្រៅនៃបញ្ហាបានទេ។ ចំណែកខាងរុស្ស៊ីបានអះអាងថា គ្រប់ភាគីមានកាតព្វកិច្ចជំរុញឲ្យមានកិច្ចចរចាជាបន្តទៀត។
គេអាចនិយាយបានថា ទណ្ឌកម្មលើកទី១០ និងប្រហែលមិនមែនជាលើកចុងក្រោយពេលនេះគ្រាន់ជាសារមួយថ្មីបន្ថែមទៀតដែលសហគមន៍អន្តរជាតិចង់បញ្ជូនទៅកាន់មនុស្សខ្លាំងកូរ៉េខាងជើងលោកគីម ជុនអ៊ុនប៉ុណ្ណោះ។ សូម្បីតែអាមេរិកខ្លួនឯងដែលជាអ្នកផ្តួចផ្តើមឲ្យមានទណ្ឌកម្មលើកនេះក៏បានទទួលស្គាល់ចំពោះបញ្ហានេះដែរ។ ដូច្នេះប្រយោជន៍ទណ្ឌកម្មជាហូរហែ គ្រាន់ជាគំនាបដើម្បីបង្ខំឲ្យលោកគីម ជុនអ៊ុនវិលត្រឡប់ចូលកាន់តុចរចាជាថ្មីនៅថ្ងៃណាមួយប៉ុណ្ណោះ។ កូរ៉េខាងជើងមិនងាយនឹងបោះបង់ចោលកម្មវិធីនុយក្លេអ៊ែរ និងគ្រាប់មីស៊ីលដោយងាយៗនោះទេ ព្រោះសម្រាប់លោកគីម ជុងអ៊ុន នេះជាដង្ហើមនៃរបបខ្លួន និងក៏ជាជន្ទល់ដើម្បីមានប្រៀបនៅក្នុងការចរចាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ