ព្យុះសង្ឃរា Tembin ចេញពីហ្វីលីពីនឆ្លងកាត់សមុទ្រចិនខាងត្បូងឆ្ពោះទៅប៉ែកខាងត្បូងវៀតណាម
ព្យុះសង្ឃរា Tembin ដែលបានបោកបក់នៅប៉ែកខាងត្បូងហ្វីលីពីនតាំងពីថ្ងៃសុក្រ ទី២២ ធ្នូបានបន្តដំណើរឆ្លងកាត់សមុទ្រចិនខាងត្បូងឆ្ពោះទៅកាន់ប៉ែកខាងត្បូងនៃប្រទេសវៀតណាមនាថ្ងៃអាទិត្យ ទី២៤ ធ្នូ។ នៅហ្វីលីពីន ព្យុះសង្ឃរា Tembin បានបណ្តាលឲ្យមានមនុស្សស្លាប់ជាង ២០០នាក់ និងបាត់ខ្លួនជាច្រើននាក់ផ្សេងទៀត ព្រមទាំងបន្សល់ទុកអ្នកបាត់បង់ទីជម្រកជាច្រើនម៉ឺននាក់។ ប្រមុខសង្ឃកាតូលិកសម្តេចប៉ាបហ្រ្វង់ស័របានចូលរួមបន់ស្រន់ចំពោះជនរងគ្រោះ ហើយអង្គការសហប្រជាជាតិបានស្នើជំនួយដល់រដ្ឋាភិបាលហ្វីលីពីន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ព្យុះសង្ឃរា Tembin បានសម្លាប់មនុស្ស ២០៨នាក់ បាត់ខ្លួន ១៦៤នាក់ និងមាន ៤០ ០០០នាក់បានបង្ខំចិត្តចាកចេញពីផ្ទះសម្បែងទៅជ្រកកោណនៅតាមមណ្ឌលសង្រ្គោះរៀបចំដោយរដ្ឋអំណាច នេះជាព័ត៌មានប្រកាសដោយប៉ូលិស និងក្រុមអ្នកជួយសង្រ្គោះនាថ្ងៃអាទិត្យ ទី២៤ ធ្នូ។ តែបើតាមសហព័ន្ធអន្តរជាតិនៃកាកបាទក្រហម និងអឌ្ឍចន្ទក្រហម មានអ្នករត់ភៀសខ្លួន ឬជនរងគ្រោះដោយព្យុះសង្ឃរា Tembin សរុប ៧០ ០០០នាក់។ ក្រៅពីមានមនុស្សស្លាប់ បាត់ខ្លួន និងរត់ចោលផ្ទះសម្បែង ព្យុះសង្ឃរា Tembin ក៏បានបោកបក់បំផ្លាញទ្រព្យសម្បត្តិ និងផ្ទះសម្បែងជាច្រើនរយខ្នង ព្រមទាំងនាំមកជាមួយនូវភ្លៀងខ្លាំងក្លាបង្កជាទឹកជំនន់ផង។
ក្រុមអ្នកជួយសង្រ្គោះ កម្លាំងប៉ូលិស និងកម្លាំងអ្នកស្ម័គ្រចិត្តបានបន្តបេសកកម្មស្រង់សាកសព និងជួយសង្រ្គោះដោយចូលរុករកតាមផ្ទះសម្បែងដើម្បីស្វែងរកពលរដ្ឋដែលកំពុងជាប់កុនមានជីវិតនៅខាងក្នុង។ ព្យុះសង្ឃរា Tembin បានបោកបក់លើប៉ែកខាងត្បូងហ្វីលីពីនតាំងពីថ្ងៃសុក្រ ទី២២ ធ្នូ មុននឹងចាកចេញពីហ្វីលីពីនដោយបន្តដំណើរឆ្លងកាត់សមុទ្រចិនខាងត្បូងឆ្ពោះទៅកាន់ប៉ែកខាងត្បូងប្រទេសវៀតណាមនាល្ងាចថ្ងៃអាទិត្យ ទី២៤ ធ្នូ។ នៅក្នុងដំណើរផ្លូវនោះ ព្យុះសង្ឃរា Tembin ក៏បានបោកបក់លើកោះទេសចរណ៍ប៉ាឡាវ៉ានដោយបានបណ្តាលឲ្យមានមនុស្សបាត់ខ្លួនមួយចំនួន។
នៅបុរីវ៉ាទីកង់ក្នុងប្រទេសអ៊ីតាលីឯណោះ នាឱកាសថ្លែងសារក្នុងបុណ្យណូអែល ប្រមុខសង្ឃកាតូលិកសម្តេចប៉ាបហ្រ្វង់ស័របានចូលរួមបន់ស្រន់គោរពវិញ្ញាក្ខន្ធចំពោះជនរងគ្រោះហ្វីលីពីន និងឆ្លៀតអំពាវនាវឲ្យមានសន្តិភាពនៅលើពិភពលោក ពិសេសចំពោះប្រជាជនដែលកំពុងរងគ្រោះដោយជម្លោះប្រដាប់អាវុធ។ នៅហ្វីលីពីន ប្រជាជនចំនួន ៨០% ជាអ្នកកាន់សាសនាកាតូលិក។ ចំណែកអង្គការសហប្រជាជាតិតាមរយៈអ្នកនាំពាក្យរបស់ខ្លួនបានស្នើជំនួយដល់រដ្ឋាភិបាលហ្វីលីពីននៅក្នុងព្យុះសង្ឃរា Tembin នេះ។
គួរបញ្ជាក់ថាជារៀងរាល់ឆ្នាំ ហ្វីលីពីនបានទទួលរងគ្រោះដោយព្យុះសង្ឃរាប្រមាណជា ២០ដង ហើយព្យុះសង្ឃរា Tembin ពេលនេះបានកើតឡើង ជិត ១សប្តាហ៍ក្រោយពីព្យុះសង្ឃរា Kai-Tak នៅប៉ែកកណ្តាលប្រទេសដែលបានបណ្តាលឲ្យមានមនុស្សស្លាប់ ៥៤នាក់ និងបាត់ខ្លួន ២៤នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ