ទណ្ឌកម្មលើកូរ៉េខាងជើង ៖ កូរ៉េខាងត្បូង ចាប់នាវាដឹកប្រេងចិន
ចុះផ្សាយនៅថ្ងៃ៖
ស្តាប់ - ០៥:៤៩
កូរ៉េខាងត្បូងទើបបានជូនដំណឹងនៅថ្ងៃសៅរ៍នេះ អំពីការចាប់បាននាវាដឹកប្រេងហុងកុងមួយគ្រឿង ដែលទំនងជាកំពុងប្រព្រឹត្តសកម្មភាពរំលោភសេចក្តីសម្រេចអង្គការសហប្រជាជាតិ រកស៊ីលក់ប្រេងឱ្យកូរ៉េខាងជើង។ ហើយក្នុងពេលជាមួយគ្នានេះដែរ ប្រភពព័ត៌មានមកពីខាងអឺរ៉ុប បានទម្លាយឱ្យដឹងថាមានការផ្តោះប្តូរលក់ប្រេងរុស្ស៊ីទៅឱ្យកូរ៉េខាងជើង នៅកណ្តាលសមុទ្ទ។
នាវាហុងកុងនោះ ត្រូវបានកូរ៉េខាងត្បូង ឃាត់ចាប់ តាំងពីថ្ងៃទី ២៤ វិច្ឆិកា មកម្ល៉េះ ប៉ុន្តែសេអូល ទើបប្រកាសជូនដំណឹងនៅថ្ងៃសៅរ៍នេះទេ។ មានឈ្មោះថា Lighthouse Winmore នាវា មានផ្ទុកប្រេងដល់ទៅ៦០០តោន យកទៅលក់ឱ្យកូរ៉េខាងជើង តាមរយៈការផ្ទេរប្រេងពីនាវាមួយទៅមួយ ក្នុងដែនទឹកអន្តរជាតិ មិនឆ្ងាយប៉ុន្មានពីឆ្នេរឡើយ។
នៅក្នុងនាវាគេសង្កេតឃើញមានអ្នកធ្វើការចំនួន២៥នាក់ ក្នុងនោះ២៣នាក់ជាជនជាតិចិន ២នាក់ជាភូមា។ នេះបើតាមការគូសបញ្ជាក់របស់អ្នកទទួលខុសត្រូវកូរ៉េខាងត្បូង នៅកំពង់ផែ Yeosu ដែលបដិសេធមិនលម្អិតទេ ថាតើជនជាតិចិន២៣នាក់នោះជា ចិនមកពីចិនដីគោក ឬចិនហុងកុង។
ក្រុមអធិការកិច្ចគយកូរ៉េខាងត្បូង បានសួរចម្លើយ ព្រមទាំងឃាត់ខ្លួនអ្នកធ្វើការក្នុងនាវាទាំងអស់ និងចុះទៅត្រួតពិនិត្យដល់ក្នុងនាវាតែម្តង។ នាវានេះ បានដឹកប្រេងចេញជប៉ុន សំដៅទៅលក់ឱ្យតៃវ៉ាន់ទេ ប៉ុន្តែទាំងនេះ មានតែលើក្រដាសទេ ! ពេលចេញដល់ពាក់កណ្តាលផ្លូវ Lighthouse Winmore ក៏ផ្ទេរប្រេងឱ្យនាវាកូរ៉េខាងជើង ហើយបកចូលមកផែកូរ៉េខាងត្បូង ទើបត្រូវអាជ្ញាធររឹបអូសទុកអង្កេតសិន។
របាយការណ៍របស់សារព័ត៌មាន បានសង្កត់ធ្ងន់បន្ថែមទៀតថា បើតាមផ្កាយរណបចារកិច្ចអាមេរិក ទង្វើផ្ទេរប្រេងកណ្តាលសមុទ្ទមានដល់ប្រមាណ៣០ដងគិតចាប់តាំងពីខែតុលាមក។ ក្រសួងការបរទេសកូរ៉េខាងត្បូង បានអះអាងថានឹងបញ្ជូនលទ្ធផលអង្កេត ទៅឱ្យគណៈកម្មាធិការអង្កេតអង្គការសហប្រជាជាតិ ទទួលបន្ទុកដាក់ទណ្ឌកម្ម។
ភស្តុតាងដាក់បន្ទុកចិន?
ចិនបដិសេធ ! ថាពុំដែលអនុញ្ញាតឱ្យក្រុមហ៊ុនណា ឬបុគ្គលណារកស៊ីជាមួយកូរ៉េខាងជើង រំលោភទណ្ឌកម្មអង្គការប្រជាជាតិ។ តាមរយៈអ្នកនាំពាក្យក្រសួងការបរទេស ប៉េកាំង បានបន្ទោសសហរដ្ឋអាមេរិក និងលោកត្រាំ ថាពាក្យចោទប្រកាន់មកលើចិន មិនត្រូវគ្នានឹងរឿងហេតុចាប់នាវានេះទេ។
ចិនអាចមានលទ្ធភាពដោះសារបាន ព្រោះថា នាវា Lighthouse Winmore ដែលមានឈ្មោះក្នុងបញ្ជីក្រុមហ៊ុននៅហុងកុង និងមានម្ចាស់ពីរនាក់ ជាចិនរស់នៅក្រុងកង់តុង ភាគខាងត្បូងប្រទេសចិនមែន ប៉ុន្តែនាវានេះត្រូវបានជួលផ្តាច់ទៅឱ្យតៃវ៉ាន់រកស៊ី។ នាវានេះលែងបង្ហាញវត្តមានសោះនៅតាមកំពង់ផែចិន (ចិនដីគោក) តាំងពីខែសីហាមក។
នាវា Lighithouse Winmore ជានាវាមួយក្នុងចំណោមនាវា១០ដែលអាមេរិកបានស្នើអង្គការសហប្រជាជាតិ ឱ្យដាក់បញ្ជូលក្នុងបញ្ជីខ្មៅជាប់ទណ្ឌកម្ម។ ប៉ុន្តែនៅទីបំផុត អង្គការសហប្រជាជាតិបានបញ្ជូនតែនាវាបួនគ្រឿងប៉ុណ្ណោះ ក្នុងបញ្ជីខ្មៅ ក្នុងបីជារបស់កូរ៉េខាងជើង និងមួយគ្រឿងជារបស់ Palau ដែលជាប់ចោទថាបានដឹកទំនិញទៅឱ្យរបបព្យុងយ៉ាង។
បណ្តាញរកស៊ីខុសច្បាប់រុស្ស៊ី
ប្រភពព័ត៌មានអឺរ៉ុបពីរដាច់ដោយឡែកពីគ្នា បានបញ្ជាក់ថា ពិតជាមានការផ្ទេរផលិតផលប្រេងគីមីរុស្ស៊ីទៅឱ្យកូរ៉េខាងជើង រំលោភបំពានទណ្ឌកម្មរបស់ក្រុមប្រឹក្សាសន្តិសុខមែន ប៉ុន្តែគ្មានប្រភពណាមួយ អាចបង្ហាញភស្តុតាងបានទេ។ ប្រភពព័ត៌មានទីមួយ បានអះអាងថា នាវារុស្ស៊ីលក់ប្រេងទៅកូរ៉េខាងជើង ដោយបណ្តាញរកស៊ីខុសច្បាប់។ ឯចំណែកប្រភពព័ត៌មានមួយទៀត ដែលសុំមិនបញ្ចេញឈ្មោះដូចគ្នា បានអះអាងបន្ថែមថាគ្មានសញ្ញាណាមួយអាចបញ្ជាក់ពីការលូកដៃរបស់រដ្ឋាភិបាលម៉ូស្គូ ក្នុងជំនួញការលក់ដូរប្រេងរុស្ស៊ីទៅឱ្យរបបព្យុងយ៉ាងទេ ក៏ប៉ុន្តែបណ្តាញនាវាប្រេងរុស្ស៊ីខុសច្បាប់នេះ បានជួយស្រោចស្រង់កូរ៉េខាងជើងពីទណ្ឌកម្មបានច្រើនមែនទែន។
ប្រភពព័ត៌មានអឺរ៉ុបទាំងពីរ អាចផ្តល់សេចក្តីសន្និដ្ឋាន ដោយយោងលើព័ត៌មានផ្តល់ដោយភ្នាក់ងារចារកិច្ចយោធា និងរូបភាពផ្កាយរណប។
ក្រសួងការបរទេស និងភ្នាក់ងារគយរុស្ស៊ី បានបដិសេធមិនបញ្ចេញប្រតិកម្មអ្វីទាំងអស់។ ឯចំណែកម្ចាស់នាវាដែលជាប់សង្ស័យថាជាបណ្តាញរកស៊ីខុសច្បាប់ បានច្រានចោលរាល់ពាក្យចោទប្រកាន់ទាំងអស់នោះ។
មានន័យថាពេលនេះ ថ្វីបើជាប់ទណ្ឌកម្មពីក្រុមប្រឹក្សាសន្តិសុខក្តី ក៏កូរ៉េខាងជើង អាចត្រដររស់បាន ដោយសារតែបណ្តាញខុសច្បាប់ ជួយផ្គត់ផ្គង់ប្រេងដែលជាប្រភពថាមពលដ៏ចាំបាច់ សម្រាប់សេដ្ឋកិច្ចក៏ដូចជាការអភិវឌ្ឍន៍កម្មវិធីនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ