សំណុំរឿងទាសករផ្លូវភេទវិលមកបំពុលទំនាក់ទំនង ជប៉ុន-កូរ៉េខាងត្បូងជាថ្មី
ភាពតានតឹងរវាងជប៉ុននិងកូរ៉េខាងត្បូង ក្នុងសំណុំរឿងទាសករផ្លូវភេទបានផ្ទុះឡើងជាថ្មី និងបន្តបំពុលទំនាក់ទំនងរវាងប្រទេសទាំងពីរមិនចេះចប់ចេះហើយ។ ជប៉ុនមិនពេញចិត្តនឹងទង្វើរបស់រដ្ឋាភិបាលកូរ៉េខាងត្បូង ដែលរិះគន់កិច្ចព្រមព្រៀងឆ្នាំ២០១៥ ស្តីអំពីសំណុំរឿងទាសករផ្លូវភេទទេ។ នាយករដ្ឋមន្ត្រីជប៉ុនអាចនឹងលុបចោលកម្មវិធីទស្សនកិច្ចនៅកូរ៉េខាងត្បូងផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
បើតាមការអះអាងរបស់ក្រុមជំនិតនឹងលោក ស្ហ៊ីនហ្សូ អាបេ លោកនាយករដ្ឋមន្ត្រីជប៉ុនទំនងជាមិនទៅចូលរួមក្នុងពិធីបើកកីឡាអូឡាំពិករដូវត្រជាក់នៅកូរ៉េខាងត្បូង ដែលនឹងត្រូវចាប់ផ្តើមនៅថ្ងៃទី៩កុម្ភៈ២០១៨ទេ។ ឯកអគ្គរដ្ឋទូតជប៉ុននៅកូរ៉េខាងត្បូងនឹងអាចកោះហៅឱ្យត្រលប់ចូលប្រទេសវិញជាបណ្តោះអាសន្នដែរ ដើម្បីសម្តែងការមិនពេញចិត្តចំពោះសេចក្តីថ្លែងការណ៍របស់សេអ៊ូល។
កាលពីថ្ងៃព្រហស្បតិ៍ គណៈកម្មការទទួលបន្ទុកមើលកិច្ចព្រមព្រៀងជប៉ុន-កូរ៉េខាងត្បូងឆ្នាំ២០១៥ ដែលទើបបង្កើតឡើងកាលពីខែវិច្ឆិកា បានចេញរបាយការណ៍សម្តែងការសោកស្តាយថាកិច្ចព្រមព្រៀងជប៉ុន-កូរ៉េខាងត្បូងឆ្នាំ២០១៥ ក្នុងសំណុំរឿងទាសករផ្លូវភេទ នោះមានកង្វះខាតច្រើន គ្មានការពិគ្រោះយោបល់ជាមួយនឹងជនរងគ្រោះជាដើម។ល។ ហើយនៅថ្ងៃបន្ទាប់ លោកប្រធានាធិបតីកូរ៉េខាងត្បូង មូន ចៃអ៊ីន ដែលធ្លាប់សន្យាក្នុងពេលបោះឆ្នោតសើរើមើលកិច្ចព្រមព្រៀងនេះ បានប្រកាសចាត់ទុកកិច្ចព្រមព្រៀង ជប៉ុន-កូរ៉េខាងត្បូង ថា មិនល្អ ដែលគួរតែកែប្រែខ្លះ។ កូរ៉េខាងត្បូងទំនងជានឹងស្នើឱ្យនាយករដ្ឋមន្ត្រីសរសេរលិខិតសុំទោសទៅកាន់គ្រប់ជនរងគ្រោះ ដែលពុំមានចែងក្នុងកិច្ចព្រមព្រៀងទេ។
លោក មូន ចែអ៊ីន មិនបានប្រកាសចង់ដកខ្លួនពីកិច្ចព្រមព្រៀងមែន ប៉ុន្តែជំហរត្រឹមចង់សើរើមើលឡើងវិញ ត្រូវបានធ្វើតូក្យូចាត់ទុកថាមិនអាចទទួលយកបានទេ និងអាចធ្វើឱ្យទំនាក់ទំនងទ្វេភាគីលែងគ្រប់គ្រងកើត។ មិនតែប៉ុណ្ណោះរដ្ឋមន្ត្រីការបរទេសជប៉ុនបានថែមទាំងរិះគន់សេអ៊ូលថាមិនចេះរក្សាព័ត៌មានសម្ងាត់។
សូមបញ្ជាក់ថា ជប៉ុននិងកូរ៉េខាងជើង បានរកកិច្ចព្រមព្រៀងស្តីពីសំណុំរឿងទាសករផ្លូវភេទ នៅឆ្នាំ២០១៥ ក្រោមរដ្ឋបាលលោកស្រីប៉ាក់ គុនហេ។ ជាកិច្ចព្រមព្រៀង “ចុងក្រោយ និងគ្មានការត្រលប់ក្រោយ” ដែលភាគីជប៉ុនបានធ្វើការសុំទោសដោយស្មោះស្ម័គ្រ និងបង់ថវិកា៧លានកន្លះដល់មូលនិធីស្ត្រីរងគ្រោះ។ កាលណោះសហគមន៍អន្តរជាតិបានអបអរស្វាគមន៍យ៉ាងខ្លាំង ប៉ុន្តែប្រជាពលរដ្ឋកូរ៉េខាងត្បូងភាគច្រើនព្រមទាំងគ្រួសារជនរងគ្រោះ ប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ