ប្រធានាធិបតី អាមេរិក Donald Trump គំរាមផ្តាច់ជំនួយប៉ាគីស្ថានតាមសារ tweeter
ប្រធានាធិបតីអាមេរិក លោក Donald Trump បន្ទាប់ពីបានសរសេរសារ tweeter ជូនពរពលរដ្ឋអាមេរិកនាឱកាសចូលឆ្នាំថ្មីសកល២០១៨នាថ្ងៃចន្ទទី១មករា បន្តិចក្រោយមកទៀត ក៏បានសរសេរសារ Tweeter ថ្មីមួយទៀតលើកនេះទៅប្រទេសប៉ាគីស្ថាន។ តាមរយៈសារថ្មី លោក Donald Trump បានថ្លែងពន្លយឲ្យដឹងថា អាមេរិក អាចនឹងកាត់ផ្តាច់ជំនួយហិរញ្ញវត្ថុដល់ប៉ាគីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
នៅក្នុងសារ tweeter ចំពោះប្រទេសប៉ាគីស្ថាន លោក Donald Trump បានគូសបញ្ជាក់ថា “អាមេរិក ធ្លាប់ផ្តល់ជំនួយអោយប៉ាគីស្ថាន ចំនួន៣ម៉ឺន ៣០០០លានដុល្លារអាមេរិកនារយៈពេល១៥ឆ្នាំចុងក្រោយនេះ តែអាមេរិកវិញ ពុំបានទទួលអ្វីក្រៅតែការកុហក់ភូតភរនិងភាពពុតត្បុតពីប៉ាគីស្ថានតែប៉ុណ្ណោះ ហើយប្រទេសនេះ ថែមទាំងមើលងាយថ្នាក់ដឹកនាំអាមេរិកទៀតផង។
ក្នុងសារនោះ លោក Donald Trump ថែមទាំងបានចោទប៉ាគីស្ថានថា បានផ្តល់ជម្រកឲ្យពួកភេរវជនដែលអាមេរិកបានធ្វើការវាយបណ្តេញពីអាហ្វហ្កានីស្ថាន។ ឥឡូវនេះ ជំនួយដ៏ធំធេងរបស់អាមេរិក ត្រូវចប់អស់ហើយសម្រាប់ប៉ាគីស្ថាន។
គួររំលឹកថា ទំនាក់ទំនងរវាងអាមេរិកនិងប៉ាគីស្ថាន មានភាពលំបាករួចទៅហើយនៅជំនាន់រដ្ឋបាលរបស់លោកអូបាម៉ាដែលធ្លាប់បានបរិហារជារឿយៗពីឥរិយាបថដ៏ស្រពិចស្រពិលរបស់ទីក្រុងអ៊ីស្លាម៉ាបាត ជាអាទិ៍នៅចំពោះមុខពួកឧទ្ទាមអ៊ីស្លាមជ្រុលនិយមតាលីបង់នៅក្នុងប្រទេសអាហ្វហ្កានីស្ថាន។ ពួកតាលីបង់ដែលអាមេរិក បានវាយប្រយុទ្ធកំចាត់តាំងពីចុងឆ្នាំ២០០១មក។ យ៉ាងណាមិញ នៅពេលលោក Donald Trump បានឡើងកាន់កាប់នៅសេតវិមានប្រធានាធិបតីរួចមក ទំនាក់ទំនងរវាងអាមេរិកនិងប៉ាគីស្ថាន កាន់តែធ្លាក់ចុះដុនដាបមួយកំរិតថែមទៀត។
ម្យ៉ាងទៀតកាលពីខែធ្នូកន្លងទៅ លោក Donald Trump ធ្លាប់បានគំរាមប៉ាគីស្ថានរួចមកហើយ ថាអាមេរិកនឹងឈប់ផ្តល់ជំនួយអោយប៉ាគីស្ថានទៀតហើយ ដោយលោក បានលើកឡើងថា “អាមេរិកបានផ្តល់ជំនួយហិរញ្ញវត្ថុចំនួនយ៉ាងសម្បើមណាស់ក្នុងមួយឆ្នាំៗដល់ប៉ាគីស្ថាន ដូច្នេះប៉ាគីស្ថាន ក៏ត្រូវតែមានកាតព្វកិច្ចជួយដល់អាមេរិកវិញ-នេះជាការលើកឡើងរបស់លោក Donald Trump នៅនាឱកាសបង្ហាញពីយុទ្ធសាស្ត្ររបស់លោកនៅលើបញ្ហាសន្តិសុខជាតិ។
សួមរំលឹកថា នៅឱកាសដំណើរទស្សនកិច្ចដ៏គួរអោយភ្ញាក់ផ្អើលមួយរបស់អនុប្រធានាធិបតីអាមេរិកនៅអាហ្វហ្កានីស្ថាន លោក Mike Pence បានថ្លែងធានាអះអាងដល់កងទ័ពអាមេរិកថាដែរ "ប៉ាគីស្ថាននៅតែស្ថិតនៅក្រោមក្រសែភ្នែករបស់លោកប្រធានាធិបតី Donald Trump ជានិច្ច"។ ទំនាក់ទំនងរវាងអាមេរិកនិងប៉ាគីស្ថាន មានភាពស្មុកស្មាញដោយហេតុតែប្រទេស អាស៊ី មួយនេះ ជាមហាអំណាចនុយក្លេអ៊ែរនិង ដែលក្រុមប្រទេសជាដៃគូរបស់ប៉ាគីស្ថាន មិនចង់ឃើញគ្រាប់បែកនុយក្លេអ៊ែរ ធ្លាក់ទៅក្នុងកណ្តាប់ដៃរបស់ពួកអ៊ីស្លាមជ្រុលនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ