ចិនជូនដំណឹងអំពីការបង្កើនវិនិយោគទុនរបស់ខ្លួននៅប្រទេសស្រីលង្កា
អាជ្ញាធរចិន ទើបបានជូនដំណឹងកាលពីម្សិលមិញអំពីការបង្កើនវិនិយោគទុនរបស់ខ្លួននៅប្រទេសស្រីលង្កាក្នុងទឹកប្រាក់ចំនួនជាង ១ ០០០លានដុល្លារនៅក្នុងការសាងសង់អគារ៣ដែលមានកំពស់ ៦០ជាន់នៅក្នុងគម្រោងសាងសង់មជ្ឈមណ្ឌលហិរញ្ញវត្ថុដ៏ចម្បងមួយដែលស្ថិតនៅជិតកំពង់ផែរបស់ស្រីលង្កា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ក្រុមហ៊ុនកំពង់ផែចិន China Harbour នឹងវិនិយោគទុនជាង ១០០០លានដុល្លារអាមេរិកនៅក្នុងការសាងសង់អគារដ៏ខ្ពស់ស្កឹមស្កៃចំនួន៣ ដែលស្ថិតនៅក្បែរកំពង់ផែដ៏ចម្បងរបស់ស្រីលង្កា-នេះបើយោងតាមការជូនដំណឹងរបស់រដ្ឋមន្ត្រីទទួលបន្ទុកអភិវឌ្ឈទីក្រុងនៅទីក្រុង Colombo លោក Champika Ranawaka កាលពីថ្ងៃអង្គារម្សិលមិញ។
យោងតាមការអះអាងរបស់លោករដ្ឋមន្ត្រីស្រីលង្កាដដែល អគារទាំង៣នោះ ដែលមានកំពស់ ៦០ជាន់នឹងអាចទាក់ទាញក្រុមហ៊ុនបរទេសជាច្រើនបន្ថែមទៀតមកដាក់វិនិយោគនៅស្រីលង្កា។
សេចក្តីជូនដំណឹងនេះ ត្រូវបានធ្វើឡើងបន្ទាប់ពីការធ្វើវិនិយោគទុនលើកមុនរបស់ចិន ក្នុងទឹកប្រាក់ចំនួន ១៤០០លានដុល្លារអាមេរិក នៅក្នុងការសាងសង់តំបន់ហិរញ្ញវត្ថុពិសេសមួយក្រោមឈ្មោះថា Colombo International Financialy City ( CIFC) នៅជិត កំពង់ផែដ៏ចម្បងរបស់ប្រទេសស្រីលង្កា។
អ្នកទទួលខុសត្រូវស្រីលង្ការូបនេះដដែល បានគួសបញ្ជាក់ទៀតថា ៦០% នៃផ្ទៃដីចំនួន ២៦៩ ហិកតា ត្រូវបានត្រៀមសាងសង់រួចរាល់អស់ហើយ ហើយការងារសរុប ប្រហែលនឹងត្រូវធ្វើឡើងនៅឆ្នាំក្រោយជាមួយនឹងការសាងសង់កំពង់ផែមួយដែលមានអគារលំនៅដ្ឋានដ៏ខ្ពស់ស្កឹមស្កៃ រួម ទាំងផែ មួយសម្រាប់អ្នករស់នៅទីនោះប្រើប្រាស់ផង។
ជាផ្លូវការគម្រោងវិនិយោគរបស់ចិន ត្រូវបានចាប់ផ្តើមឡើងបន្ទាប់ពីដំណើរទស្សនកិច្ចមួយនៅទីក្រុងកូឡុំបូរបស់ប្រធានាធិបតីចិន លោកស៊ីជីនពីង កាលពីឆ្នាំ២០១៤ តែត្រូវ បានលើកផ្អាកវិញ នៅខណៈពេលដែលរដ្ឋបាលថ្មីស្រីលង្កាបានចូលកាន់មុខតំណែងនៅឆ្នាំ២០១៥។ ក៏ប៉ុន្តែគម្រោងសាងសង់នេះ ត្រូវបានចាប់ផ្តើមឡើងវិញ ក្រោយពីការសម្រេចបាន លើកិច្ចព្រមព្រៀងថ្មីមួយរវាងរដ្ឋាភិបាលថ្មីស្រីលង្កានិងក្រុមហ៊ុនយក្សចិនឈ្មោះBTP China Communications Construction Company (CCCC) កាលពីខែសីហាឆ្នាំ២០១៦។
ហើយយោងតាមក្រុមហ៊ុនយក្សចិន CCCC នេះ គម្រោងសាងសង់លើកនេះ នឹងជួយបង្កើតការងារចំនួន៨ម៉ឺន៣០០០ការងារនិងជួយរួមចំណែកក្នុងការទាក់ទាញវិនិយោគទុនបរទេសក្នុងទឹកប្រាក់ចំនួនជាង១ម៉ឺន៣០០០លានដុល្លារផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ