គ្រោះថ្នាក់នាវាពីរបុកគ្នានៅសមុទ្រចិនខាងកើតបណ្តាលឲ្យមានមនុស្សបាត់ខ្លួន ៣២នាក់
នៅក្នុងប្រទេសចិន ក្រសួងដឹកជញ្ជូនបានប្រកាសបញ្ជាក់ជាផ្លូការនៅថ្ងៃអាទិត្យ ទី៧ មករានេះថា ការប៉ះទង្គិចគ្នារវាងនាវាដឹកប្រេង និងនាវាដឹកទំនិញកាលពីថ្ងៃសៅរ៍ ទី៦ មករាបានបណ្តាលឲ្យមានមនុស្សបាត់ខ្លួនចំនួន ៣២នាក់ ក្នុងនោះមានជនជាតិអ៊ីរ៉ង់ ៣០នាក់ និងជនជាតិបង់ក្លាដែស ២នាក់។ តាមក្រសួងដឹកជញ្ជូនចិនដដែល នាវាដឹកប្រេងបានឆេះទាំងមូល ហើយអ្នកបាត់ខ្លួនសុទ្ធសឹងជាអ្នកនៅក្នុងនាវានោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
ក្រោយគ្រោះថ្នាក់បុកគ្នាពេញទំហឹងរវាងនាវាដឹកទំនិញចិន និងនាវាដឹកប្រេងអ៊ីរ៉ង់នៅក្នុងសមុទ្រចិនខាងកើតក្នុងថ្ងៃសៅរ៍ ទី៦ មករា រដ្ឋាភិបាលចិនក៏បានរួសរាន់បញ្ជូននាវាចំនួន ៨គ្រឿងភ្លាមទៅកាន់កន្លែងកើតហេតុដើម្បីជួយសង្រ្គោះ បន្ទាន់ និងស្វែងរកមនុស្សបាត់ខ្លួនទាំង ៣២នាក់។ ប្រតិបត្តិការស្វែងរកបាន និងកំពុងបន្តធ្វើមកដល់ថ្ងៃអាទិត្យ ទី៧ មករានេះ។ រូបថតដែលផ្សព្វផ្សាយដោយទូរទស្សន៍រដ្ឋចិនឈ្មោះ CGTN បានបង្ហាញឲ្យឃើញនូវផ្សែងខ្មៅខ្មួលខ្មាញ់ចេញពីនាវាដឹកប្រេងដែលកំពុងឆេះនៅក្រោយការប៉ះទង្គិចជាមួយនាវាដឹកទំនិញ។
នាវាដឹកប្រេងនោះមានដោតទង់ជាតិនៃប្រទេសប៉ាណាម៉ា តែដឹកប្រេងរបស់ក្រុមហ៊ុនអ៊ីរ៉ង់មួយទៅឲ្យប្រទេសកូរ៉េខាងត្បូង។ តាមរដ្ឋអំណាចចិន នាវាដែលមានបណ្តោយ ២៧៤ម៉ែត្រមួយនេះមានដឹកប្រេងជិត ១លានបារីល និងមានមនុស្សស្ថិតក្នុងនាវានោះចំនួន ៣២នាក់ដែលមានជនជាតិអ៊ីរ៉ង់ ៣០នាក់ និងបង់ក្លាដែស ២នាក់។ ចំណែកនាវាទី២ ជានាវាហុងកុងធ្វើដំណើរមកពីអាមេរិកដែលដឹកពេញដោយផលិតផលអាហារ និងដែលមានមនុស្សស្ថិតក្នុងនាវានោះចំនួន ២១នាក់ជាជនជាតិចិន។ អ្នកទាំង ២១នាក់ត្រូវបានសង្រ្គោះរួចខ្លួន ហើយរដ្ឋអំណាចកូរ៉េខាងត្បូងក៏បានបញ្ជូននាវាឆ្មាំសមុទ្រមួយគ្រឿង និងយន្តហោះមួយគ្រឿងទៅចូលរួមនៅក្នុងប្រតិបត្តិការសង្រ្គោះដែរ។
ខណៈនេះ គេនៅមិនទាន់ដឹងពីមូលហេតុនៃគ្រោះថ្នាក់ប៉ះទង្គិចគ្នារវាងនាវាទាំងពីរនោះនៅឡើយទេ។ អ្វីដែលគេដឹង គ្រោះថ្នាក់នាវាបុកគ្នានៅក្នុងសមុទ្រចិនជារឿងឧស្សាហ៍កើតមានណាស់ ព្រោះជាតំបន់ដែលទំនិញ ១ភាគ៣ ក្នុងលោកបានដឹកតាមកប៉ាល់ឆ្លងកាត់ទីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ