វៀតណាម៖តុលាការបើកសវនាការកាត់ទោសលោក Trinh Xuan Thanh ពីបទពុករលួយ
នៅក្នុងប្រទេសវៀតណាម តុលាការក្រុងហាណូយបានបើកសវនាការកាត់ទោសលោក Trinh Xuan Thanh នាថ្ងៃចន្ទ ទី៨ មករានេះ។ លោក Thanh ជាអតីតថ្នាក់ដឹកនាំក្រុមហ៊ុនប្រេងឥន្ធនៈរដ្ឋរហូតដល់ឆ្នាំ ២០១៣ និងដែលទើបត្រូវបានចាប់ខ្លួនកាលពីរដូវក្តៅឆ្នាំ ២០១៧ ក្នុងទីក្រុងប៊ែរឡាំង ប្រទេសអាល្លឺម៉ង់។ របបកុម្មុយនិស្តក្រុងបហាណូយបានចោទលោក Thanh ពីបទប្រព្រឹត្តិអំពើពុករលួយ និងអាចទទួលទោសប្រហារជីវិត។
ចុះផ្សាយនៅថ្ងៃ៖ កែប្រែថ្ងៃទី៖
គឺនៅក្នុងខែកក្កដា ឆ្នាំ ២០១៧ ដែលលោក Trinh Xuan Thanh ត្រូវបានជនប្រដាប់អាវុធមួយក្រុមចាប់ខ្លួននៅសួនច្បារសាធារណៈមួយស្ថិតក្នុងទីក្រុងប៊ែរឡាំង ប្រទេសអាល្លឺម៉ង់។ ព្រឹត្តិការណ៍កាលណោះបានបង្កឲ្យមានវិបត្តិការទូតធ្ងន់ធ្ងររវាងរដ្ឋាភិបាលក្រុងហាណូយ និងរដ្ឋាភិបាលក្រុងប៊ែរឡាំង។ វិបត្តិការទូតដោយរដ្ឋអំណាចអាល្លឺម៉ង់យល់ឃើញថា ការចាប់ខ្លួនជនជាតិវៀតណាមរូបនោះក្នុងទឹកដីរបស់ខ្លួនបានរៀបចំឡើងដោយក្រុមចារបុរសវៀតណាម។ តែវៀតណាមបានបដិសេធយ៉ាងដាច់អហង្ការលើការសង្ស័យនេះ។
ប៉ុន្មានថ្ងៃក្រោយមក គេក៏បានឃើញរូបលោក Trinh Xuan Thanh បង្ហាញខ្លួននៅក្នុងកញ្ចក់ទូរទស្សន៍ជាតិនៅវៀតណាមដោយបានថ្លែងសារភាពថា ខ្លួនលោកបានធ្វើដំណើរត្រឡប់ចូលស្រុកដោយស្ម័គ្រចិត្ត ពោលគ្មានការចាប់ខ្លួនពីរដ្ឋអំណាចវៀតណាមទេ។ ទោះជាយ៉ាងនេះក្តី ក្រុមអ្នកសង្កេតការណ៍បានមើលឃើញថា ចម្លើយសារភាពរបស់លោក Trinh Xuan Thanh បានធ្វើឡើងដោយមានការចាប់បង្ខំឲ្យឆ្លើយ។
សូមជម្រាបជូនថា លោក Trinh Xuan Thanh បានដឹកនាំក្រុមហ៊ុនប្រេងឥន្ធនៈមួយយ៉ាងសំខាន់របស់រដ្ឋរហូតដល់ឆ្នាំ ២០១៣។ ក្រៅពីរូបលោក Trinh Xuan Thanh សវនាការពេលនេះក៏មានការកាត់ទោសលើថ្នាក់ដឹកនាំម្នាក់ទៀតក្នុងក្រុមហ៊ុនតែមួយ និងអ្នកទទួលខុសត្រូវម្នាក់ដ៏សំខាន់របស់គណបក្សដែលជាអតីតសមាជិកការិយាល័យនយោបាយមជ្ឈិមបក្ស។ អ្នកទាំងពីរចុងក្រោយអាចនឹងកាត់ទោសដេកគុកចំនួន ២០ឆ្នាំពីបទគ្រប់គ្រងមិនល្អ ចំណែកលោក Trinh Xuan Thanh អាចនឹងទទួលទោសប្រហារជីវិតក្នុងបទពុករលួយ។
គួរបញ្ជាក់ជូនថានារយៈពេលប៉ុន្មានឆ្នាំចុងក្រោយនេះ របបកុម្មុយនិស្តក្រុងហាណូយបានបើកប្រតិបត្តិកំចាត់ក្រុមប្រឆាំងខ្លួន និងមិនញញើតនឹងដាក់ទោសធ្ងន់ធ្ងរលើថ្នាក់ដឹកនាំណាដែលមានកំហុស។ ក្រុមអ្នកសង្កេតការណ៍បានមើលឃើញថា អ្នកដែលនៅពីក្រោយប្រតិបត្តិការមួយនេះ គឺគ្មាននរណាក្រៅពីអគ្គលេខាធិការបក្សកុម្មុយនិស្តលោក Nguyen Phu Trong។ លោក Trong ដែលកំពុងបន្តជម្រះបញ្ជីលើក្រុមមនុស្សដែលជាសម្ព័ន្ធមិត្តរបស់អតីតគូប្រជែងលោក គឺអតីតនាយករដ្ឋមន្រ្តីលោក Nguyen Tan Dung៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ