នាវាអ៊ីរ៉ង់អាចនឹងផ្ទុះឬលិចនៅក្នុងសមុទ្ទចិន ហើយបង្កមហន្តរាយធម្មជាតិធ្ងន់ធ្ងរ
នាវាដឹកប្រងអ៊ីរ៉ង់ ដែលមានគ្រោះថ្នាក់បុកគ្នាជាមួយនាវាចិន កាលពីថ្ងៃសៅរ៍ កំពុងបន្តឆាបឆេះ ដោយអគ្គីភ័យ កណ្តាលមហាសាគរនៃសមុទ្ទចិនខាងកើត។ នាវានេះអាចនឹងផ្ទុះ ឬលិច ហើយបង្ហៀប្រេងបំពុលបរិស្ថាន ដែលជាតំណាងមហន្តរាយធម្មជាតិយ៉ាងធ្ងន់ធ្ងរ មិនធ្លាប់មាន។ នេះបើតាមសេចក្តីប្រកាសព្រមានរបស់អាជ្ញាធរចិន នៅថ្ងៃចន្ទទី ៨ មករា ២០១៨។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ក្រុមសង្គ្រោះចិន ដែលបានសាកល្បងចូលទៅជួយរកអ្នកធ្វើការលើនាវាប្រេងអ៊ីរ៉ង់ ទាំង៣២នាក់ បានបង្ខំចិត្តនាំគ្នាដកថយវិញ ព្រោះមិនអាចយកឈ្នះលើផ្សែងពុលក្រាស់ឃ្នឹកបាន។ ម្យ៉ាងវិញទៀត អាកាសធាតុមិនអំណោយផលសោះ សម្រាប់ធ្វើការសង្គ្រោះនិងស្វែងរកជនបាត់ខ្លួន។
រហូតមកទល់នឹងព្រឹកថ្ងៃចន្ទទី ៨មករា អគ្គីភ័យនៅតែបន្តឆាបឆេះ អណ្តាតភ្លើងកំពុងខាំត្របាក់នាវា ប្រវែង ២៧៤ម៉ែត្រ ដែលនឹងអាចធ្វើឱ្យនាវានេះ ផ្ទុះ ឬលិចបាន គ្រប់ពេលវេលា។ នេះបើតាមប្រភពព័ត៌មានចិន ដែលបានអះអាងទៀតថា ឃើញមានសាកសព កំណត់អត្តសញ្ញាណមិនទាន់បានម្នាក់ អណ្តែតនៅចម្ងាយប្រមាណពីរបីគីឡូម៉ែត្រពីនាវា។
សូមអាន ៖ គ្រោះថ្នាក់នាវាពីរបុកគ្នានៅសមុទ្ទចិន
ក្រៅអំពីការខិតខំប្រែងសង្គ្រោះជនបាត់ខ្លួន អាជ្ញាធរចិនកំពុងរិះរកមធ្យោបាយ បញ្ចៀសគ្រោះមហន្តរាយធម្មជាតិ ព្រោះនាវាអ៊ីរ៉ង់ Tanker Sanchi នេះ មានផ្ទុកប្រេងឆៅដល់ទៅជាង១លានធុងបារីស។ ក្រុមអ្នកជំនាញបរិស្ថាន Greepeace បានសម្តែងការព្រួយបារម្ភរួចជាស្រេចទៅហើយ អំពីគ្រោះមហន្តរាយធម្មជាតិ បង្កឡើងដោយការធ្លាយប្រេង។
ប្រសិនបើនាវាដឹកប្រេងអ៊ីរ៉ង់ ពិតជាត្រូវផ្ទុះ និងលិច ហើយបរិមាណប្រេងទាំង១៣៦តោនត្រូវធ្លាយហូរក្នុងសមុទ្ទមែន នោះមានន័យថារលកសមុទ្ទនឹងបង្កមហន្តរាយបរិស្ថានដ៏អាក្រក់បំផុតមិនធ្លាប់មាន ក្នុងរយៈពេលប៉ុន្មានទសវត្សរ៍ចុងក្រោយនេះ។ ជីវិតសត្វនិងរុក្ខជាតិ ក្នុងទឹក ក្នុងផ្ទៃក្រឡា ដ៏ធំធេង នឹងត្រូវបំផ្លាញគ្មានសល់ឡើយ ! នេះបើតាមការគូសបញ្ជាក់របស់អ្នកបរិស្ថាននៃសាកលវិទ្យាល័យTsinghua នាទីក្រុងប៉េកាំង។ប៉ុន្តែបើទោះបីជាគេមានសំណាងខ្ពស់អាចទប់ស្កាត់មហន្តរាយបានយ៉ាងណាក៏ដោយ ក៏គេត្រូវការពេលវេលាយូរទម្រាំសមុទ្ទវិលត្រលប់មកជីវិតធម្មតាវិញបាន។
សូមបញ្ជាក់ថា នៅថ្ងៃចន្ទនេះ នាវាពិសេសចិនពីរគ្រឿង បានបញ្ជូនទៅដល់កន្លែងកើតហេតុហើយ ដើម្បីចាំសាកល្បងទប់ការធ្លាយប្រេង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ