២ឆ្នាំក្រោយមក កូរ៉េខាងជើង និងកូរ៉េខាងត្បូងបានចាប់ដៃ និយាយរកគ្នាជាថ្មី
ចុះផ្សាយនៅថ្ងៃ៖
ស្តាប់ - ០៧:៣១
នៅថ្ងៃអង្គារ ទី៩ មករានេះ ក្រុមអ្នកតំណាងជាន់ខ្ពស់មកពីកូរ៉េខាងត្បូង និងពីកូរ៉េខាងជើងបានជួបជជែកគ្នាក្នុងស្រុក Panmunjom ស្ថិតក្នុងទឹកដីកូរ៉េខាងត្បូង។ នេះជាការជួបសន្ទនាលើកទី១ រវាងបងប្អូនបង្កើតគូសត្រូវទាំងពីរ គិតតាំងពីឆ្នាំ ២០១៥។ នៅក្នុងជំនួបថ្ងៃនេះ ភាគីកូរ៉េខាងជើងបានថ្លែងពីការត្រៀមខ្លួនបញ្ជូនក្រុមកីឡាករ និងប្រតិភូជាន់ខ្ពស់ទៅចូលរួមនៅក្នុងល្បែងកីឡាអូឡាំពិករដូវរងាររៀបចំនៅកូរ៉េខាងត្បូងនាខែកុម្ភៈខាងមុខ។ ក្រៅពីរឿងកីឡា ភាគីកូរ៉េខាងត្បូងក៏បានឆ្លៀតស្នើភាគីកូរ៉េខាងជើងឲ្យលើកយកប្រធានបទផ្សេងទៅជជែកដែរ។
បរិយាកាសរួមនៃជំនួបរវាងបងប្អូនបង្កើតកូរ៉េទាំងពីរក្នុងថ្ងៃនេះ គឺល្អទាំងការជួបប្រាស្រ័យគ្នាក៏ដូចជាលទ្ធផលដែលទទួលបាន។ នៅក្នុងកិច្ចសន្ទនានោះ ភាគីកូរ៉េខាងត្បូងដឹកនាំដោយលោកចូ យ៉ុង យ៉ុន រដ្ឋមន្រ្តីទទួលបន្ទុកកិច្ចការបង្រួបបង្រួម និងភាគីកូរ៉េខាងជើងដឹកនាំដោយលោក រី សុន វ៉ុន ប្រធានគណៈកម្មការដើម្បីការបង្រួបបង្រួមប្រទេសដោយសន្តិភាព។ កំណត់សម្គាល់មួយទៀត ជំនួបនោះត្រូវបានរៀបចំឡើងនៅក្នុង « ផ្ទះសន្តិភាព » ដែលស្ថិតក្នុងស្រុក Panmunjom នៃទឹកដីកូរ៉េខាងត្បូង។
ជម្រើសយកស្រុក Panmunjom ព្រោះជាស្រុកដែលស្ថិតក្នុងតំបន់គ្មានកងទ័ព និងជាទីកន្លែងដែលបងប្អូនបង្កើតទាំងពីរបានចុះហត្ថលេខាលើយុទ្ធសន្តិភាពដើម្បីបិទបញ្ចប់សង្រ្គាមរវាងគ្នាចន្លោះឆ្នំា ១៩៥០ ១៩៥៣។ គួរបញ្ជាក់ថា ទោះបីជាសង្រ្គាមកូរ៉េបានបិទបញ្ចប់អស់រយៈពេលជាងកន្លះសតវត្សក៏ដោយ ក៏ជាលក្ខណៈបច្ចេកទេស ភាគីទំាងពីរកំពុងបន្តមានសង្រ្គាមជាមួយគ្នាជានិច្ច។ មូលហេតុ មកពីភាគីទាំងពីរនៅពុំទាន់មានសន្ធិសញ្ញាសន្តិភាពរវាងគ្នានៅឡើយ។
ជារួម ជំនួបថ្ងៃនេះបានប្រព្រឹត្តិទៅដោយភាពស្និទ្ធិស្នាល និងរាក់ទាក់ ហើយភាគីនីមួយៗសុទ្ធបានបង្ហាញចេញនូវក្តីសង្ឃឹម និងឆន្ទៈចង់បានសន្តិភាព និងចង់ឲ្យមានការផ្សះផ្សារវាងបងប្អូនបង្កើតឡើងវិញ។ ភាគីកូរ៉េខាងជើងលោក រី សុន វ៉ុនបានថ្លែងនាពេលផ្តើមកិច្ចសន្ទនាដោយសង្ឃឹមទទួលបានលទ្ធផលល្អប្រសើរជូនពលរដ្ឋកូរ៉េ។ ចំណែកភាគីកូរ៉េខាងត្បូងលោកចូ យ៉ុង យ៉ុនបានឆ្លើយតបវិញដោយចង់ឃើញមហោស្រពល្បែងកីឡាអូឡាំពិកខាងមុខក្លាយជាមហោស្រពសន្តិភាព និងជាជំហានទី១ ឆ្ពោះទៅបង្កើនទំនាក់ទំនងរវាងកូរ៉េទាំងពីរ។
ភាគីទាំងពីរបង្ហាញពីការចង់ជជែកលើប្រធានបទផ្សេងក្រៅពីកីឡា
លទ្ធផលនៃជំនួបថ្ងៃនេះ កូរ៉េខាងជើងបានបញ្ជាក់ពីការត្រៀមខ្លួនបញ្ជូនក្រុមកីឡាកររបស់ខ្លួន រួមទាំងប្រតិភូជាន់ខ្ពស់ទៅចូលរួមនៅក្នុងល្បែងកីឡាអូឡាំពិករដូវរងាររៀបចំក្នុងទឹកដីកូរ៉េខាងត្បូងពីថ្ងៃទី៩ ដល់ថ្ងៃទី២៥ កុម្ភៈខាងមុខ។ តែឆ្លៀតឱកាសនោះ ភាគីកូរ៉េខាងត្បូងក៏សុំឲ្យកូរ៉េខាងជើងលើកយករឿងផ្សេងទៅជជែកដែរ ពិសេសការរៀបចំឲ្យមានឡើងវិញនូវជំនួបរវាងក្រុមគ្រួសារកូរ៉េដែលព្រាត់ប្រាសនៅក្រោយសង្រ្គាម។
ទន្ទឹមគ្នានេះ ក៏មានការឯកភាពគ្នាឲ្យមានជំនួបថ្នាក់យោធាដើម្បីបញ្ជៀសភាពប្រទូស្រ្តាយ និងការប្រឈមមុខដាក់គ្នាជាថ្មីនាពេលខាងមុខ ឬមួយក៏ជំនួបរវាងកាកបាទក្រហមរវាងគ្នាដើម្បីរៀបចំពីជំនួយក៏ដូចជាការជួបជុំរវាងក្រុមគ្រួសារកូរ៉េដែលបែកបាក់គ្នា។ រឿងក្រុមគ្រួសារកូរ៉េបែកបាក់នៅក្រោយចប់សង្រ្គាមជាសំណុំរឿងមួយក្នុងចំណោមសំណុំរឿងផ្សេងទៀតដែលសល់ពីសម័យសង្រ្គាម តែជាសំណុំរឿងក្តុកក្តួលខ្លាំងជាងគេសម្រាប់ពលរដ្ឋកូរ៉េទូទៅ មិនថាអ្នករស់នៅខាងជើង ឬខាងត្បូងទេ។
ព័ត៌មានឲ្យដឹងថា ក្រុមប្រតិភូជាន់ខ្ពស់ដែលក្រុងព្យុងយ៉ាងគ្រោងបញ្ជូនទៅអាចមានប្អូនស្រីរបស់លោកគីម ជុងអ៊ុនឈ្មោះ យ៉ូ ជុងដែលជាថ្នាក់ដឹកនាំជាន់ខ្ពស់នៃគណបក្សកុម្មុយនិស្ត។ អ្វីដែលគេកំពុងរង់ចាំមើលបន្ថែមនៅក្នុងជំនួបរវាងគ្នានាពេលខាងមុខនោះគឺថា តើអាចមានប្រធានបទទាក់ទងនឹងបញ្ហានុយក្លេអ៊ែរកូរ៉េខាងជើង ឬមួយសមយុទ្ធប្រចាំឆ្នាំរវាងកូរ៉េខាងត្បូង និងអាមេរិកឬអត់។
ជំនួបថ្ងៃនេះបានមកពីការបោះដៃរកគ្នាទៅវិញទៅមករវាងលោកគីម ជុងអ៊ុន និងលោកមូន ចៃអ៊ីន
ភាពល្អូកល្អឺនបន្តិចរវាងកូរ៉េទាំងពីរពេលនេះបានមកពីការបោះដៃមុនគេរបស់ប្រមុខដឹកនាំកូរ៉េខាងជើងលោកគីម ជុនអ៊ុនតាមរយៈសារជូនពរចូលឆ្នាំសកលឆ្នាំ ២០១៨។ ក្រៅពីជូនពរពលរដ្ឋខ្លួនឯង លោកគីម ជុនអ៊ុនក៏បានបោះដៃរកកូរ៉េខាងត្បូងដោយជូនពរឲ្យការរៀបចំល្បែងកីឡាអីឡាំពិករដូវរងារនៅកូរ៉េខាងត្បូងនាពេលខាងមុខទទួលបានជោគជ័យធំធេង និងប្រកាសឲ្យដឹងពីការត្រៀមខ្លួនបញ្ជូនក្រុមកីឡាករកូរ៉េខាងជើងឲ្យទៅចូលរួមដែរ។ បន្ទាប់មក លោកគីម ជុងអ៊ុនបាននិយាយត្រង់ៗដោយមិនលាក់លៀមថា នៅក្នុងឱកាសល្បែងកីឡាអូឡាំពិកនោះ រដ្ឋអំណាចកូរ៉េខាងជើង និងខាងត្បូងអាចនឹងជួបជជែកគ្នាបាន។
សាររបស់លោកគីម ជុងអ៊ុនពេលនោះបានធ្វើឲ្យគ្រប់គ្នាភ្ញាក់ផ្អើល និងដែលលោកប្រមុខរដ្ឋកូរ៉េខាងត្បូងមូន ចៃអ៊ីនមិនទុកឲ្យរំលងបាន ២៤ម៉ោងទេ។ លោកចៃអ៊ីនក៏បានបោះដៃត្រឡប់វិញដោយស្វាគមន៍សំណើរបស់លោក គីម ជុនអ៊ុងភ្លាមៗ។ គួរបញ្ជាក់ជូនថាតាំងពីជាប់ឆ្នោតជាប្រធានាធិបតីកូរ៉េខាងត្បូងក្នុងខែឧសភាមក លោកមូន ចៃអ៊ីនតែងប្រកាន់យកនយោបាយត្រជាក់ ទន់ភ្លន់ អត់ធ្មត់ និងមិនឆេវឆាវដូចប្រធានាធិបតីកូរ៉េខាងត្បូងមុនៗទេ នោះបើទោះបីជាលោកគីម ជុងអ៊ុនបន្តផ្គើនសហគមន៍អន្តរជាតិតាមរយៈនុយក្លេអ៊ែរ ឬគ្រាប់មីស៊ីលក្តី។ ជានិច្ចកាល លោកមូន ចៃអ៊ីនតែងបង្ហាញពីឆន្ទៈចង់ឲ្យបន្តកិច្ចសន្ទនារវាងកូរ៉េទាំងពីរ។ នេះក៏អាចនិយាយបានថា ជាការបោះដៃរបស់លោកមូន ចៃអ៊ីនដែលលោកគីម ជុងអ៊ុនបានបោះត្រឡប់វិញដែរ។
តែសំណួរកំពុងបន្តចោទជុំវិញភាពស្មោះត្រង់ និងសុឆន្ទៈពិតប្រាកដរបស់លោកគីម ជុងអ៊ុនដោយមានការលើកឡើងថា មនុស្សខ្លាំងកូរ៉េខាងជើងរូបនេះកំពុងព្យាយាមអូសទាញកូរ៉េខាងត្បូងឲ្យចេញពីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ