កាសែតអាមេរិក៖ រដ្ឋអាជ្ញាពិសេសគ្រោងនឹងជួបសាកសួរលោកដូណាល់ ត្រាំ
លោកប្រធានាធិបតីអាមេរិក ដូណាល់ ត្រាំនឹងផ្តល់ចម្លើយ នៅក្នុងការស៊ើបអង្កេតទៅលើការលូកដៃរបស់រុស្ស៊ី នៅក្នុងការបោះឆ្នោតអាមេរិក? តាមការចុះផ្សាយរបស់កាសែត Washington Post និងទូរទស្សន៍ NBC រដ្ឋអាជ្ញាពិសេស លោកRobert Mueller ដែលកំពុងដឹកនាំការស៊ើបអង្កេត លើទំនាក់ទំនងរុស្ស៊ី ហើយនិងក្រុមឃោសនាបោះឆ្នោតរបស់លោកដូណាល់ ត្រាំ គ្រោងនឹងជួបសាកសួរលោកដូណាល់ ត្រាំ នៅប៉ុន្មានសប្តាហ៍ខាងមុខ។ សេតវិមានវិញ បានបដិសេធ មិនឆ្លើយបញ្ជាក់ព័ត៌មានចុះផ្សាយរបស់កាសែតអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងការចាក់ផ្សាយរបស់ទូរទស្សន៍អាមេរិក NBCនៅថ្ងៃចន្ទម្សិលមិញ ក្រុមមេធាវីរបស់លោកប្រធានាធិបតីដូណាល់ ត្រាំ បាននិយាយថា កាលពីចុងខែធ្នូកន្លងទៅ គេបានជួបអ្នកតំណាងរបស់ការិយាល័យស៊ើបអង្កេតរបស់រដ្ឋអាជ្ញាពិសេស ដើម្បី ពិភាក្សា ពីរបៀបរបបដែល រដ្ឋអាជ្ញាពិសេស លោក Robert Mueller ត្រូវជួបសាកសួរលោកដូណាល់ ត្រាំ នៅក្នុងក្របខ័ណ្ឌ នៃការស៊ើបអង្កេត ស្តីការជាប់ពាក់ព័ន្ធរបស់រុស្ស៊ី។ នៅទូរទស្សន៍NBC មេធាវីរបស់លោកដូណាល់ ត្រាំ និយាយថា គេចង់ឲ្យដូណាល់ ត្រាំ ផ្តល់ចម្លើយ ជាលាយល័ក្ខអក្សរ ច្រើនជាងជួបសម្ភាសន៍ផ្ទាល់មាត់ ជាមួយរដ្ឋអាជ្ញាពិសេស លោក Robert Mueller។
ការលើកឡើងរបស់មេធាវីរបស់លោកដូណាល់ ត្រាំ បានបញ្ជាក់ព័ត៌មានចុះផ្សាយដោយកាសែត អាមេរិក Washington Post ដែលបានសរសេរថា ដំណើរការសាកសួរលោកប្រធានាធិបតីដូណាល់ ត្រាំ នៅក្នុងក្របខ័ណ្ឌនៃការស៊ើបអង្កេត លើការលូកដៃរបស់រុស្ស៊ី នឹងធ្វើឡើង នៅក្នុងពេលឆាប់ៗ គឺនៅប៉ុន្មានសប្តាហ៍ខាងមុខ។ ទាំងការិយាល័យស៊ើបអង្កេតរបស់រដ្ឋអាជ្ញាពិសេស និងសេតវិមាន បានបដិសេធរហូតមក មិនទម្លាយឲ្យដឹងពីលទ្ធភាពនៃជំនួបសាកសួរ រវាងរដ្ឋអាជ្ញា និងលោកប្រធានាធិបតីអាមេរិកនោះទេ។
ប៉ុន្តែ តាមកាសែតWashington Post ដែលបានស្រង់សំដីរបស់អ្នកស្និទ្ធិនឹងលោកដូណាល់ ត្រាំ កាលពីខែធ្នូកន្លងទៅ រដ្ឋអាជ្ញាពិសេស លោក Robert Muellerបាននិយាយប្រាប់ក្រុមអ្នកច្បាប់របស់ប្រធានាធិបតី ពីគម្រោងចង់ជួបសាកសួរលោកដូណាល់ ត្រាំ។
សូមអាន៖កាសែតសរសេរថា លោកដូណាល់ ត្រាំ ជាប់សំណាញ់ស៊ើបអង្កេតរបស់រដ្ឋអាជ្ញាពិសេស
ចាប់តាំងបើកការស៊ើបអង្កេត ទៅលើការលូកដៃរបស់រុស្ស៊ី នៅក្នុងការបោះឆ្នោត ហើយនិងទៅលើការជាប់ពាក់ព័ន្ធគ្នា រវាងក្រុងម៉ូស្គូ និងក្រុមធ្វើយុទ្ធនាការឃោសនាបោះឆ្នោតរបស់លោកដូណាល់ ត្រាំ នៅពាក់កណ្តាលឆ្នាំ ២០១៧ មនុស្សជំនិតៗជាច្រើននាក់របស់លោកដូណាល់ ត្រាំ បានជាប់ក្នុងសំណាញ់ស៊ើបអង្កេតរបស់រដ្ឋអាជ្ញាពិសេស លោក Robert Mueller។ អតីតទីប្រឹក្សាផ្នែកសន្តិសុខជាតិ របស់លោកដូណាល់ ត្រាំ លោក Michael Flynn ត្រូវចោទប្រកាន់ថា បាននិយាយកុហកក្រុមប៉ូលិសFBI ចំណែកប្រធានក្រុមឃោសនាបោះឆ្នោតរបស់លោកដូណាល់ ត្រាំ រងបទចោទប្រកាន់ចំនួន ១២ ដែលនៅក្នុងនោះមានផងដែរ ការឃុបឃិត ដើម្បីប្រឆាំងអាមេរិក។
សូមបញ្ជាក់ថា នៅខែមករា ឆ្នាំ ២០១៧ ភ្នាក់ងារស៊ើបការណ៍សម្ងាត់អាមេរិកបានចេញផ្សាយជាសាធារណៈ របាយការណ៍សម្ងាត់មួយ ដែលនៅក្នុងនោះ ចារកិច្ចអាមេរិកបានចោទរុស្ស៊ីថា បានអន្តរាគមន៍ លូកដៃ ដើម្បី ជួយក្រុមលោកដូណាល់ ត្រាំ ឲ្យឈ្នះឆ្នោតប្រធានាធិបតី នៅឆ្នាំ ២០១៦។ លោកប្រធានាធិបតីដូណាល់ ត្រាំ ដែលអះអាងដដែល ជាដដែល ថា គ្មានជាប់ពាក់ព័ន្ធនឹងរុស្ស៊ី និងចាត់ទុកការស៊ើបអង្កេតទៅលើសំណុំរឿងនេះ ថា ជាការប្រមាញ់មេធ្មប់នោះ បានប្រាប់អ្នកកាសែត កាលពីថ្ងៃសៅរ៍ សប្តាហ៍មុនថា លោកនឹងជួបក្រុមស៊ើបអង្កេតរបស់រដ្ឋអាជ្ញាពិសេស។ “នៅពេលដែលយើងគ្មានបានធ្វើអ្វីខុស យើងនឹងនិយាយប្រាប់ដោយស្មោះត្រង់ និងចង់ឲ្យរឿងនេះចប់ឆាប់ៗ” នេះជាប្រសាសន៍របស់លោកដូណាល់ ត្រាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ