នុយក្លេអ៊ែរកូរ៉េខាងជើង៖ចិនបរិហារជំនួបពិភាក្សានៅកាណាដា
ក្រសួងការបរទេសចិនបានរិះគន់ជំនួបពិភាក្សានៅកាណាដា ទាក់ទងនឹងបញ្ហាកូរ៉េខាងជើង ថាជាជំនួបដែលមិនត្រឹមត្រូវ ធ្វើឡើងចំពេលទំនាក់ទំនងបងប្អូនកូរ៉េទាំង២កំពុងឈានទៅរកភាពកក់ក្តៅ។ ជំនួបស្តីពីនុយក្លេអ៊ែរកូរ៉េខាងជើង នៅកាណាដា ថ្ងៃអង្គារនេះ ជាការរៀបចំរបស់អាមេរិក មានប្រទេសចូលរួមជាង២០ តែចិននិងរុស្ស៊ីអវត្តមាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
អ្នកនាំពាក្យក្រសួងការបរទេសចិន លោកលូ កាង បានរិះគន់ជំនួបកំពូលស្តីពីបញ្ហាកូរ៉េខាងជើង ដែលជាជំនួបធ្វើឡើង ថ្ងៃអង្គារនេះ នៅទីក្រុង Vancouver ប្រទេសកាណាដា។ លោកលូ កាងលើកឡើងថា ជំនួបនេះ មិនត្រឹមត្រូវតាមច្បាប់ ជាជំនួបគ្មានតំណាងចូលរួម។ ជាជំនួបធ្វើឡើងចំពេលប្រទេសកូរ៉េទាំង២កំពុងមានទំនាក់ទំនងកក់ក្តៅឡើងវិញ។ ការដែលចិនលើកឡើងថា គ្មានតំណាងក្នុងជំនួបនៅកាណាដា ក៏ដោយសារតែចិន និងរុស្ស៊ីដែលជាសមាជិកអចិន្រ្តៃយ៍អង្គការសហប្រជាជាតិ និងជាតួអង្គសំខាន់ក្នុងបញ្ហាកូរ៉េខាងជើង មិនចូលរួមជំនួបនេះដែរ។
ជំនួបស្តីពីកូរ៉េខាងជើង ធ្វើឡើងនៅកាណាដា ជាការរៀបចំរបស់អាមេរិក និងកាណាដា មានតំណាងថ្នាក់ដឹកនាំយោធាជាង២០ប្រទេសចូលរួម។ ជំនួបនេះមានទិសដៅធ្វើអោយប្រទេសនីមួយៗ អនុវត្តទណ្ឌកម្មប្រឆាំងក្រុងព្យុងយ៉ាង អោយបានស្មើដៃគ្នា ដាក់សម្ពាធអោយធ្ងន់លើកូរ៉េខាងជើង។ ចិនរិះគន់ជំនួបនេះ ព្រោះមើលឃើញថា កូរ៉េខាងជើងនិងកូរ៉េខាងត្បូងកំពុងខំស្តារទំនាក់ទំនងទ្វេភាគីឡើងវិញ ដោយតំណាងកូរ៉េទាំង២កំពុងចរចាគ្នា។
ក្រុងព្យុងយ៉ាងបានសម្រេចចិត្តបញ្ជូនកីឡាករជាតិអោយទៅចូលរួមការប្រកួតកីឡាអូឡាំពិក នៅព្យុងឆាង នៅខែកុម្ភៈខាងមុខ។ ក្រុងសេអ៊ូលវិញក៏គ្រោងបញ្ចូលកីឡាករកូរ៉េខាងជើងអោយចូលក្នុងក្រុមជាមួយកីឡាជាតិកូរ៉េខាងត្បូងផងដែរ សម្រាប់ការប្រកួតនេះ។ សម្រាប់ចិន ក្នុងពេលដែលអន្តជាតិកំពុងរកវិធានការសមស្រប បែបសន្តិភាព ទាក់ទងបញ្ហានុយក្លេអ៊ែរកូរ៉េខាងជើង អាមេរិកបែរជារៀបចំជំនួបដាក់សម្ពាធក្រុងព្យុងយ៉ាង បង្កើនភាពតានតឹងទៅវិញ។ សប្តាហ៍មុន ចិនលើកឡើងរួចហើយថា ជំនួបនៅកាណាដាមួយនេះ មានតែធ្វើអោយអន្តរជាតិបែកបាក់គ្នាទៅវិញទេ។
ក្រៅពីចិន កាលពីថ្ងៃចន្ទ រុស្ស៊ីក៏រិះគន់ជំនួបនៅកាណាដានេះដែរ ថាជាជំនួប បំផ្លិចបំផ្លាញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ