បាតុករភូមា៧នាក់ ត្រូវស្លាប់នៅក្នុងការបាញ់បង្ក្រាបចលនាបាតុកម្មតវ៉ាមួយនៅរដ្ឋរ៉ាឃីន
នៅភូមា អំពើហិង្សានានា បានកើតឡើងកាលពីថ្ងៃអង្គារទី១៦មករាម្សិលមិញនៅរដ្ឋរ៉ាឃីនភាគខាងលិចប្រទេស។ គឺជាតំបន់ក្រីក្រមួយដែលភាពតានតឹង មានរួចទៅហើយ ជាមួយនឹងវិបត្តិជនជាតិភាគតិចរ៉ូហ៊ីងយ៉ា ។ បាតុករភូមាដែលជាអ្នកកាន់ព្រះពុទ្ធសាសនាចំនួន៧នាក់ត្រូវបានស្លាប់ដោយស្នាដៃប៉ូលីសនៅឱកាសបាញ់បង្ក្រាបចលនាបាតុកម្មតវ៉ាមួយ ហើយជន១២នាក់ផ្សេងទៀតត្រូវរងរបួស។ ស្ថានការណ៍ បានវិលមករកភាពស្ងប់ស្ងាត់វិញហើយនៅថ្ងៃពុធនេះ-បើយោងតាមប្រភពនគបាលភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ចាប់តាំងពីព្រឹកថ្ងៃពុធនេះម្លេះ រូបថតរបស់ក្រុមបាតុករភូមាដែលត្រូវរងរបួសដោយសារគ្រាប់កាំភ្លើងរបស់ប៉ូលីស ត្រូវបានគេផ្សព្វផ្សាយយ៉ាងច្រើនសម្បើមនៅតាមបណ្តាញសង្គមភូមា។សូមបញ្ជាក់ថា កាលពីល្ងាចថ្ងៃអង្គារ៍ម្សិលមិញ ប្រជាជនភូមាដែលជាអ្នកកាន់ព្រះពុទ្ធ សាសនា ប្រមាណជា ៥០០០នាក់ នៅ ក្រុង Mrauk ភាគខាងជើងនៃរដ្ឋរ៉ាឃីន បាននាំគ្នាចុះតាមដងផ្លូវនានា ដើម្បីសម្តែងការប្រឆាំងតវ៉ារបស់ពួកគេ ទល់នឹងអាជ្ញាធរភូមា ដែលហាមឃាត់ មិនអោយពួកគេ បា្ររព្ធពិធីបុណ្យមួយដែលកំណត់សម្គាល់ពីការខ័ណ្ឌបញ្ចប់ នៃរាជាណាចក្ររ៉ាឃីនកាលពី អំឡុង ជាង ២០០ ឆ្នាំ មុន។
នៅក្នុងពេលល្ងាច ក្រុមបាតុករ បាននាំគ្នាដង្ហែរក្បួនបាតុកម្ម សំដៅទៅកាន់ អគាររបស់រដ្ឋមួយ។ បើតាមការអះអាងរបស់ប៉ូលីសភូមា នៅខណៈនោះ កងកម្លាំងសន្តិសុខ បានសាកល្បង ធ្វើការបំបែកហ្វូងបាតុករ តែពុំបានជោគជ័យ។ នៅពេលនោះហើយ ដែលកម្លាំងសន្តិសុខភូមា បានធ្វើការបាញ់រះជាលើកទីមួយដោយប្រើគ្រាប់ធ្វើពីកៅស៊ូ និង បន្ទាប់មកទៀត ប៉ូលីស បានចាប់បាញ់គ្រាប់កាំភ្លើងពិតៗតែម្តង។ នៅក្នុងការបាញ់បង្រ្កាបហ្វូងបាតុករកាលពីម្សិលមិញនេះ យោងតាមប្រភពប៉ូលីសភូមាដដែល មនុស្សស្លាប់មាន ៧ នាក់ និងអ្នករងរបួស ជាង ១២នាក់។ បាតុកររងរបួសខ្លះៗ ត្រូវបានគេដឹកបញ្ជូនទៅកាន់មន្ទីរពេទ្យនៅក្រុង Sittwe ដែលជាទីក្រុង របស់រដ្ឋរ៉ាឃីន។
គួររំលឹកថា រដ្ឋរ៉ាឃីន បានជួបប្រទះនឹងភាពតានតឹងនានាជាច្រើនមកហើយ។ គឺ ជាភាពតានតឹង រវាងប្រជាជនភូមាអ្នកកាន់ព្រះពុទ្ធសាសនានិងសហគមន៍ជនជាតិភាគតិចរ៉ូហ៊ីងយ៉ា អ្នកកាន់សាសនាអ៊ីស្លាម។ ដោយហេតុថា សហគមន៍អ្នកកាន់ព្រះពុទ្ធសាសនា តែងតែចាត់ទុកសហគមន៍ជនជាតិភាគតិចរ៉ូហ៊ីងយ៉ា ជាពួកអន្តោប្រវេស្តន៍រស់នៅខុសច្បាប់នៅលើទឹកដីភូមា។ ក្រៅពីនេះ ភាពតានតឹង ក៏មានផងដែរ រវាង អាជ្ញាធរកណ្តាល និងប្រជាជនភូមា ដែលភាគច្រើនជាអ្នកកាន់ព្រះពុទ្ធសានានៅក្នុងប្រទេស និងដែលត្រូវបានសហគមន៍ជនជាតិភាគតិចរ៉ូហ៊ីងយ៉ានៅរដ្ឋរ៉ាឃីន ចោទប្រកាន់ថា ជាសហគមន៍ រើសអើងប្រកាន់ពូជសាសន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ