មេធាវីចិនមា្នក់ត្រូវបានអាជ្ញាធរចាប់ខ្លួនដោយហេតុទាមទារការបោះឆ្នោតប្រធានាធិបតីចិនដោយសេរី
នៅប្រទេសចិន មេធាវីមួយរូប ត្រូវបានប៉ូលីសឃាត់ខ្លួននៅទីក្រុងប៉េកាំងនាថ្ងៃសុក្រនេះ ២៤ម៉ោងបន្ទាប់ពីគាត់បានអំពាវនាវឲ្យរបបកុម្មុយនិស្តចិន កែប្រែរដ្ឋធម្មនុញ្ញ ដើម្បីការបោះឆ្នោតប្រធានាធិបតី ដោយសេរីនៅក្នុងប្រទេសចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
ប៉ូលីសចិន ប្រមាណជា១០នាក់ ដែលមានកងកម្លាំងពិសេសដែរនោះ បានចាប់ខ្លួនមេធាវី Yu Wensheng នៅខណៈពេល គាត់កំពុងនាំកូនៗរបស់គាត់ទៅសាលារៀន។ រីឯ ប៉ូលីសចិនដែលទីភ្នាក់ងារព័ត៌មានបារាំង AFP ទាក់ទងសាកសួរព័តមានពីបញ្ហាចាប់ខ្លួនមេធាវីចិននៅព្រឹកមិញនេះ ក៏បដិសេធថាពុំបានដឹងពីរឿងនេះទេ។
នៅមួយថ្ងៃមុននេះ លោក Yu Wensheng បានធ្វើលិខិតចំហរមួយផ្ញើជូនដល់ក្រុមអ្នកកាសែត ដែលក្នុងលិខិតនោះ គាត់បានអំពាវនាវ ឲ្យទីក្រុងប៉េកាំងធ្វើកំណែទម្រង់ប្រព័ន្ធនយោបាយ និង អនុញ្ញាតជាអាទិ៍ ការបោះឆ្នោតប្រធានាធិបតីជាសកលនិងមានបេក្ខជនចូលរួមច្រើន។ នៅក្នុងលិខិតចំហរនោះ មេធាវីចិនបានលើកឡើងទៀតថា”ការតែងតាំងមនុស្សម្នាក់ ឲ្យធ្វើជាប្រធានាធិបតី តាមរយៈការបោះឆ្នោតគណបក្សតែមួយគត់នោះ គឺពុំមែនជាការបោះឆ្នោតទេ”“ចំណែកប្រធានាធិបតីវិញ ក៏ពុំបាទទួលទំនុកទុកចិត្តពីប្រជាជាតិ ឬសង្គមស៊ីវីល ឬក៏ពីប្រទេសក្រៅផងដែរ”។
គួររំលឹកថា លោកប្រធានាធិតបតី Xi Jinping កាលពីខែតុលាឆ្នាំមុន ត្រូវបានតែងតាំងសារជាថ្មីនៅក្នុងមុខតំណែងជាប្រមុខគណបក្សកុម្មុយនិស្តចិន(PCC)និង ក៏ត្រូវជាប់ឆ្នោតសារជាថ្មីជាប្រមុខរដ្ឋចិនសំរាប់អាណតិ៥ឆ្នាំ នៅខែមីនាខាងមុខនេះ។
គួររំលឹកថា លោក មេធាវី Yu Wensheng ធ្លាប់មានបញ្ហាជាមួយនឹងរបបកុម្មុយនិស្តចិនរួចទៅហើយជាអាទិ៍នៅក្នុងការគាំទ្ររបស់លោកចំពោះចលនាប្រជាធិបតេយ្យនៅហុងកុងកាលពីឆ្នាំ២០០៤។ នៅក្នុងហេតុការណ៍នេះ រូបលោក ត្រូវបានអាជ្ញាធរចិន បានចាប់ដាក់គុកចំនួន ៣ឆ្នាំ ដោយទទួលរងទារុណកម្មផង។ ម្យ៉ាងទៀត កាលពីឆ្នាំមុន មេធាវីចិននេះ បានសរសេរលិខិតចំហរមួយផ្កើនដាក់សមាជបក្ស។ដោយនៅក្នុងលិខិតនោះ គាត់រិះគន់ត្រង់ៗ ថា គណបក្សកុម្មុយនិស្តចិន និយាយអួតតែពីបញ្ហាសិទ្ធសេរីភាព លិទ្ធិប្រជាធិបតេយ្យ សមភាពនិងនីតិរដ្ឋ តែនៅក្នុងប្រទេសចិន គ្មានសោះឡើយបញ្ហាទាំងនេះ។ លើសពីនេះ មេធាវីចិន បានលើកកកាយទៀតថា នៅចិន មានតែ ពួកវរជននិងមហាសេដ្ឋីនោះទេដែល កាន់កាប់អំណាចនៅក្នុងប្រទេស ហើយអំពើពុករលួយវិញ មាននៅគ្រប់ទិសទី។ ក្រោយពីសរសេរលិខិតនេះរួចមក ប៉ូលីសចិន បានកោះហៅគាត់និងសាកសួរចំឡើយអស់៣ម៉ោង។
ហើយកាលពីឆ្នាំ ២០១៦ លោកមេធាវី Yu Wensheng ត្រូវបានគេស្គាល់មុខច្បាស់ ក្រោយពីគាត់បានប្តឹងសាលាក្រុងនៅប៉េកាំង អំពីការបំពុលបរិយាកាសនៅក្នុងតំបន់។
នារយៈពេលថ្មីៗនេះ រូបគាត់ត្រូវគេ បញ្ឈរជើងពីមុខវិជ្ជាជីវៈ ហើយការដាក់ពាក្យរបស់គាត់សុំចុះឈ្មោះការរិយាល័យថ្មីមួយ ក៏ត្រូវអាជ្ញាធរបដិសេធដែរ-នេះបើយោងតាមអង្គការការពារសិទ្ធិមនុស្សAmnesty International ដែល មានការមន្ទិលសង្ស័យ ខ្លាចលោក មេធាវីចិន អាចប្រឈមមុខនឹងការចោទប្រកាន់ពីបទប៉ុនប៉ងធ្វើវិទ្ធង្សនា”។
គួរបញ្ជាក់ថា ការចោទប្រកាន់ធំៗបែបនេះ ត្រូវបានគេធ្វើម្តងមកហើយកាលពីខែមុនដើម្បីផ្តន្ទាទោសដាក់ពន្ធនាគារចំនួន៨ឆ្នាំ លើសកម្មជនអ្នកប្រឆាំងមួយរូបឈ្មោះ Wu Gan៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ