វៀតណាម ចោទប្រកាន់ក្រុមវៀតណាមមួយ នៅអាមេរិកថា ជាពួកភេរវជន
ទីក្រុងហាណូយ នៅថ្ងៃអង្គារទី៣០មករា ២០១៨ បានប្រកាសចាត់ទុក អង្គការវៀតណាមមួយ ដែលមានមូលដ្ឋានក្នុងទឹកដី អាមេរិក ថា ជាក្រុមភេរវនិយម។ ការសម្រេចនេះបានធ្វើឡើង នៅប៉ុន្មានសប្តាហ៍ក្រោយ ដែលសមាជិករបស់ក្រុមនេះ ត្រូវបានតុលាការវៀតណាមផ្តន្ទាទោស ពីបទបានរៀបចំផែនការវាយប្រហារបំផ្លាញ ព្រលានយន្តហោះអន្តរជាតិ វៀតណាម កាលពីឆ្នាំ ២០១៧ឆ្នាំមុន។
ចុះផ្សាយនៅថ្ងៃ៖ កែប្រែថ្ងៃទី៖
អង្គការវៀតណាមដែលក្រសួងសន្តិសុខវៀតណាមដាក់ឈ្មោះថា ក្រុមភេរវនិយម មានឈ្មោះ ថា រដ្ឋាភិបាលជាតិបណ្តោះអាសន្នរបស់វៀតណាម (PNGV) ដែលមានមូលដ្ឋាននៅក្នុងទឹកដីអាមេរិក។ អង្គការនេះត្រូវបានបង្កើតឡើង នៅឆ្នាំ ១៩៩១ ដោយប្រជាជនវៀតណាម នៅបរទេស ក្នុងគោលដៅទាមទារឲ្យមានការបោះឆ្នោតដោយសេរី និងយុត្តិធម៌ នៅប្រទេសវៀតណាម ដែលកំពុងកាន់កាប់ បច្ចុប្បន្ន ដោយមេដឹកនាំផ្តាច់ការ។ នេះបើតាមខ្លឹមសាររបស់វិបសៃតិ៍របស់អង្គការមួយ នេះ ដែលដកស្រង់ដោយទីភ្នាក់ងារព័ត៌មានបារាំង AFP។
ប៉ុន្តែ នៅក្នុងវិបសៃតិ៍នៅថ្ងៃអង្គារ ក្រសួងសន្តិសុខសាធារណៈវៀតណាមបានចាត់ទុកអង្គការ PNGVថា ជាអង្គការភេរវនិយម បន្ទាប់ពីគេរកឃើញថា នៅក្នុងចំណោមឧក្រិដ្ឋជន ដែលតុលាការវៀតណាមបានផ្តន្ទាទោស កាលពីប៉ុន្មានសប្តាហ៍ មាន១៥នាក់ហើយជាសមាជិករបស់ក្រុមនេះ។ តុលាការបានបើកសវនការជំនុំជម្រះមនុស្សមួយក្រុម ដែលអាជ្ញាធរវៀតណាម បានចាប់ខ្លួន ពីបទរៀបចំគម្រោងបំផ្ទុះគ្រាប់ធុងសាំង នៅព្រលានយន្តហោះអន្តរជាតិ ដ៏សកម្មមួយ នៅវៀតណាម កាលពីឆ្នាំ ២០១៧។ នៅឆ្នាំ២០១៥ សមាជិករបស់ក្រុមនេះ ៥នាក់ក៏ធ្លាប់ត្រូវបានប៉ូលិសវៀតណាមចាប់ខ្លួន ក្នុងបទព្យាយាមទិញអាវុធដើម្បីធ្វើសកម្មភាពភេរវកម្ម។
តាមក្រសួងសន្តិសុខវៀតណាម សមាជិករបស់អង្គការPNGV មួយចំនួន ធ្លាប់ជាអតីតមន្រ្តីយោធា វៀតណាមខាងត្បូង ដែលបាក់ទ័ព រត់ទៅរស់នៅទឹកដីអាមេរិក នៅក្រោយជ័យជំនះរបស់ក្រុមលោកហូជីមិញ ទៅលើរដ្ឋាភិបាលខាងត្បូង ដែលគាំទ្រដោយអាមេរិក។ នៅក្នុងវិបសៃតិ៍របស់ក្រសួងសន្តិសុខសាធារណៈបានព្រមានដែថា រាល់អ្នកដែលជួយជំរុញ ផ្សព្វផ្សាយ ឬធ្វើការពាក់ព័ន្ធជាមួយក្រុមនេះ នឹងរងការពិន័យ ការផ្តន្ទាទោសតាមច្បាប់វៀតណាម។
នៅក្នុងប្រទេសកម្មុយនិស្តវៀតណាម អាជ្ញាធរតែងបង្រ្កាបទៅលើអ្នកដែលហ៊ានរិះគន់ ខ្លួន ក្នុងបទចោទប្រកាន់ប្រឆាំងរដ្ឋាភិបាល ឬប៉ុនប៉ងផ្តួលរំលំរដ្ឋាភិបាល ប៉ុន្តែ កម្រនឹងមានបទចោទប្រកាន់ថា ជាក្រុមភេរវនិយម ដែលអាចមានទម្ងន់ស្មើនឹងទោសប្រហារជីវិត។ នេះជាលើកទី២ ដែល អាជ្ញាធរវៀតណាម លើកនិយាយពីក្រុមភេរវនិយម បន្ទាប់ពីបានចោទវៀតណាមមួយក្រុម ឈ្មោះ Viet Tan ដែលមានមូលដ្ឋាននៅអាមេរិក ថា ជាក្រុមភេរវនិយម មានចេតនាញុះញង់ឲ្យមានអំពើហិង្សានៅវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ