អ.ស.ប.៖ ការធ្វើទុក្ខបុកម្នេញប្រឆាំងទៅលើជនភាគតិចរ៉ូហ៊ីងយ៉ា អាចបង្កឲ្យមានជម្លោះសាសនានៅក្នុងតំបន់
ឧត្តមស្នងការនៃអង្គការសហប្រជាជាតិ បានព្រមាននៅថ្ងៃចន្ទទី ៥កុម្ភៈនេះថា ការធ្វើទុក្ខបុកម្នេញនិងបោសសំអាតជាតិពិន្ធុឬក៏ការប្រល័យពូជសាសន៍ប្រឆាំងនឹងជនភាគតិចរ៉ូហ៊ីងយ៉ាដែលជាអ្នកកាន់សាសនាអ៊ីស្លាមនៅភូមា អាចនឹងបង្កឲ្យមានជម្លោះសាសនានៅក្នុងតំបន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
ឧត្តមស្នងការអង្គការសហប្រជាជាតិ លោក Zeid Ra’ad Al Hussein បានថ្លែងនៅទីក្រុងហ្សាកាតា ប្រទេសឥណ្ឌូណេស៊ីក្នុងថ្ងៃចន្ទនេះថា “ភូមាកំពុងប្រឈមមុខនឹងវិបត្តិដ៏ធ្ងន់ធ្ងរមួយជាមួយនឹងផលប៉ះពាល់ដ៏ខ្លាំងក្លានៅក្នុងតំបន់"។
សេចក្តីថ្លែង របស់ឧត្តមស្នងការ អ.ស.ប.នេះ ត្រូវបានធ្វើឡើងបន្ទាប់ពីមានការចេញផ្សាយនាសប្តាហ៍មុននូវអត្ថបទសាព័ត៌មានជាច្រើនដែលអះអាងថា នៅភូមាមានរណ្តៅកប់ខ្មោចរួមនៅរដ្ឋរ៉ាឃីនភាគខាងលិចប្រទេសភូមា។
នៅលើព័ត៌មាននេះ អាជ្ញាធរភូមា បានធ្វើការបដិសេធថាពុំមានទេទាំងរណ្តៅកប់ខ្មោចរួមនិងទាំងការរំលោភសិទ្ធមនុស្សឡើយនៅភូមា។ តែអាជ្ញាធរភូមា បានគូសបញ្ជាក់ប្រាប់ថា អាជ្ញាធរបានចាប់ផ្តើមបើកប្រតិបត្តិការមួយដ៏ម៉ឹងម៉ាត់មួយដើម្បីធ្វើការប្រយុទ្ធប្រឆាំងទល់នឹងពួកឧទ្ទាមរ៉ូហ៊ីងយ៉ា។
នៅខណៈនេះ កងទ័ពភូមា បានធ្វើការឡោមព័ទ្ធបិទស្ទើរតែជិតឈឹងទៅហើយនៅតំបន់រ៉ាឃីននិងក៏ពុំអាចអនុញ្ញាតអោយដល់អ្នកកាសែតឬក៏ក្រុមអ្នកស៊ើបអង្កេតណាមួយអាចឈានជើងចូលទៅដល់ទីនោះបានឡើយ។
ឧត្តមស្នងការអ.ស.ប. បានគូសបញ្ចាក់ទៀតថា នៅក្រោមជំនាន់របបសឹកភូមា សហគមន៍រ៉ូហ៊ីងយ៉ា ត្រូវបានពួកយោធា ដកសញ្ជាតិភូមាពីពួកគេនៅក្នុងឆ្នាំ១៩៨២។ ហើយរហូត មកទល់ពេលនេះទៀត ពួកគេនៅតែជាជនរងគ្រោះដដែលនៃការប្រកាន់រើសអ៊ើងគ្រប់ជំពូកដូចជា ពុំមានអត្តសញ្ញាប័ណឬក៏ពុំអាចធ្វើដំណើរទៅណាបានដោយសេរី ឬក៏ពុំមានសិទ្ធិរៀបចំអាព៌ាពិពាហ៍ទេ បើពួកគេពុំមានការអនុញ្ញាតពីអាជ្ញាធរភូមានោះ។
សូមបញ្ជាក់ថា លោក Zeid Ra’ad Al Hussein ឧត្តមស្នងការអសប ត្រូវជួបចរចាជាមួយប្រធានាធិបតីឥណ្ឌូណេស៊ី Joko Widodo បណ្តាអ្នកទទួលខុសត្រូវរបស់រដ្ឋាភិបាលឥណ្ឌូណេស៊ី ក៏ព្រមទាំងអ្នកទទួលខុសត្រូវនានាខាងផ្នែកសិទ្ធិមនុស្សនៅឱកាសដំណើរទស្សនកិច្ចរបស់លោកចំនួន៣ថ្ងៃនៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ