“អាមរិកនឹងធ្វើការដាក់ទណ្ឌកម្មជាទម្ងន់បំផុតប្រឆាំងទល់នឹងកូរ៉េខាងជើង
នៅតែប៉ុន្មានថ្ងៃទៀតប៉ុណ្ណោះមុនពេលបើកការប្រកួតកីឡាអូឡាំពិកនារដូវរងារនៅក្រុង Pyeong Chang ក្នុងប្រទេសកូរ៉េខាងត្បូង អនុប្រធានាធិបតីអាមេរិក លោក Mike Pence បានជូនដំណឹងនៅថ្ងៃពុធទី៧មករាម្សិលមិញពីទីក្រុងតូក្យូក្នុងប្រទេសជប៉ុនថា “សហរដ្ឋអាមេរិកនឹងបើកបង្ហាញឲ្យដឹងពីវិធានការដាក់ទណ្ឌកម្មដ៏សែនធ្ងន់ធ្ងរពុំធ្លាប់មានពីមុននៅក្នុងការប្រឆាំងនឹងទីក្រុងព្យុងយ៉ាង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ពីទីក្រុងតូក្យូប្រទេសជប៉ុន អនុប្រធានាធិបតីអាមេរិកលោក Mike Pence ដែលកំពុងបំពេញទស្សនកិច្ចនៅទីនោះ បានថ្លែងយ៉ាងម៉ឹងម៉ាត់ថា អាមេរិកនឹងចាត់វិធានការថ្មីៗបន្ថែមទៀតនៅក្នុងការដាក់ទណ្ឌកម្មសេដ្ឋកិច្ចប្រឆាំងទល់នឹងកូរ៉េខាងជើង។ បើតាមការគូសបញ្ជាក់របស់លោក Pence គឺជាការដាក់ទណ្ឌកម្មសេដ្ឋកិច្ចដ៏សែនធ្ងន់ធ្ងរបំផុតប្រឆាំងនឹងទីក្រុងព្យុងយ៉ាង។ ហើយគោលដៅនៃការដាក់ទណ្ឌកម្មនេះ គឹដើម្បីបង្ខំអោយកូរ៉េខាងជើង ធ្វើការបោះបង់ចោលអាវុធបរិមាណូនិងមហិច្ចតារបស់ខ្លួននៅក្នុងការផលិតគ្រាប់មីស៊ីលអន្តរៈទ្វីប។
បន្ទាប់ពីកិច្ចពិភាក្សាគ្នាមួយជាមួយនាយករដ្ឋមន្ត្រីជប៉ុន Shinzo Abe ស្តីអំពី ការគំរាមរបស់កូរ៉េខាងជើង លោក Pence បានថ្លែងថា “ សហរដ្ឋអាមេរិកនឹងបើកបង្ហាញប្រាប់អោយពិភពលោកដឹងនាពេលឆាប់ៗនេះ អំពី ការដាក់ទណ្ឌកម្មសេដ្ឋកិច្ចដ៏ធ្ងន់ធ្ងរនិងខ្លាំងក្លាបំផុតរបស់អាមេរិក ដែលពុំធ្លាប់មានពីមុនឡើយដើម្បីប្រឆាំងទល់នឹងទីក្រុងព្យុងយ៉ាង។ សេចក្តីថ្លែងបញ្ជាក់របស់អនុប្រធានាធិបតីអាមេរិកនេះ ត្រូវបានធ្វើឡើង នៅក្នុងថ្ងៃទីពីរនៃដំណើរទស្សនកិច្ចរបស់លោកចំនួន៣ថ្ងៃនៅក្នុងប្រទេសជប៉ុន នៅខណៈពេលដែលការប្រកួតកីឡាអូឡាំពិកនារដូវរងារនឹងត្រូវចាប់ផ្តើមបើកនៅថ្ងៃសុក្រទី៩កុម្ភៈខាងមុខនៅកូរ៉េខាងត្បូងនិងដែលត្រូវដឹកនាំគណៈប្រតិភូអាមេរិកដោយលោក Pence ផ្ទាល់ផង។
អនុប្រធានាធិបតីអាមេរិក បានថ្លែងបន្ថែមទៀតថា អាមេរិក នឹងមិនទុកបណ្តោយអោយទីក្រុងព្យុងយ៉ាងយកការប្រកួតកីឡាអូឡាំពិកនេះ មកធ្វើជាមធ្យោបាយដើម្បីធ្វើការឃោសនានយោបាយរបស់កូរ៉េខាងជើងឡើយ។ លោក បានថ្លែងបញ្ចាក់ទៀតថា អាមេរិក នឹងនៅតែបន្តយុទ្ធនាការដាក់សម្ពាធរបស់ខ្លួនជាបន្ថែមទៀត ដរាបណា កូរ៉េខាងជើង នៅតែមានៈពុំព្រមបោះបង់ចោល ការរំសាយអាវុធនុយក្លេអ៊ែររបស់ខ្លួនទាំងស្រុងនោះទេ។
ចំណែកលោក Abe នាយករដ្ឋមន្ត្រីជប៉ុនវិញ ដែលនឹងត្រូវអញ្ជើញទៅកាន់ក្រុង Pyeonchang ក្នុងប្រទេសកូរ៉េខាងត្បូង ដើម្បីចូលរួមក្នុងកីឡាអូឡាំពិករដូវរងារនេះដែរបានគូសបញ្ចាក់បន្ថែមដែរថា "ប្រទេសជប៉ុននឹងមិនយល់ព្រមជាដាច់ខាត ក្នុងការទុកអោយកូរ៉េខាងជើងមួយនេះ ធ្វើការបំពាក់អាវុធនុយក្លេអ៊ែរនោះឡើយ"៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ