អតីតនាយករដ្ឋមន្រ្តីបង់ក្លាដែសត្រូវតុលាការកាត់ទោសដាក់ពន្ធនាគារ៥ឆ្នាំពីបទពុករលួយ
លោកស្រី ខាលីដា ហ្ស៊ីយ៉ា (Khaleda Zia) អតីតនាយករដ្ឋមន្រ្តីបង់ក្លាដែស ត្រូវបានតុលាការកាត់ទោសនៅថ្ងៃព្រហស្បតិ៍នេះ ដាក់ពន្ធនាគារ ៥ឆ្នាំ ពីបទពុករលួយ ប្រព្រឹត្តក្នុងអំឡុងពេលដែលលោកស្រីកាន់តំណែងជានាយករដ្ឋមន្រ្តី។ លោកស្រីខាលីដា ហ្ស៊ីយ៉ា បានបដិសេធរាល់ការចោទប្រកាន់លើលោកស្រី ដោយបានចាត់ទុកការកាត់ទោសដាក់ពន្ធនាគារលោកស្រីនៅពេលនេះថាជារឿងនយោបាយ។
ចុះផ្សាយនៅថ្ងៃ៖ កែប្រែថ្ងៃទី៖
លោកស្រី ខាលីដា ហ្ស៊ីយ៉ា ដែលធ្លាប់កាន់តំណែងជានាយករដ្ឋមន្រ្តីដល់ទៅពីរលើក គឺលើកទី១ ពីឆ្នាំ១៩៩១ ដល់ឆ្នាំ១៩៩៦ និងលើកទី២ ពីឆ្នាំ២០០១ ដល់ឆ្នាំ២០០៦ បច្ចុប្បន្នគឺជាមេដឹកនាំប្រឆាំងដ៏សំខាន់ និងជាគូប្រជែងដ៏ជូរចត់របស់នាយករដ្ឋមន្រ្តីបច្ចុប្បន្ន គឺលោកស្រី ស្ហេក ហាស៊ីណា (Sheik Hasina)។
នៅក្នុងការចោទប្រកាន់ពីបទពុករលួយ រដ្ឋអាជ្ញាបង់ក្លាដែសបានទាមទារឲ្យចៅក្រមកាត់ទោសដាក់ពន្ធនាគារអស់មួយជីវិត ក៏ប៉ុន្តែ នៅទីបំផុតទៅ ចៅក្រមសម្រេចដាក់ទោសត្រឹម ៥ឆ្នាំ។ ក៏ប៉ុន្តែ បើទោះបីជាយ៉ាងនេះក៏ដោយ ការកាត់ទោសដាក់ពន្ធនាគារ ៥ឆ្នាំនេះ គឺមានន័យថា លោកស្រី ខាលីដា ហ្ស៊ីយ៉ា នឹងមិនអាចឈរឈ្មោះជាបេក្ខជនបានទេ នៅក្នុងការបោះឆ្នោតជាតិ ដែលគ្រោងនឹងរៀបចំធ្វើ នៅក្នុងឆ្នាំនេះ។
ហេតុដូច្នេះហើយបានជាលោកស្រី ក៏ដូចជា គណបក្សរបស់លោកស្រីបានអះអាងថា ការកាត់ទោសនេះ ធ្វើឡើង នៅក្នុងគោលដៅតែមួយគត់ គឺរារាំងលោកស្រីមិនឲ្យឈរឈ្មោះជានាយករដ្ឋមន្រ្តី។
គួររំឭកឡើងវិញថា ការចោទប្រកាន់ពីបទពុករលួយលើលោកស្រី ខាលីដា ហ្ស៊ីយ៉ានេះ បានធ្វើឲ្យគណបក្សរបស់លោកស្រីធ្វើពហិការមិនចូលរួមក្នុងការបោះឆ្នោតម្តងរួចមកហើយ កាលពីឆ្នាំ២០១៤កន្លងទៅ ដែលកាលណោះ បានបង្កឲ្យមានបាតុកម្មតវ៉ាប្រឆាំងនៅទូទាំងប្រទេស។
នៅថ្ងៃព្រហស្បតិ៍នេះ នៅមុនពេលប្រកាសសាលក្រមដាក់ទោសលោកស្រី ខាលីដា ហ្ស៊ីយ៉ា ការប៉ះទង្គិចគ្នាដោយហិង្សាបានផ្ទុះឡើង រវាងក្រុមអ្នកគាំទ្រលោកស្រី និងកងកម្លាំងរក្សាសន្តិសុខ ដែលរដ្ឋាភិបាលដាក់ពង្រាយ ដើម្បីរារាំងពួកគេ កុំឲ្យចូលទៅក្បែរទីតាំងតុលាការ។ យោងតាមប្រព័ន្ធផ្សព្វផ្សាយក្នុងស្រុក ការប៉ះទង្គិចគ្នានេះបានកើតឡើងជាច្រើនគីឡូម៉ែត្រ ពីតុលាការ ហើយបានបណ្តាលឲ្យប៉ូលិសយ៉ាងតិច ៥នាក់ ត្រូវរងរបួស។
នាយកអង្គការសិទ្ធិមនុស្ស Human Rights Watch ប្រចាំតំបន់អាស៊ី គឺលោក ប្រ៊ែត អាដាម បានធ្វើការអំពាវនាវ នៅថ្ងៃព្រហស្បតិ៍នេះ ឲ្យរដ្ឋាភិបាលបង់ក្លាដែសបញ្ឈប់នូវរាល់ការចាប់ខ្លួន ឬឃុំខ្លួនក្រុមប្រឆាំងដោយគ្មានមូលដ្ឋានច្បាប់ ព្រមទាំងបានលើកឡើងថា ការណ៍ដែលរដ្ឋាភិបាលអះអាងថា ខ្លួនគោរពនូវលទ្ធិប្រជាធិបតេយ្យនោះ គឺគ្មានន័យអ្វីទៀតទេ ក្នុងពេលដែលខ្លួនបន្តធ្វើទុក្ខបុកម្នេញអ្នកប្រឆាំងខាងនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ