កូរ៉េខាងជើងពិតជាចង់ចរចាជាមួយអាមេរិកមែនរឺ?
ចុះផ្សាយនៅថ្ងៃ៖
ស្តាប់ - ០៣:៣៧
តាំងពីថ្ងៃបើកការប្រកួតកីឡាអូឡាំពិកព្យុងឆាង រហូតដល់ថ្ងៃបិទបញ្ចប់ទៅវិញម្សិលមិញ ក៏តំណាងប្រតិភូអាមេរិក និងកូរ៉េខាងជើង ដែលមានវត្តមាននៅកូរ៉េខាងត្បូង មិនដែលធ្វើការទំនាក់ទំនងគ្នាផ្ទាល់ណាមួយទេ។ តែថ្ងៃអាទិត្យម្សិលមិញ ខាងរដ្ឋាភិបាលកូរ៉េខាងត្បូងចេញសេចក្តីថ្លែងការណ៍មួយ លើកឡើងថា ប្រតិភូក្រុងព្យុងយ៉ាងយល់ស្របថា ការចរចារវាងកូរ៉េទាំង២ និងទំនាក់ទំនងរវាងកូរ៉េខាងជើងជាមួយអាមេរិក ត្រូវតែប្រសើរឡើងក្នុងពេលជាមួយគ្នា។
តើកូរ៉េខាងជើងពិតជាត្រៀមខ្លួនចរចាជាមួយអាមេរិកមែនរឺយ៉ាងណា? រដ្ឋាភិបាលកូរ៉េខាងត្បូងបានប្រាប់ថា ក្នុងពេលជួបជជែកជាមួយតំណាងប្រតិភូកូរ៉េខាងជើង ដែលមានវត្តមានក្នុងពិធីប្រកួតកីឡាអូឡាំពិកព្យុងឆាង ប្រតិភូកូរ៉េខាងជើងបានបង្ហាញបំណងថា ចង់ចរចាជាមួយអាមេរិក។ មិនដឹងថា តើគេអាចជឿបានរឺទេ ព្រោះថា តាំងពីថ្ងៃបើកការប្រកួតកីឡាអូឡាំពិក នៅព្យុងឆាង រហូតដល់ថ្ងៃបិទបញ្ចប់ទៅវិញហើយក៏ដោយ ក៏គេមិនបានឃើញតំណាងប្រតិភូអាមេរិក និងកូរ៉េខាងជើងមានទំនាក់ទំនងគ្នាដោយផ្ទាល់ដែរ ទោះជាពួកគេមានវត្តមានក្បែរគ្នា អាចចាប់ដៃគ្នាក៏ដោយ។
លើសពីនេះទៀត មុននឹងកូរ៉េខាងត្បូងចេញសេចក្តីថ្លែងការណ៍ថា កូរ៉េខាងជើងចង់ចរចាជាមួយអាមេរិកនេះ កូរ៉េខាងជើងនិងអាមេរិកទើបតែទាស់សំដីគ្នាប៉ុណ្ណោះ។ ដូច្នេះ អាចថា កូរ៉េខាងត្បូងប្រកាសដូច្នេះ ដើម្បីបន្ធូរបន្ថយស្ថានភាពតានតឹងទេដឹង? ភាពតានតឹងទាស់គ្នានេះ មានប្រភពចេញមកពីលោកដូណាល់ ត្រាំ តាំងពីថ្ងៃសុក្រសប្តាហ៍មុនមក។ គឺលោកដូណាល់ ត្រាំ បានប្រកាសទណ្ឌកម្មឯកតោភាគី ធ្ងន់មិនធ្លាប់មាន ថែមទៀត ទៅលើកូរ៉េខាងជើង។ ជាទណ្ឌកម្មទៅលើក្រុមហ៊ុនជាង៥០ដែលគេសង្ស័យថា បានជួយកូរ៉េខាងជើងអោយបង្វែរទណ្ឌកម្មអន្តរជាតិ។
ថ្ងៃសៅរ៍កូរ៉េខាងជើងប្រតិកម្មចោទទៅអាមេរិកថា ចង់បង្ករឿងក្នុងឧបទ្វីប។ កូរ៉េខាងជើងចាត់ទុកថា ទណ្ឌកម្មនេះជាការបិទផ្លូវពីសំណាក់អាមេរិក ប្រៀបបាននឹងសកម្មភាពសង្គ្រាមប្រឆាំងកូរ៉េខាងជើងដូច្នោះដែរ។ ទំនាក់ទំនងតានតឹងមួយទៀតដែរនោះ គឺរវាងអនុប្រធានាធិបតីអាមេរិក លោក Mike Pence និងប្អូនស្រីលោកគឹម ជុងអ៊ុន គឺលោកស្រីKim Yo Jong។ លោក Mike Pence បានប្រកាសថា លោកស្រីគឹម នេះជាសសរគ្រឹះនៃរបបឃោរឃៅបំផុតក្នុងពិភពលោក។ អនុប្រធានាធិបតីអាមេរិកប្រហែលជាខឹងនឹងកូរ៉េខាងជើងដែលបានសម្រេចលុបចោលជំនួបជាមួយខ្លួន នៅព្យុងឆាង ក្នុងនាទីចុងក្រោយ ខណៈគ្រប់គ្នាកំពុងទន្ទឹងចាំអន្ទះសា មើលជំនួបប្រវត្តិសាស្ត្រនេះ។
បើកូរ៉េខាងជើងចង់ចរចា ហេតុអ្វីក៏លុបចោលជំនួបនេះ អាមេរិកប្រាប់ថា មកពីក្រុងព្យុងយ៉ាងសង្ឃឹមថា អនុប្រធានាធិបតីអាមេរិកអាចបន្ទន់សារ ចំពោះកូរ៉េខាងជើង តែដល់តែអាមេរិកនៅតែចង់និយាយពិបញ្ហានុយក្លេអ៊ែរ និងបន្តរិះគន់បញ្ហាសិទ្ធិមនុស្ស ក្រុងព្យុងយ៉ាងមិនសប្បាយចិត្តទេ។ តែខាងអាមេរិកវិញ ហេតុអ្វីក៏មិនបន្ទន់ជំហរខ្លះទៅ ក្រែងដឹងដែរតើថា កូរ៉េខាងជើងក៏ចង់ចរចាជាមួយខ្លួនដែរ ហេតុអ្វីក៏នៅតែតឹងតែង និងបន្តបន្ថែមទណ្ឌកម្មទៅវិញ? កូរ៉េខាងជើងបានសម្រេចបញ្ជូនកីឡាករ មកព្យុងឆាង បញ្ជូនទាំងប្រតិភូ មានទាំងប្អូនស្រីលោកគឹម ជុងអ៊ុនផ្ទាល់ មានទាំងតំណាងអ្នកទទួលបន្ទុកកិច្ចការអាមេរិកទៀត សបង្ហាញថា កូរ៉េខាងជើងចង់ប្រាប់អន្តរជាតិថា សុខចិត្តបន្ទន់ជំហរ ត្រៀមចរចាដោះស្រាយបញ្ហា។ ប៉ុន្តែ ខាងអាមេរិកបែរជានៅតែតឹងតែដាក់ទណ្ឌកម្មទៅវិញ។
យោងតាមក្រុមជំនាញ បញ្ហាគឺមកពីអាមេរិកនៅមិនទាន់ទុកចិត្តកូរ៉េខាងជើង ថាកូរ៉េខាងជើងព្រមបោះបង់កម្មវិធីនុយក្លេអ៊ែរ។ ដោយសារតែមិនទុកចិត្តនេះហើយ ទើបអាមេរិកនៅតែបន្តរិះគន់ និងដាក់ទណ្ឌកម្មលើក្រុងព្យុងយ៉ាង ដើម្បីជំរុញអោយក្រុងព្យុងយ៉ាងបោះបង់នុយក្លេអ៊ែរនិងមីស៊ីល។
ក្នុងពេលមានកីឡាអូឡាំពិកនៅកូរ៉េខាងត្បូង អាមេរិកនិងកូរ៉េខាងជើងដែលស្ទើរតែអាចឆក់ឱកាសចរចាគ្នា ចាប់ដៃគ្នាបានទៅហើយ ព្រោះខាងក្រុងព្យុងយ៉ាងក៏ដូចជាបានត្រៀមខ្លួន ហើយខាងអាមេរិកដូចគ្នា។ តែភាគីម្ខាងៗក៏នៅតែខ្លាំងដាក់គ្នារៀងខ្លួន។ ថ្ងៃអាទិត្យកន្លងទៅ កូរ៉េខាងជើងប្រកាសថា គ្មានការចរចាផ្ទាល់ជាមួយបណ្តាជនដែលមើលងាយភាពថ្លៃថ្នូរមេដឺកនាំកូរ៉េខាងជើងទេ។ ថ្ងៃចន្ទម្សិលមិញ ប្រធានាធិបតីកូរ៉េខាងត្បូង លោក មូន ចែអ៊ីន បានទាមទារអោយសហរដ្ឋអាមេរិកកុំអោយទាមទារខ្លាំងពេក កុំអោយតឹងតែងខ្លាំងពេកជាមួយកូរ៉េខាងជើង ក្នុងរឿងចរចា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ