ជប៉ុនរក្សាទុកស្ថានីយ៍មួយ សម្រាប់ដឹកអ្នកដំណើរតែម្នាក់ ទៅវិទ្យាល័យ
ក្រុមហ៊ុនអយស្ម័យយានជប៉ុន Japan Railways បានរក្សាទុកស្ថានីយ៍មួយ ក្នុងតំបន់ដាច់ស្រយាលបំផុត តាំងពីបីឆ្នាំមកហើយ សម្រាប់ដឹកអ្នកដំណើរតែម្នាក់គត់ ៖ សិស្សវិទ្យាល័យ ភេទស្រី។ ពេលនេះយុវតី បានប្រលងជាប់បាក់ឌុបហើយ ក្រុមហ៊ុនក៏បិទស្ថានីយ៍នោះទៅ។ ថ្ងៃនេះ សារព័ត៌មានជប៉ុនទាំងឡាយ បាននាំគ្នាចុះផ្សាយស្វាគមន៍ទង្វើរបស់ក្រុមហ៊ុន ដែលហ៊ានប្រឈមនឹងការខាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ក្រុមហ៊ុនអយស្ម័យយានជប៉ុន Japan Railways បានកា្លយជាក្រុមហ៊ុនឯកជនចំនួន២៥ឆ្នាំហើយ ! តែក្រុមហ៊ុនបានសម្រេចចិត្តមិនលុបបណ្តាញនិងស្ថានីយ៍ នៅភាគខាងជើងបំផុតនៃប្រទេស ក្នុងកោះហុកកៃដូទេ បើទោះបីជាគ្មានក្រុមហ៊ុនណាអាចរកចំណេញក៏ដោយ។ មូលហេតុគឺ ដើម្បីផ្តល់សំណាងដល់យុវតីម្នាក់ ដែលរស់ក្នុងតំបន់ដាច់ស្រយាល មានសត្វច្រើនជាមនុស្ស អាចធ្វើដំណើរទៅបន្តការសិក្សា រហូតទទួលបានសញ្ញាប័ត្រទុតិយភូមិ។
Japan Railways បានប្រកាន់ពាក្យសន្យារបស់ខ្លួន ! រថភ្លើងបានទៅឈប់នៅស្ថានីយ៍ពីរដងក្នុងមួយថ្ងៃ ព្រឹកម៉ោង ៧ និង០៤នាទី និងល្ងាចម៉ោង៥ និង០៨នាទី ដឹកអ្នកដំណើរតែម្នាក់គត់ រយៈពេលបីឆ្នាំគត់ រហូតទាល់តែយុវតីបានប្រលងជាប់សញ្ញាប័ត្របញ្ចប់ការសិក្សានៅវិទ្យាល័យ។ នេះទំនងជាសេចក្តីសម្រេចចិត្តតែមួយគត់លើលោក និងដែលបានធ្វើឲ្យអ្នកសារព័ត៌មានជប៉ុនមានការងឿងឆ្ងល់ និងចាប់អារម្មណ៍ខ្លាំង។ បើតាមសារព័ត៌មានទាំងនោះ ក្រុមហ៊ុន Japan Railways ឬ JR សុខចិត្តរក្សាសេវាកម្មរបស់ខ្លួន ដោយមិនចង់រងការចោទប្រកាន់ថា ជាដើមហេតុធ្វើយុវតី កាលណោះទើបអាយុ១៦ឆ្នាំមិនបានទទួលការសិក្សា។
បច្ចុប្បន្ននេះ ជប៉ុនកំពុងជួបវិបត្តិពលរដ្ឋថយចុះ និងមានចំនួនក្មេងពេញវ័យទៅសាលារៀនធ្លាក់ចុះ គួរឱ្យព្រួយបារម្ភ។ ដូច្នេះបើក្រុមហ៊ុនរក្សាទុកសេវាដឹកជញ្ជូនផ្លូវដែករបស់ខ្លួន គឺដូចបានចូលរួមចំណែកទាក់ទាញយុវវ័យឱ្យទៅសិក្សា។ សិស្សតិច ការប្រកួតប្រជែងចូលមហាវិទ្យាល័យក៏លែងសូវចង្អៀត ក្មេងជប៉ុនក៏លែងសូវមានឆន្ទៈចង់ឈ្នះនៅសាលាដែរ។
នេះក៏ជាការផ្សាយពាណិជ្ជកម្មដើម្បីមុខមាត់ល្អរបស់ក្រុមហ៊ុនដែរ។ យុវតីបានជាប់បាក់ឌុបយូរហើយ ប៉ុន្តែសេចក្តីរីករាយអបអរនៅតាមបណ្តាញសង្គម មិនធ្លាក់ចុះទេ។ គ្រប់គ្នាបន្តកោតសរសើរឆន្ទៈរបស់ជប៉ុន តាមរយៈក្រុមហ៊ុន ដែលមិនបោះបង់ប្រជាជនរស់នៅក្នុងតំបន់ដាច់ស្រយាល ទោះបីតិចតួចខ្លាំងយ៉ាងណាក៏ដោយ។
ចេញពីស្ថានីយ៍ Kami-Shirataki យុវតី Kana Harada អាចជួបមិត្តរួមថ្នាក់បួនដប់នាក់ផ្សេងទៀត នៅពេលទៅដល់ស្ថានីយ៍បន្ទាប់ជិតខាង ដែលពួកគេនេះជាធម្មតាអាចមានរទេះភ្លើងបីខ្សែឆ្លងកាត់ដឹកមកផ្ទះវិញ។
នៅពេលក្រុមហ៊ុន JR សម្រេចចិត្តរក្សាស្ថានីយ៍របស់នាង និងស្ថានីយ៍ជិតៗនោះពីរទៀត ក្រុមហ៊ុនហាក់បានដាក់សម្ពាធឱ្យយុវជនថាត្រូវតែប្រលងឱ្យជាប់។ នេះក៏អាចជាវិធីជំរុញនាងឲ្យប្រឹងរៀនដើម្បីបានទទួលសញ្ញាប័ត្រដែរ។ ក្នុងរយៈពេលប៉ុន្មានឆ្នាំចុងក្រោយនេះ ដោយសារតែចំនួនប្រជាពលរដ្ឋធ្លាក់ចុះខ្លាំង កោះហុកកៃដូបានលុបខ្សែរថភ្លើងអស់២០ខ្សែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ