នុយក្លេអ៊ែរកូរ៉េខាងជើង ៖ សេអ៊ូលបង្កើនសកម្មភាពការទូត ដោយមិនភ្លេចចិននិងជប៉ុន
គ្រាន់តែត្រលប់មកពីជួបលោកដូណាល់ត្រាំភ្លាម ក្រុមប្រតិភូកូរ៉េខាងត្បូង ដែលជាតំណាងពិសេសរបស់លោកប្រធានាធិបតី មូន ចែអ៊ីន និងដែលបានជួបពិភាក្សាផ្ទាល់ជាមួយប្រមុខគីម ជុនអ៊ុននៅព្យុងយ៉ាង ត្រូវបន្តមានជំនួបជាមួយលោកប្រធានាធិបតីចិន និងនាយករដ្ឋមន្ត្រីជប៉ុនទៀត នៅថ្ងៃចន្ទនិងអង្គារស្អែក។ នេះបើតាមវិមានប្រធានាធិបតីកូរ៉េខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
លោក ជុង អ៊ឺយុងChung Eui-yong ទីប្រឹក្សាសន្តិសុខជាតិរបស់ប្រធានាធិបតីកូរ៉េខាងត្បូង ត្រូវមានជំនួបជាមួយប្រធានាធិបតីចិន លោក ស៊ី ជីនពីង នៅថ្ងៃចន្ទទី ១២មីនា។ ចំណែកលោក ស៊ុ ហូន Suh Hoon ប្រធានភ្នាក់ងារចារកិច្ចកូរ៉េខាងត្បូង នឹងត្រូវជួបពិភាក្សាជាមួយលោក ស្ហ៊ីនហ្សូ អាបេ នាយករដ្ឋមន្ត្រីជប៉ុន នៅថ្ងៃអង្គារបន្ទាប់។
ជំនួបទាំងពីរដាច់ឡែកពីគ្នា នៅចិន និងនៅជប៉ុន នេះ គឺដើម្បីជជែកអំពីខ្លឹមសារនៃជំនួបរវាងប្រតិភូកូរ៉េខាងត្បូង ជាមួយប្រមុខដឹកនាំកូរ៉េខាងជើង គីម ជុងអ៊ុន កាលពីសប្តាហ៍មុន។ បន្ទាប់ពីប្រទេសចិន ប្រធានប្រតិភូកូរ៉េខាងត្បូងនេះ ក៏មានគម្រោងធ្វើដំណើរទៅរុស្ស៊ីទៀត ដើម្បីជួបពិភាក្សាជាមួយនឹងលោកប្រធានាធិបតីពូទីន ប៉ុន្តែ ការិយាល័យវិមានប្រធានាធិបតីកូរ៉េខាងត្បូង ពុំទាន់អាចលម្អិតព័ត៌មានបាននៅឡើយទេ សម្រាប់ពេលនេះ។
អ្វីដែលច្បាស់ បន្ទាប់ពីតានតឹងយ៉ាងខ្លាំង នៅចុងឆ្នាំ២០១៧ សំណុំរឿងកូរ៉េខាងជើង បានស្គាល់របត់ថ្មី គួរឱ្យភ្ញាក់ផ្អើល ! មេដឹកនាំអាមេរិកនិងកូរ៉េខាងជើង នឹងមានជំនួបដោយផ្ទាល់ ចំណែកកូរ៉េខាងត្បូង នឹងត្រូវដើរតួនាទីត្រឹមជាអន្តរការីសម្រាប់ភាគីទាំងពីរតែប៉ុណ្ណោះ។ នេះបើតាមការគូសបញ្ជាក់របស់អ្នកទទួលខុសត្រូវកូរ៉េខាងត្បូង។
សូមបញ្ជាក់ថា ប្រតិភូកូរ៉េខាងត្បូងទាំងពីររូបនេះ ទើបត្រលប់មកដល់មាតុប្រទេសវិញ នៅថ្ងៃអាទិត្យ បន្ទាប់ពីបានជួប និងបានផ្តល់សំណើរបស់គីមជុងអ៊ុន ចង់ជួបចរចារំសាយកម្មវិធីនុយក្លេអ៊ែរជាមួយលោកត្រាំ។ លោក ដូណាល់ ត្រាំ បានទទួលយល់ព្រមភ្លាម ហើយលោកជឿជាក់ថានឹងសម្រេចកិច្ចព្រមព្រៀងដ៏អស្ចារ្យជាប្រវត្តិសាស្ត្រ ប្រមុខដឹកនាំទាំងពីរពិតជាជួបពិភាក្សាគ្នាមែន។
ជំនួបទំនងជានឹងប្រព្រឹត្តទៅនៅខែឧសភា។ ភូមិជាប់ព្រំដែន អាចជាកន្លែងទទួលរៀបចំជំនួបលើកដំបូងរវាង លោកត្រាំ និងលោកគីម។ នេះបើតាមប្រភពវិមានប្រធានាធិបតីកូរ៉េខាងត្បូង ដែលបានបង្ហើបឈ្មោះកន្លែងបីទៀត ៖ ប្រទេសស្វីស ឬស៊ុយអែត ឬកោះJeju កូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ