បារាំងបញ្ជូននាវាចម្បាំងមួយគ្រឿងទៅហ្វីលីពីនដើម្បីពង្រឹងវត្តមាននៅតំបន់អាស៊ីប៉ាស៊ីហ្វិក
នៅថ្ងៃអាទិត្យ ទី១១ មីនា នាវាចម្បាំងបារាំងមួយគ្រឿងបានធ្វើដំណើរចូលចតនៅក្នុងទឹកដីហ្វីលីពីន បន្ទាប់ពីបានចូលរួមធ្វើសមយុទ្ធជាមួយទ័ពអាមេរិក ជប៉ុន និងចិន។ នាវាចម្បាំងនេះនឹងត្រូវបំពេញបេសកកម្មនៅក្នុងមហាសមុទ្រប៉ាស៊ីហ្វិករយៈពេល ៣ខែ។ តាមរយៈវត្តមាននាវាចម្បាំងរបស់ខ្លួននៅក្នុងតំបន់ បារាំងចង់បញ្ជាក់ពីការពង្រឹងជំហររបស់ខ្លួននៅក្នុងសមុទ្រចិនខាងត្បូងដែលត្រូវបានចិនទាមទារជាកម្មសិទ្ធិផ្តាច់មុខអស់ ៩០% ព្រមទាំងបានសាងសង់កោះសិប្បនិមិត្មជាច្រើននៅទីនោះ។
ចុះផ្សាយនៅថ្ងៃ៖
ស្តាប់ - ០១:៣៨
សម្រាប់ប្រទេសបារាំង វត្តមាននាវាចម្បាំងរបស់ខ្លួននៅក្នុងទឹកដីហ្វីលីពីនពេលនេះជាសក្ខីកម្មមួយដែលបញ្ជាក់ពីការរំកិលរកគ្នាកាន់តែជិតរវាងទីក្រុងប៉ារីស និងទីក្រុងម៉ានីល។ ការរំកិលជិតគ្នា បន្ទាប់ពីគណៈកម្មាធិការនៃកិច្ចសហប្រតិបត្តិការការពាររបស់ប្រទេសទាំងពីរទើបបានបិទបញ្ចប់កិច្ចប្រជុំរួមគ្នា។ សូមជម្រាបជូនថា បារាំងជាប្រទេសអឺរ៉ុបមួយគត់ដែលមានវត្តមានកម្លាំងយោធាជាអចិន្ត្រៃយ៍នៅក្នុងតំបន់អាស៊ីប៉ាស៊ីហ្វិក។ តាមលោកឯកអគ្គរដ្ឋទូតបារាំងប្រចាំប្រទេសហ្វីលីពីន Nicolas Galey បារាំងមានទ័ពរបស់ខ្លួននៅក្នុងតំបន់ជាអចិន្រ្តៃយ៍ចំនួន ៨ ០០០នាក់។
លោក Nicolas បានបញ្ជាក់បន្ថែមថា តួនាទីរបស់ទាហានបារាំងនៅក្នុងតំបន់ គឺការពារសន្តិសុខ និងសុវត្ថិភាពទឹកដីបារាំង ត្រួតពិនិត្យតំបន់សេដ្ឋកិច្ចផ្តាច់មុខរបស់បារាំង និងចូលរួមចំណែកលើកដំកើងសន្តិសុខពិភពលោក ព្រមទាំងឃ្លាំមើលឲ្យមានការគោរពសិទ្ធិសេរីភាពចរាចរណ៍ផ្លូវសមុទ្រ និងការការពារបរិស្ថានផងដែរ។ វត្តមានរបស់នាវាចម្បាំងបារាំងនៅកំពង់ផែហ្វីលីពីនពេលនេះបានធ្វើឡើង បន្ទាប់ពីមានវត្តមានជាហូរហែរបស់នាវាចម្បាំងអាមេរិក និងជប៉ុនដែលចង់បង្ហាញសាច់ដុំដាក់ចិន។
នៅក្នុងន័យនេះ មេបញ្ជាការកងទ័ពបារាំងលោក Denis Bertrand បានអះអាងថា វត្តមាន និងចរាចរណ៍របស់នាវាចម្បាំងបារាំងនៅក្នុងសមុទ្រចិនពេលនេះមិនមានគោលដៅបង្ករឿង ឬដំឡើងសាច់ដុំដាក់ប្រទេសណាមួយទេ តែចង់បញ្ជាក់ពីគោលការណ៍នៃសេរីភាពនៃសមុទ្រដែលជាគោលការណ៍សកល។ នៅខាងរដ្ឋាភិបាលបារាំងវិញ ទីក្រុងប៉ារីសបានព្យាយាមមិននិយាយចំឈ្មោះប្រទេសចិនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ