ប្រមុខការបរទេសកូរ៉េខាងជើងធ្វើដំណើរទៅប្រទេសស៊ុយអែត
រដ្ឋមន្រ្តីការបរទេសកូរ៉េខាងជើង លោករី យុងហូ Ri Yong Hoបានឆ្លងកាត់ក្រុងប៉េកាំង នៅថ្ងៃព្រហស្បតិ៍នេះ មុននឹងដំណើរបន្តទៅទីក្រុងស្តុកខូម ប្រទេសស៊ុយអែត។ ក្រសួងការបរទេសស៊ុយអែតវិញ បានបញ្ជាក់ថា នៅក្នុងទស្សនកិច្ចរយៈពេល២ថ្ងៃ នៅស៊ុយអែត ប្រមុខការបរទេសកូរ៉េខាងជើង នឹងជួបសមភាគីស៊ុយអែត ដើម្បីនិយាយពីតួនាទីរបស់ស៊ុយអែត ដែលមានទូត នៅក្រុងព្យុងយ៉ាង សម្រាប់តំណាងឲ្យអាមេរិក កាណាដា និងអូស្ត្រាលី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
តាមទីភ្នាក់ងារព័ត៌មានកូរ៉េខាងត្បូង យុនហាប់ នៅក្នុងដំណើរទស្សនកិច្ចទៅប្រទេសស៊ុយអែត ប្រមុខការបរទេសកូរ៉េខាងជើងមានអមដំណើរដោយអនុប្រធានការិយាល័យ ទទួលបន្ទុកអាមេរិកខាងជើង របស់ក្រសួងការបរទេសកូរ៉េខាងជើង។ តាមប្រភពពីប៉េកាំង ដែលដកស្រង់សំដីដោយទីភ្នាក់ងារយុនហាប់ នៅក្នុងទឹកដី ស៊ុយអែត ភាគីកូរ៉េខាងជើង អាចទាក់ទងគ្នាជាមួយ ភាគីអាមេរិក។
សូមអាន៖អាមេរិក-កូរ៉េខាងជើង៖ហេតុអ្វីបានជាលោកដូណាល់ ត្រាំ និងលោកគីម ជុងអ៊ុនយល់ព្រមជួបគ្នា?
ក្រសួងការបរទេសស៊ុយអែត វិញ នៅថ្ងៃព្រហស្បតិ៍នេះបានប្រកាសថា ប្រមុខការបរទេសទាំងពីរស៊ុយអែត និងកូរ៉េខាងជើង នឹងជជែកគ្នាពីស្ថានភាពវិវឌ្ឍន៍ថ្មី នៅឧបទ្វីបកូរ៉េ ពោលគឺនៅក្នុងបរិបទដែលអាចកើតមានជាលើកទី១ ជាប្រវត្តិសាស្រ្ត នៃជំនួបកំពូលអាមេរិក និងកូរ៉េខាងជើង។
ស៊ុយអែត មានស្ថានទូតនៅទីក្រុងព្យុងយ៉ាងសម្រាប់តំណាងឲ្យផលប្រយោជន៍របស់អាមេរិក កាណាដា និងអូស្ត្រាលី។ នៅឆ្នាំមុន លោកដូណាល់ ត្រាំបានថ្លែងអំណរគុណដល់រដ្ឋាភិបាលស៊ុយអែត ដែលបានជួយចរចា ជំរុញឲ្យមានការដោះលែង និងបញ្ជូននិស្សិតអាមេរិកាំង Otto Warmbier ដែលកូរ៉េខាងជើងបានចាប់ខ្លួន ក្នុងបទចោទប្រកាន់លួចពាក្យស្លោកឃោសនារបស់បក្សកុម្មុយនិស្តកូរ៉េខាងជើង។
ដំណើរទស្សនកិច្ចរបស់រដ្ឋមន្រ្តីការបរទេសកូរ៉េខាងជើង ទៅប្រទេសស៊ុយអែត បានស្តែងកាន់តែច្បាស់ពីលទ្ធភាពរៀបចំជំនួបកំពូលជាប្រវត្តិសាស្រ្ត រវាងមេដឹកនាំអាមេរិក ហើយនិងកូរ៉េខាងជើង។ នៅសប្តាហ៍មុន លោកប្រធានាធិបតីអាមេរិក ដូណាល់ ត្រាំ បានប្រកាសទទួលយល់ព្រមបើកជំនួបកំពូលជាមួយមេដឹកនាំកូរ៉េខាងជើង លោកគីម ជុងអ៊ុន នៅចុងខែឧសភា ដើម្បី និយាយពីអនាគតកម្មវិធីនុយក្លេអ៊ែរ និងមីស៊ីលរបស់កូរ៉េខាងជើង។ ប៉ុន្តែ មេដឹកនាំកូរ៉េខាងជើងវិញ នៅមិនទាន់បានឆ្លើយតបវិញ យ៉ាងណានោះទេ។ គេរំពឹងថា ប្រមុខការបរទេសកូរ៉េខាងជើង ទៅស៊ុយអែត លើកនេះ នៅក្នុងក្របខ័ណ្ឌនៃដំណើររៀបចំជំនួបកំពូលអាមេរិក និងកូរ៉េខាងជើង និងនៅទីបំផុត អាចបញ្ជាក់ពីទីកន្លែង និងពេលវេលា នៃជំនួបលោកដូណាល់ត្រាំ និងលោកគីម ជុងអ៊ុន ដែលរហូតមកដល់ពេលនេះ នៅតែអាថ៌កំបាំងនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ