អាស៊ាន និងអូស្រ្តាលីនិយាយពីវិបត្តិរ៉ូហ៊ីងយ៉ា កម្មវីធីគ្រាប់មីស៊ីលកូរ៉េខាងជើង និងភាពគ្មានកងទ័ពនៅសមុទ្រចិនខាងត្បូង
នៅថ្ងៃអាទិត្យ ទី១៨ មីនានេះ ជំនួបកំពូលអាស៊ាន និងអូស្រ្តាលីក្នុងប្រទេសអូស្រ្តាលីបាននិយាយពីវិបត្តិរ៉ូហ៊ីងយ៉ានៅក្នុងប្រទេសភូមា សម្តែងក្តីបារម្ភជុំវិញភាពតានតឹងបង្កឡើងដោយកម្មវីធីគ្រាប់មីស៊ីលបាលីស្ទិករបស់កូរ៉េខាងជើង និងពីភាពចាំបាច់គ្មានកងទ័ពនៅក្នុងសមុទ្រចិនខាងត្បូង។ ទាក់ទងនឹងវិបត្តិរ៉ូហ៊ីងយ៉ាត្រូវបានអាស៊ានបានគូសបញ្ជាក់ថា មិនអាចចូលខ្លួនអន្តរាគមន៍បានទេដោយលើកឡើងពីគោលការណ៍មិនលូកដៃចូលជ្រៀតជ្រែកកិច្ចការផ្ទៃក្នុងរបស់ប្រទេសសមាជិក។
ចុះផ្សាយនៅថ្ងៃ៖
ស្តាប់ - ០២:០៩
លោកនាយករដ្ឋមន្រ្តីអូស្រ្តាលី Malcolm Turnbull បានថ្លែងឲ្យដឹងថា ជំនួបកំពូលអាស៊ាន និងអូស្រ្តាលីនាថ្ងៃអាទិត្យ ទី១៨ មីនានេះបានចាប់អារម្មណ៍យ៉ាងខ្លាំងលើស្ថានការណ៍នៅក្នុងរដ្ឋរ៉ាក់ឃីន ហើយគឺលោកស្រីរដ្ឋមន្រ្តីការបរទេសភូមាអ៊ុង សានស៊ូជីជាអ្នកដែលបានលើកឡើងនូវបញ្ហាមួយនេះយ៉ាងពេញលេញ។ ប្រមុខរដ្ឋាភិបាលអូស្រ្តាលីបានឲ្យដឹងបន្ថែមទៀតថា ប្រធានបទក្តៅមួយនេះត្រូវបានភាគីក្នុងជំនួបកំពូលលើកយកទៅជជែកប្រកបដោយលក្ខណៈស្ថាបនា និងគ្មានភាពតានតឹងអ្វីទេ។
ចំណែកលោកនាយករដ្ឋមន្រ្តីសិង្ហបុរី Lee Hsien Loong ដែលធ្វើជាប្រធានផ្លាស់វេនអាស៊ានឆ្នាំនេះបានបញ្ជាក់ថា ប្រទេសជិតខាងភូមាពិតជាកំពុងព្រួយបារម្ភលើស្ថានការណ៍ក្នុងរដ្ឋរ៉ាក់ឃីន តែថា អាស៊ានមិនអាចចូលខ្លួនអន្តរាគមន៍បានទេ។ មិនអាចចូលអន្តរាគមន៍បានដោយលោក Lee Hsien Loong បានលើកឡើងពីគោលការណ៍មិនចូលជ្រៀតជ្រែកកិច្ចការផ្ទៃក្នុងរបស់ប្រទេសសមាជិកអាស៊ាន។ គួររម្លឹកជូនថា តាំងពីទ័ពភូមាបានបើកប្រតិបត្តិការប្រឆាំងពួកឧទ្ទាមអ៊ីស្លាមក្នុងរដ្ឋរ៉ាក់ឃីននាខែសីហា ឆ្នាំ ២០១៧ មក មានពលរដ្ឋរ៉ូហ៊ីងយ៉ាជិត ៧០០ ០០០នាក់បានភៀសខ្លួនទៅជ្រកកោណក្នុងប្រទេសបង់ក្លាដែសក្បែរខាង។
រូបលោកស្រីអ៊ុង សានស៊ូជីបានទទួលការរិះគន់របស់អន្តរជាតិពីបទបិទមាត់ មិនដោះស្រាយបញ្ហា ហើយរដ្ឋាភិបាលភូមាក៏ត្រូវបានអង្គការសហប្រជាជាតិចោទប្រកាន់ពីបទបោសសំអាតជនជាតិភាគតិចលើទឹកដីរបស់ខ្លួន។ ធ្ងន់ធ្ងរជាងនេះ អង្គការសហប្រជាជាតិថែមទាំងចាត់ទុកទង្វើរបស់ទ័ពភូមាជាឧក្រិដ្ឋកម្មប្រល័យពូជសាសន៍។ ក្រៅពីជជែករឿងវិបត្តិរ៉ូហ៊ីងយ៉ា ជំនួបកំពូលអាស៊ាន អូស្រ្តាលីក៏បានសម្តែងក្តីបារម្ភពីកំណើនភាពតានតឹងបង្កឡើងដោយកម្មវិធីគ្រាប់មីស៊ីលបាលីស្ទិករបស់កូរ៉េខាងជើង និងភាពចាំបាច់ពីការគ្មានកងទ័ពនៅក្នុងសមុទ្រចិនខាងត្បូងដែលប្រទេសអាស៊ានមួយចំនួនកំពុងមានជម្លោះជាមួយចិន។
នៅត្រង់ចំណុចនេះ អាស៊ាន និងអូស្រ្តាលីមិនបាននិយាយចំៗពីប្រទេសចិនទេ តែបានលើកឡើងពីការប្តេជ្ញាចិត្តធ្វើការរួមគ្នាដើម្បីប្រយុទ្ធប្រឆាំងនឹងការគំរាមកំហែងជ្រុលនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ