រដ្ឋាភិបាលចិនថ្មី ផ្តល់អាទិភាពដល់មន្ត្រីជំនាញសេដ្ឋកិច្ច
ចុះផ្សាយនៅថ្ងៃ៖
ស្តាប់ - ០៦:៤៦
នៅថ្ងៃចន្ទនេះ ចិនបានប្រកាសបង្ហាញសមាសភាពរដ្ឋាភិបាលថ្មី តាមទម្លាប់ដែលរបបកុម្មុយនិស្តចិនតែងតែធ្វើជារៀងរាល់៥ឆ្នាំម្តង។ នៅលើកនេះ រដ្ឋាភិបាលអាណត្តិទីពីររបស់លោក ស៊ីជីនពីង ជ្រើសរើសផ្លូវដឹកនាំបន្តពីរដ្ឋាភិបាលអាណត្តិមុន ដោយមានរក្សាជាអាទិ៍រដ្ឋមន្ត្រីការបរទេសនៅដដែល។ ប៉ុន្តែក្រុមខណៈដែលចិនកំពុងប្រឈមនឹងវិបត្តិបំណុលដ៏ធ្ងន់ធ្ងរ ការរៀបចំរដ្ឋាភិបាលថ្មីផ្តោតខ្លាំងទៅលើតែក្រុមការងារជំនាញផ្នែកសេដ្ឋកិច្ច ដោយមានការប្តូរផ្លាស់គួរឱ្យកត់សម្គាល់ ៖ ទីប្រឹក្សាសេដ្ឋកិច្ច ដែលជាជំនិតលោកប្រធានាធិបតី ត្រូវបានតែងតាំង ឱ្យក្លាយជាឧបនាយករដ្ឋមន្ត្រី និងការតែងតាំងប្រធានធនាគារកណ្តាលចិនថ្មី។
លោក វ៉ាង យី Wang Yi ដែលពិភពលោកធ្លាប់ស្គាល់មុខយ៉ាងច្បាស់ ក្នុងដឹកនាំនយោបាយការទូតក្នុងសំណុំរឿងក្តៅៗ ដូចជា កូរ៉េខាងជើង ទំនាក់ទំនងចិន-អាមេរិក ... ត្រូវបានបន្ថែមតំណែងឱ្យក្រោយទីប្រឹក្សាការទូតរដ្ឋទៀត ! ជាតំណែងនយោបាយការបរទេសដ៏ខ្ពស់ខ្ពស់បំផុត។
រដ្ឋមន្ត្រីក្រសួងការពារជាតិ ត្រូវប្រគល់ទៅឱ្យឧត្តមសេនីយ៍ វៃ ហ្វេងហេ Wei Fenghe ដ៏មានបទពិសោធន៍បំផុតអាយុ៦៤ឆ្នាំ (ចូលបំរើយោធាជើងគោកតាំងពីអាយុ១៦ឆ្នាំ) ជំនួសរដ្ឋមន្ត្រីចាស់ចូលនិវត្តន៍។ រដ្ឋមន្ត្រីក្រសួងពាណិជ្ជកម្ម ត្រូវរក្សាទុកនៅដដែល។
ទីប្រឹក្សាសេដ្ឋកិច្ចឡើងជាឧបនាយករដ្ឋមន្ត្រី
ប៉ុន្តែការប្តូរផ្លាស់សមាសភាពរដ្ឋាភិបាលលើកនេះ មានបង្កប់ទៅដោយអាទិភាព ដ៏គួរឱ្យកត់សម្គាល់ជាងគេមួយ គឺការដោះដូរមន្ត្រីជំនាញសេដ្ឋកិច្ច។ នៅក្នុងចំណោមឧបនាយករដ្ឋមន្ត្រីថ្មីទាំងបួន បីរូបមានបន្ទុកផ្នែកនយោបាយសេដ្ឋកិច្ច។ មនុស្សជំនិតរបស់លោកស៊ីជីនពីង ដែលជាទីប្រឹក្សាសេដ្ឋកិច្ចរបស់ប្រធានាធិបតី និងដែលគេចាត់ទុកថាសេ្តចសេដ្ឋកិច្ចចិន លោក លីវ ហេ Liu He ត្រូវបានតែងតាំងជាឧបនាយករដ្ឋមន្ត្រី និងលោក Yi Gang ត្រូវបានតែងតាំងជាងប្រធានធនាគារកណ្តាលចិន។
ក្នុងវ័យ ៦៦ឆ្នាំ លោក លីវ ហេ Liu He ជាទីប្រឹក្សាសេដ្ឋកិច្ចរដ្ឋដ៏មានឥទ្ធិពល ! ការតែងតាំងរូបលោក ជាឧបនាយករដ្ឋមន្ត្រី មិនមែនជាការភ្ញាក់ផ្អើលទេ ! លោកមិនសូវចេញមុខមាត់ឡើយ តែជាមេគំនិតខាងធ្វើកំណែទម្រង់សេដ្ឋកិច្ចចិន ឱ្យមានលំនឹង ដោយបានតម្រង់ទិសសេដ្ឋកិច្ចមកពឹងលើតម្រូវការចាយវាយក្នុងស្រុក លើផ្នែកសេវាកម្ម ទំនើបកម្ម និងទប់កំណើនបំណុលជាតិ។
លោក លីវ ហេ មានសញ្ញាប័ត្រសេដ្ឋកិច្ចចេញពីសាកលវិទ្យាល័យអាមេរិកហាវ៉ាដ ដ៏ល្បីល្បាញ និងទើបបង្ហាញមុខខ្លាំង នារយៈពេលប៉ុន្មានខែនេះ ដើម្បីដោះស្រាយវិវាទពាណិជ្ជកម្មជាមួយអាមេរិក។
ចំណែកលោក យី កាង Yi Gang អាយុ៦០ឆ្នាំ ដែលនិយាយភាសាអង់គ្លេសយ៉ាងរអិលមាត់ ក៏ធ្លាប់បានរស់នៅអាមេរិកប្រមាណ១៥ឆ្នាំ រៀនសេដ្ឋកិច្ចនៅមហាវិទ្យាល័យអាមេរិក ពីឆ្នាំ១៩៨០-១៩៨៦ រហូតក្លាយជាបណ្ឌិតសេដ្ឋកិច្ច និងធ្វើជាសាស្ត្រាចារ្យនៅសាកលវិទ្យាល័យ Indiana ដល់ឆ្នាំ១៩៩៤ មុននឹងត្រលប់មកទទួលតួនាទីដ៏សំខាន់មួយនៅក្នុងធនាគារកណ្តាលចិន នៅឆ្នាំ១៩៩៧ និងក្លាយជាអភិបាលរងរបស់ធនាគារកណ្តាលនៅឆ្នាំ២០០៨។ មានន័យថាលោក ស្គាល់ស្ថាប័ននេះ ជិតពីរទសវត្សរ៍។
លោក យី ហ្កាង ត្រូវបានតែងតាំងជាប្រធានធនាគារកណ្តាលចិន ដើម្បីជំនួស លោក ជូ សៀវជួន Shou Xiaochuan អាយុ៧០ឆ្នាំ ដែលច្បាប់តម្រូវឱ្យចូលនិវត្តន៍។ លោក ជូ ជាអ្នកកំណែទម្រង់និយមខ្លាំងណាស់ ! ធ្លាប់បានរួមចំណែកធ្វើកំណែទម្រង់ជាមួយយ៉ាងសកម្មបំផុត លោក យី ហ្កាង ត្រូវអ្នកបន្តមរតកនៃកំណែទម្រង់នេះ។
កំណែទម្រង់និងតុល្យភាពនិយម
លោក យី ហ្កាង បានគូសបញ្ជាក់ យ៉ាងច្បាស់ នៅចំពោះមុខអ្នកកាសែត កាលពីពេលព្រឹកមិញថា បេសកកម្មរបស់លោកគឺបន្តនយោបាយរូបិយបណ្ណ គាំទ្របន្តកំណែទម្រង់ និងបើកចំហវិស័យហិរញ្ញវត្ថុ ដោយប្រុងប្រយ័ត្នដើម្បីរក្សាស្ថិរភាព។ កំណែទម្រង់ថ្មី និងការបើកចំហនឹងត្រូវចាត់ចេញជាវិធានការនៅឆាប់ៗពេលខាងមុខនេះ។
បើតាមទស្សនាវដ្តីសេដ្ឋកិច្ចចិន លោក យី ហ្កាង បានអំពាវនាវឱ្យមានការ បន្ទន់នយោបាយរូបិយបណ្ណប្រាក់យ័ន ដែលរដ្ឋចិនឃុំគ្រងខ្លាំងណាស់ ដើម្បីពង្រឹងឥទ្ធិពលលើទីផ្សារ លើអត្រាប្តូរប្រាក់។
ចំណុចមួយទៀតដែលជាទិសដៅកំណែទម្រង់សំខាន់ដែរ គឺការផ្តល់ឱកាសដល់វិនិយោគបរទេសក្នុងទីផ្សារហិរញ្ញវត្ថុចិន ដោយសន្យាថានឹងបានទទួលការស្វាគមន៍ស្មើភាពគ្នា។ នេះបើអ្វីដែលលោកធ្លាប់បានចេញ មុខការពារកាលពីដើមខែមីនា។
ធនាគារកណ្តាលចិន ដែលកំពុងចាប់ផ្តើមមានអំណាចនិងបន្ទុកកាន់តែសំខាន់ឡើងៗ មានអំណាចគ្រប់គ្រងវិស័យទីផ្សារហិរញ្ញវត្ថុ កាន់តែខ្លាំង ទំនងជានឹងត្រូវធ្វើកំណែទម្រង់ផ្នែកកម្ចីធនាគារ ដើម្បីវាយលុកលើអ្វីដែលគេហៅថា ហិរញ្ញវត្ថុស្រមោល គ្មានចំណាត់ការ អ្នកកម្ចីគួរឱ្យសង្ស័យ និងក្នុងទីផ្សារដែលឥណទានខ្នាតតូចកំពុងលូតលាស់ខ្លាំង។ ប៉ុន្តែ រាល់គំនិតកំណែទម្រង់នេះ ត្រូវធ្វើយ៉ាងណាកុំឱ្យប៉ះពាល់ដល់ទីផ្សារការងារ និងកុំឱ្យប៉ះពាល់ដល់សកម្មភាពកំណើនសេដ្ឋកិច្ចដែលផុយស្រួយ។
មានន័យថាលោក យី កាង កំពុងទទួលបន្ទុកកិច្ចការដ៏លំបាក រវាងការបន្តកំណែទម្រង់ផងនិងរក្សាលំនឹងសេដ្ឋកិច្ច។ ហើយម្យ៉ាងទៀត ការតែងតាំងលោកជាអភិបាលធនាគារ ប្រព្រឹត្តទៅ ក្នុងខណៈដែលធនាគារកណ្តាល ត្រូវតាក់តែងច្បាប់ តែបំណុលសាធារណៈនិងឯកជនបានឡើងដល់កំរិតខ្ពស់ ជាង២៥០% នៃផលិតផលសរុបក្នុងស្រុក PIB ដែលចិនអាចខ្លាចបំផុតព្រោះវាអាចបង្កអស្ថិរភាពហិរញ្ញវត្ថុ។
ស្ថិរភាពហិរញ្ញវត្ថុជាអាទិភាពរបស់ប៉េកាំង ដែលប្រមុខដឹកនាំថ្មីពីររូបនេះត្រូវសម្រេច។ ប៉ុន្តែបើតាមអ្នកវិភាគ លោក យី កាង ទំនងជាមានលទ្ធភាពតិចតួចណាស់ ព្រោះ មិនដូចធនាគារកណ្តាលអឺរ៉ុប ឬអាមេរិកទេ ធនាគារកណ្តាលចិនមិនឯករាជ្យឡើយ ហើយត្រូវស្ថិតនៅក្រោមគំនាបនយោបាយរបស់រដ្ឋាភិបាល ជាមួយតួនាទីត្រឹមតែផ្តល់ប្រឹក្សានិងជានិយ័តករប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ