ប្រធានាធិបតីភូមាលាលែងតំណែង
ប្រធានាធិបតីភូមា លោក Htin Kyaw បានលាលែងតំណែងនៅថ្ងៃពុធនេះ ដោយមិនបានប្រាប់ពីមូលហេតុពិតប្រាកដទេ។ ការលាតំណែងរបស់លោកធ្វើឡើងចំពេលអង្គការសហប្រជាជាតិចោទភូមា ថាធ្វើការបោសសម្អាតជនជាតិភាគតិចរ៉ូហ៊ីងយ៉ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
ថ្ងៃពុធ២១មីនានេះ លោក Htin Kyaw បានសូមលាតំណែងប្រធានាធិបតីភូមា។ លោកកាន់អំណាចមកជិត២ឆ្នាំហើយ គឺតាំងពីខែមេសា ឆ្នាំ២០១៦មក។ គេមិនដឺងមូលហេតុនៃការលាតំណែងនេះទេ តែដោយសារប៉ុន្មានខែចុងក្រោយនេះ គេឃើញលោកចុះស្គម ធ្វើអោយគេគិតថា អាចមកពីលោកមានបញ្ហាសុខភាព។ ជិត២ឆ្នាំមកនេះ លោក Htin Kyaw គ្រប់គ្រងភូមាក៏ពិតមែន ប៉ុន្តែ លោកមិនសូវជាបាននិយាយអ្វីច្រើនទេ។ គួររំលឹកថា លោក Htin Kyaw ជាមិត្តភក្តិពីកុមារភាពរបស់លោកស្រីអ៊ុងសាន ស៊ូជី។ គិតប៉ុន្មានទសវត្សមកនេះ លោកជាជនស៊ីវិលទី១ដែលឡើងកាន់តំណែងប្រធានាធិបតីភូមា។
ពេលនេះ លោកស្រីអ៊ុងសាន ស៊ូជី មានពេល៧ថ្ងៃ ដើម្បីរកប្រធានាធិបតីថ្មី។ ក្រុមជំនាញគិតថា បើលោកស្រីស៊ូជី ដាក់ អ្នកជំនិតនឹងលោកស្រីអោយកាន់តំណែងប្រធានាធិបតី នោះអ្វីៗនឹងដំណើរការទៅធម្មតា។ តំណែងប្រធានាធិបតីភូមា ជាតំណែងកិត្តិយស ព្រោះតំណែងសំខាន់គឺតំណែងជាទីប្រឹក្សារដ្ឋដែលភូមាបានបង្កើតសម្រាប់លោកស្រីស៊ូជីឯណោះទេ។ លោកស្រីស៊ូជី គ្មានសិទ្ធិធ្វើជាប្រធានាធិបតីភូមា ដោយសារតែលោកស្រីមានកូនជាជនជាតិអង់គ្លេស ដែលនេះជាការហាមប្រាមរបស់រដ្ឋធម្មនុញ្ញភូមា។
ការលាតំណែងរបស់លោកHtin Kyaw ធ្វើឡើងចំពេលភូមាកំពុងរងការចោទប្រកាន់ថា ធ្វើការបោសសម្អាតប្រជាជនរ៉ូហ៊ីងយ៉ា ដែលជាអ្នកកាន់សាសនាអ៊ីស្លាម។ យុទ្ធនាការយោធាធ្វើអោយប្រជាជនរ៉ូហ៊ីងយ៉ាជិត៧សែននាក់នៅភាគខាងលិចប្រទេស ភៀសខ្លួនទៅបង់ក្លាដែស។ លោកស្រីស៊ូជីត្រូវគេចោទថា ធ្វើមិនដឹងមិនលឺពីហិង្សាកងទ័ព និងគ្មានការអាណិតអាសូរចំពោះជនជាតិរ៉ូហ៊ីងយ៉ា។ រដ្ឋអំណាចលោកស្រីស៊ូជី កំពុងយឺតយ៉ាវក្នុងការកសាងប្រទេស ដោយសារបញ្ហារ៉ូហ៊ីងយ៉ា បូករួមកំណែទម្រង់សេដ្ឋកិច្ចសង្គម និងការរិះគន់ពីអន្តរជាតិ។ នេះនៅមិននិយាយពីនយោបាយក្នុងស្រុកដែលមានការរិះគន់ថា លោកស្រីអ៊ុងសានស៊ូជី ក្តោបក្តាប់អំណាចក្នុងដៃហួសហេតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ