ការបញ្ចេញឧស្ម័នកាបូនិកកើនឡើងជាថ្មីនៅឆ្នាំ២០១៧
បរិមាណនៃការបញ្ចេញឧស្ម័នកាបូនិក CO2 ដើម្បីថាមពល នៅលើពិភពលោក បានកើនឡើងជាថ្មី នៅឆ្នាំ ២០១៧ បន្ទាប់ពីនៅថេរអស់រយៈពេលបីឆ្នាំជាប់គ្នា។ មូលហេតុនៃកំណើននេះ គឺបណ្តាលមកពីតម្រូវការផ្នែកថាមពល បានកើនឡើង។ នេះបើតាមការគូសបញ្ជាក់របស់ភ្នាក់ងារថាមពលអន្តរជាតិ ហៅកាត់ថា AIE នៅថ្ងៃព្រហស្បតិ៍ទី ២២មីនា ២០១៨។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
ការបញ្ចេញឧស្ម័នពុលកាបូនិក ក្នុងវិស័យអគ្គិសនី ដោយមធ្យោបាយដឹកជញ្ជូន ឬដោយវិស័យសំណង់ បានកើនឡើង ១,៤% នៅឆ្នាំ២០១៧កន្លងទៅ ! នេះបើទិន្នន័យផ្តល់ដោយភ្នាក់ងារថាមពលអន្តរជាតិ ដែលមានទីស្នាក់ការនៅទីក្រុងប៉ារីស។
កំណើននេះជាលទ្ធផលនៃកំណើនសេដ្ឋកិច្ចដ៏ខ្លាំងក្លារបស់ពិភពលោក (៣,៧%)ផង ដោយសារតែតម្លៃគ្រឿងចំហេះធ្យូងថ្មធ្លាក់ចុះផង និងដោយពិភពលោកភ្លេចខ្លួនលែងសូវកំរិតប្រសិទ្ធិភាពផ្នែកថាមពលផង។ មានន័យថាក្នុងមួយឆ្នាំ២០១៧កន្លងទៅនេះ កត្តាដដែលខាងលើ បានជំរុញឱ្យពិភពលោកដំឡើងតម្រូវការផ្នែកថាមពល ដល់ទៅ២,១%។
បើតាមរបាយការណ៍របស់ភ្នាក់ងារថាមពលអន្តរជាតិចេញផ្សាយនៅព្រហស្បតិ៍ទី ២២មីនា ២០១៨នេះ ដដែល កំណើននៃការបញ្ចេញឧស្ម័នកាបូនិកពាក់ព័ន្ធនឹងថាមពលនៅឆ្នាំ២០១៧ បានបង្ហាញឱ្យឃើញថា កិច្ចខិតខំប្រឹងប្រែងរបស់ពិភពលោកនាពេលបច្ចុប្បន្ន ដើម្បីប្រយុទ្ធប្រឆាំងនឹងការប្រែប្រួលអាកាសធាតុមិនគ្រប់គ្រាន់ទាល់តែសោះ !
បន្ទាប់ពីមានលំនឹងជាប់គ្នាអស់រយៈពេលបីឆ្នាំជាប់គ្នា ហើយមួយឆ្នាំក្រោយមក កំរិតនៃការបញ្ចេញឧស្ម័នពុលស្រាប់តែស្ទុះឡើងវិញ ដូច្នេះ គឺបញ្ច្រាសទាំងស្រុងនឹង កម្មវត្ថុនៃកិច្ចព្រមព្រៀងអាកាសធាតុក្រុងប៉ារីស ឆ្នាំ ២០១៥ ដែលតម្រូវឱ្យពិភពលោកបញ្ចេញសកម្មភាពកាត់បន្ថយ ជាចាំបាច់ការបញ្ចេញឧស្ម័នពុល បើចង់កំរិតការឡើងកំដៅនៃភពផែនដីក្រោមពីរអង្សារ ឬត្រឹម១,៥អង្សារ។
ការបញ្ចេញឧស្ម័នCO2 ឆ្នាំ២០១៧ មានការកើនឡើងនៅក្នុងប្រទេសធំៗមានសេដ្ឋកិច្ចខ្លាំងមួយភាគធំ តែបានថយចុះ នៅអង់គ្លេស ម៉ិចស៊ិក ជប៉ុន និងសហរដ្ឋអាមេរិក។ ជាការថយចុះក្នុងកំរិត (-០,៥%) ពីរបីឆ្នាំជាប់គ្នា និងដោយសារតែបានជំនួយពីថាមពលមិនចេះរីងស្ងួត។
អាស៊ីជាអ្នកទទួលខុសត្រូវ តំណាងឱ្យ១ភាគបីនៃកំណើនឧស្ម័នកាបូនិកខ្លាំងជាងគេ នៅឆ្នាំ២០១៧។ នេះបើតាមភ្នាក់ងារដដែល ដែលបានបញ្ជាក់ថា ចិនមហាអំណាចសេដ្ឋកិច្ចពិភពលោក និងដែលមានកំណើនសេដ្ឋកិច្ចដល់ទៅ៧% បានបញ្ចេញឧស្ម័នCO2 តែ១,៧%ទេ ព្រោះចិនងាកមកប្រើថាមពលស្អាត ហើយកំពុងពន្លឿនការផ្ទេរពីប្រើថាមពលធ្យូងថ្មទៅប្រើឧស្ម័នវិញ។
ផ្ទុយទៅវិញអឺរ៉ុប ដែលធ្លាប់ជាសិស្សល្អ នារយៈពេលប៉ុន្មានឆ្នាំចុងក្រោយនេះ បែរបង្កើនការបញ្ចេញCO2ដល់ទី១,៥%ទៅវិញ។ មូលហេតុធំ គឺការវិលមកប្រើថាមពលប្រេងនិងឧស្ម័ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ