មនុស្សជំនិតម្នាក់របស់លោកស្រី អ៊ុង សានស៊ូជីបានក្លាយជាប្រធានាធិបតីថ្មីភូមា
នៅភូមាលោក វីន ម្យីន ( win Myint ) អាយុ៦៦ឆ្នាំដែលជាមនុស្សជំនិតរបស់លោកស្រី អ៊ុងសាន់ស៊ូ ទើបត្រូវបានសភាភូមា បោះឆ្នោតតែងតាំងជាប្រធានាធិបតីភូមានៅថ្ងៃពុធទី២៨មីនា។ ប្រធានាធិបតីភូមាមុន គឺលោក Htin Kyaw បានសុំលាលែងចេញពីមុខដំណែងកាលពីសប្តាហ៍មុនដោយមូលហេតុសុខភាព។
ចុះផ្សាយនៅថ្ងៃ៖ កែប្រែថ្ងៃទី៖
ប្រធានាធិបតីភូមាថ្មី មានឈ្មោះ ថា វីន ម្យីន (Win Myint) អាយុ៦៦ឆ្នាំ ត្រូវ បានសភាបោះឆ្នោតជ្រើសតាំងនៅថ្ងៃពុធទី២៨មីនា បន្ទាប់ពីប្រធានាធិបតីភូមាមុនបានសុំលាលែងចេញពីមុខតំណែងខ្លួន កាលពីថ្ងៃពុធសប្តាហ៍មុន ដោយមូលហេតុសុខភាព។ គួររំលឹកថានៅក្នុងសភាភូមា ក្រុមអ្នកតំណាងរាស្ត្រគណបក្សលោកស្រី ស៊ូជី គឺបក្សសម្ព័ន្ធជាតិដើម្បីប្រជាធិបតេយ្យ NLD មានចំនួនដ៏ច្រើនលើសលុបនឹងចាប់បើកសម័យប្រជុំជាវិសាមញ្ញមួយ នៅសប្តាហ៍ក្រោយ ដើម្បីបោះឆ្នោតជាចុងក្រោយ។
លោក វីន ម្យីន ដែលមានមុខវិជ្ជាជីវៈជាមេធាវី បានចាប់ផ្តើមមុខអាជីពជាសកម្មជនមួយរូបនៅក្នុងចលនាដើម្បីប្រជាធិបតេយ្យភូមារបស់លោកស្រី អ៊ុង សាន់ស៊ូជីនៅឆ្នាំ ១៩៨៨ តែចលនានេះ ត្រូវបានទទួលរងនូវការគៀបសង្កត់យ៉ាងខ្លាំងក្លាពីសំណាក់របបសឹកភូមា។
បន្ទាប់មកទៀត លោកបានជាប់ឆ្នោតជាតំណារាស្រ្តចំនួន៣លើកក្រោមស្លាកគណបក្សរបស់លោកស្រី អ៊ុង សាន់ស៊ូជី គឹសម្ព័ន្ធជាតិដើម្បីប្រជាធិបេតយ្យ(LND) នៅលើកទី១ គឺក្នុងឆ្នាំ ១៩៩០នៅពេលគណបក្សលោកស្រីស៊ូជី បានឈ្នះឆ្នោត តែត្រូវរបបសឹកទាត់ចោលមិនទទួលស្គាល់លទ្ធផល។ បន្ទាប់មកនៅឆ្នាំ ២០១២ ខណៈដែលរបបសឹកសុខចិត្តរំលាយខ្លួនឯងដោយប្រគល់អោយរបបស៊ីវីលធ្វើការដឹកនាំវិញ និងលើកទី៣ គឺនៅពេលដែលគណបក្សលោកស្រីស៊ូជី បានទទួលជ័យជំនះយ៉ាងធំធេងនៅក្នុងការបោះឆ្នោតនាឆ្នាំ២០១៥។
ជាមនុស្សស្មោះស្ម័គ្ររបស់លោកស្រីស៊ូជី លោកវីម្យីន ធ្លាប់កាន់មុខតំណែងប្រធានរដ្ឋសភាភូមាដោយប្រកាន់វិន័យយ៉ាងតឹងរ៉ឹងជាទីបំផុតទាំងជាមួយបក្សបស់ខ្លួនក៏ដូចជា ជាមួយពួកយោធាភូមា។ គាត់ជាមនុស្សសុច្ចរិត មួយរូប នឹងមានភាពតស៊ូជានិច្ចនៅក្នុងភារៈកិច្ចរបស់ខ្លួននិងជួនកាលក៏មានភាពតឹងតែងដែរ-នេះបើយោងតាមមេធាវីមួយរូបនៃតុលាការកំពូលភូមាដែលធ្វើការរួមជាមួយគាត់។
យោងតាមយោបល់របស់ទិន្នានុប្បវត្តិភូមាឈ្មោះ The Orrawaddy អ្នកខ្លះៗ រំពឹង ទុក ថាលោកវីន ម្យីននឹងបំពេញមុខងាររបស់លោក ចាប់ផ្តើមនៅសភា ស្តីពីអំពើបញ្ហាពុករលួយ បញ្ហានីតិរដ្ឋ និងបញ្ហាជម្លោះដីធ្លី ហើយ លោកក៏ នឹងជាប្រធានាធិបតីភូមាមួយរូបដែលមានសកម្មភាពខ្លាំងក្លាជាងរួបលោកប្រធានាធិបតីភូមាមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ