ឧបទ្វីបកូរ៉េ៖ជំនួបកំពូលរវាងមេដឹកនាំកូរ៉េទាំងពីរនឹងបើកធ្វើនៅថ្ងៃទី២៧ មេសា ឆ្នាំ ២០១៨
នៅថ្ងៃព្រហស្បតិ៍ ទី២៩ មីនានេះ កូរ៉េទាំងពីរបានព្រមព្រៀងគ្នាយកថ្ងៃទី២៧ មេសាដើម្បីរៀបចំជំនួបកំពូលរវាងមេដឹកនាំកូរ៉េខាងជើងលោកគីម ជុងអ៊ុន និងប្រធានាធិបតីកូរ៉េខាងត្បូងលោកមូន ចៃអ៊ីន។ ចំណែកទីកន្លែងរៀបចំជំនួបកំពូលនឹងត្រូវធ្វើឡើងនៅក្នុងផ្ទះសន្តិភាពកូរ៉េខាងត្បូងស្ថិតក្នុងស្រុក Panmunjom។ បន្ទាប់ពីមានជំនួបជាមួយប្រធានាធិបតីកូរ៉េខាងត្បូងនៅថ្ងៃទី២៧ មេសា លោកគីម ជុងអ៊ុនក៏នឹងត្រូវមានជំនួបកំពូលជាមួយលោកប្រធានាធិបតីអាមេរិកដូណាល់ ត្រាំនៅចុងខែឧសភា។
ចុះផ្សាយនៅថ្ងៃ៖
ស្តាប់ - ០២:១៩
កិច្ចព្រមព្រៀងស្តីពីកាលបរិច្ឆេទ និងទីកន្លែងនៃជំនួបកំពូលរវាងមេដឹកនាំកូរ៉េទាំងពីរលោកគីម ជុងអ៊ុន និងលោកមូន ចៃអ៊ីនបានធ្វើឡើងនៅក្នុងសេចក្តីប្រកាសព័ត៌មានរួមគ្នាមួយចេញផ្សាយនៅថ្ងៃព្រហស្បតិ៍ ទី២៩ មីនា។ កិច្ចព្រមព្រៀងនេះជាលទ្ធផលបានមកពីការជួបចរចាគ្នារវាងគណៈប្រតិភូខាងជើង និងខាងត្បូងដែលមានសមាជិកម្ខាងៗចំនួន៣នាក់នៅក្នុងអាគារនៃការរួបរួមក្នុងស្រុក Panmunjom ស្ថិតប៉ែកទឹកដីកូរ៉េខាងជើង។ តាមកិច្ចព្រមព្រៀង ជំនួបកំពូលរវាងមេដឹកនាំកូរ៉េទាំងពីរនឹងធ្វើនៅថ្ងៃទី២៧ មេសានៅក្នុងផ្ទះសន្តិភាពកូរ៉េខាងត្បូងស្ថិតក្នុងស្រុក Panmunjom។
ទាក់ទងនឹងរបៀបវារៈនៃជំនួបកំពូល និងការរៀបចំសន្តិសុខនាឱកាសជំនួបកំពូលត្រូវបានគណៈប្រតិភូទាំងសងខាងយល់ព្រមលើកយកទៅជជែកលំអិតនៅថ្ងៃពុធ ទី៤ មេសាសប្តាហ៍ក្រោយ។ សូមជម្រាបជូនថា ជម្រើសយកស្រុក Panmunjom ជាទីកន្លែងរៀបចំជំនួបកំពូល ព្រោះជាស្រុកជាប់ព្រំដែនស្ថិតក្នុងតំបន់គ្មានកងទ័ពដែលបានពុះចែកទឹកដីកូរ៉េជាពីរ និងក៏ជាទីកន្លែងដែលបងប្អូនបង្កើតគូសត្រូវបានចុះហត្ថលេខាលើយុទ្ធសន្តិភាពក្រោយសង្រ្គាមពីឆ្នាំ ១៩៥០ ដល់ឆ្នាំ ១៩៥៣។
ជំនួបកំពូលរវាងមេដឹកនាំកូរ៉េខាងជើងលោកគីម ជុងអ៊ុន និងប្រធានាធិបតីកូរ៉េខាងត្បូងលោកមូន ចៃអ៊ីននាពេលខាងមុខ ជាជំនួបកំពូលលើកទី៣ បន្ទាប់ពីធ្លាប់បានរៀបចំចំនួនពីរដងក្នុងឆ្នាំ ២០០០ និង ឆ្នាំ ២០០៧។ តែនៅក្នុងគម្រោងជំនួបកំពូលក្នុងទឹកដីកូរ៉េខាងត្បូងពេលនេះ លោកគីម ជុងអ៊ុនជាមេដឹកនាំកូរ៉េខាងជើងដំបូងគេដែលត្រូវដាក់ជើងជាន់ទឹកដីកូរ៉េខាងត្បូង ព្រោះជំនួបកំពូលក្នុងឆ្នាំ ២០០០ និងឆ្នាំ ២០០៧ បានរៀបចំឡើងក្នុងទីក្រុងព្យុងយ៉ាង ទឹកដីកូរ៉េខាងជើង។
សូមជម្រាបជូនថា គឺការរៀបចំកីឡាអូឡាំពិកក្នុងទឹកដីកូរ៉េខាងត្បូងនាខែកុម្ភៈកន្លងទៅដែលបានធ្វើឲ្យបងប្អូនបង្កើតគូសត្រូវទាំងពីរផ្តើមមានភាពល្អូកល្អឺន និងរំកិលរកគ្នាកាន់តែជិតនាពេលសព្វថ្ងៃ។ ទន្ទឹមគ្នានេះ ភាពតានតឹងក៏ហាក់បានធូរស្រាលរវាងកូរ៉េខាងជើង និងអាមេរិកដែលលោកគីម ជុអអ៊ុន និងលោកដូណាល់ ត្រាំគ្រោងនឹងជួបគ្នានាចុងខែឧសភាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ